Yoane 9 - Rusang rusek rapunta

Nter adipr Yes mun a mis mabama

¹ Nter awasamp Yes, ya kutar muna a mis mabama teshi mabotr mante.

² Baronki bante kungor bampe : Kumu ! ntshu aker bube na, muot nywe, mpe isante, mpe inyante isin ye ama mot ba nko ntshu a mis mabama ?

³ Yes kusakr yampe : Muot nywe kuaker mey mabe bo, i babot ante ake, bo ; di isina keka mayemp ma Ntsampe musoru u kat a muot nywe ;

⁴ Nter ingwa rusu, busek minyi ruker mayemp ma yone amatom minyi ; butu awiy bunta, rek a muot uyeb uker iket u kat a bu bo.

⁵ Nter ingwak minyi u kat a bat, minyi rungwak ru muer mua bat,

⁶ Nter aman yante utot nkos, ya kupur masoenyi mante u man, ya kuputur nto a man, ya kukor u mis ma muna a mis mabama.

⁷ Kek ya kunor yampe : Yaka uwawok u rues ra Siroa mpar a rinta ampe : Rutom. Ya amawe kuwawok, ya kuwikarui ntshu atara

⁸ Basi kump ante nto ake bene bamakuntar buso buso ampe : mun biromp bampe : Yone, ka yante nywe arompok mikuang asina ?

⁹ Bana bamwetsh kusakr bampe : Ya yone ; bana bamwetsh bekra bampe : Bo ; di yante amak mpuany ; di yante yampe : Minyi nywe.

¹⁰ Ba kunor bampe : Mis mawo munkampu mpuenyi ?

¹¹ Ya kusakr yampe : Muot mwetsh ngur ba ampe, Yes, imputur masoenyi nto a man, imakor u mis, keka imantor yampe : Yaka u rues ra Siroa uwawok, minyi rumurwe, keka rungoko, kek runkampra runtara.

¹² Ba kungor bampe : Ya an kue muot yos ? Yante kusakr : Minyi rek rayeb.

¹³ Ba kuwitshuari yona ntshu awaka mis mabama ngwa Bafarisai.

¹⁴ Rusu raputur Yes masoenyi rakampr yante mis mabama, rawar nkira mu basi Yuda.

¹⁵ Bafarisai kungor ake bamet bampe : Ya antar mpueny ? Ya kubasuengs, amakor man maputur nto masoenyi u mis, minyi rungoko, keka runtara.

¹⁶ Isin kankos Bafarisai bana bamwetsh bampe : Muot nywe kuatoa ngwa Ntsampe bo, isin yante uyer rusu ru nkira bo. Di bana bekra bampe : Muot me iyeb uker bisana bine mpuenyi ? Banta baukusiks pantshi u kat a ba.

¹⁷ Ba kukaror mun a mis mabama bampe : Wene ake unor mpueny isina imaikampr yante mis mawo ? Ya kusakr yampe : Angwa profete.

¹⁸ Di basi Yuda uyes bo ampe, yante awak muna a mis mabama, amatar kakaka nter aura banta isante nto inyante.

¹⁹ Ba kubawor bampe : Yone muana a binu ntshu nork binu ampe, tshua ma mot ntshu a mis mabama ? A kekanko yante antar mpuenyi ?

²⁰ Isante nto inyante kusakr bampe : Tshumayeb yone muan a bitu, atoa ntshu a mis mabama.

²¹ Di bitu rek tshuayeb mpe antar mpuenyi kekanko. Bitu rek tshuayeb ntshu mankampr mis bo. Ya nguetare, ngoror ana yante, ya apatot isin yante yamet.

²² Babot ante batot nkos isin banta bapak ra basi Yuda ; isina basi Yuda bamakueriy mey ma ba ampe ; mpe muot ayeb ampe, Yes awar Kristo, ba buming u kat a mpur uromp.

²³ Isina kankos babot ante atot ba ampe : Ya nguetare, ngoror ana yante.

²⁴ Bafarisai kukaur muot yona ntshu awak mis mabama pur ntshi mpe, banta kunor bampe : Tonos Ntsampe bitu tshuamayeb muot yoso angwak muot me.

²⁵ Ya kusakr yampe : Mpe angwak muot me, minyi rek rayeb ; di minyi rumayeb na rine, rawak minyi muna mis mabama, kekanko rumatar.

²⁶ Ba kukangor bampe : Ya amaiker biye ? Ankampr mis mawo mpueny?

²⁷ Ya kubasaks yampe : Minyi rumabisuengs binu rek buaoka ? Isin ye ingont binu ukaok ? Binu bungont kupiru baronk bante?

²⁸ Ba kunto mising bampe : Wene ronki rante, di bitu tshu baronk ba Moise.

²⁹ Bitu tshuamayeb Ntsampe atotok nto a Moise, di muot nywe, bitu rek tshuayeb mpok ato yante.

³⁰ Muot yona kubasaks yampe : Rine ruey risisim mpe binu rek bayeb mpe ya ato kue ; di kekanko ya amakampr mis mami.

³¹ Bit tshuamayeb Ntsampe kuangok bat babe bo ; mpe muot apuiminy Ntsampe aker ruwont rante, ya yoso ntshu ngokok Ntsampe.

³² Bitu ketshuatuok ampe muot amayeb udipr mis ma mun a mis mabam bo.

³³ Mpe muot nywe yaruwar ka muot a Ntsampe bo, keyare yeb uker ruey bo.

³⁴ Ba kunsaks : Wene bamaibot kat bube a barabara, wene utshusuengs bitu ! Ba kuming u kat a mpuru uromp.

³⁵ Yes amaok, bamaming, nter amwens ya nto ante, ya kunor yampe : Wene umayes Muan a Ntsampe ?

³⁶ Yante kusakr yampe : Ya nake Kumu ! isina keka minyi runyes ?

³⁷ Yes kunor yampe : Wene umantar, ya yamet ikutoti nto awo.

³⁸ Ya kuror yampe : Minyi rumayes Kumu ! Ampis ya kubor mamonko a sin buso buante.

³⁹ Yes kutot yampe : Minyi ramawiy u kat a bat isina kutent butent bune, isin keka bene bungwak rek utar butar, nto ake bunkutari bupiru bin a mis mabama.

⁴⁰ Bafarisai bana bamwetsh bawar nto ante, nter aok ba mey mene, kunor bampe : A bitu ake tshungwar tshu bin a mis mabama ?

⁴¹ Yes kubaror yampe : Mpe barakuwar bin a mis mabama, keka reke bawar i bube bo ; di kekanko binu biampe : Tshumpak tar. Isin kankos bube bua binu bumayor.