Yoane 8 - Rusang rusek rapunta

Ngat ntshu nsuesuempe

¹ Yes kuwe u ruk ru nkuentshi mua Oliva.

² Nyies butu ya kuwe ra mpur a Nzambi, bat bakima bawiy u ngwa yante, ya kuwar asina, ya aukubasuengs mey.

³ Bat bapunt mukanta nto ake Bafarisai, banta kuwi- tshuari ngat mwetsh, bamangwat sasi, banta kuntshuer u nteng a banta.

⁴ Ba kuror Yes bampe : Kumu ! Ngat nywe tshumangwat sasi.

⁵ Moise amatshuwek ibo rudjak bat bunkerka busuesuempe i mamanya ; wene unor mpueny ?

⁶ Banta bamanor nkos isin kunkik, isin kumon mpok ntshi nsoror. Di Yes kuturme ipunt nto nemp muante u man.

⁷ Nter akaukungor banta, ya kuumun buso kubaror yampe : U kate a binu ntshu ngwa rek bube irab ya kwetshi a kwetshi imanya inkuet.

⁸ Ya kukaturm upunt ruk ra man.

⁹ Nter aok ba meye mas, ma kubawat, ba kuto mwetsh mwetsh, bawetare kutetshiy, ampis bekra kumans; ba kusabompr Yes yamet nto ngat ntshu awar ona u nteng a banta.

¹⁰ Yes kuumun buso, yante ikamon muot mwetshi bo, na ngat yona, ya kuror nto ante yampe : Ngat, bat bumaisor ban kue ; rek a muot mwetsh maikuaksa ?

¹¹ Ngat kusakr Rek a muot mwetshi bo, Kumu. Yes kunor yampe : A minyi ake, minyi rak ikuaks wene bo, yaka, rek ukawaker bube bo.

Yesu awar muer mua bat ba man

¹² Yes kukabaror yampe : Minyi rungwak ru muer mua bat ba man, muot ntshu rabs ami, yak kasamp u kat a muimin bo, di ya ipamon muer mua mony.

¹³ Bafarisai kunor bampe : Wene ukutot bukentshi buawo wene amet; bukentshi buawo rek buawar barabara bo.

¹⁴ Yes kubasaks yampe : Mpe minyi rik toti bukentshi bua mia amet, bukentshi buami bungwak bua barabara ; isina minyi rumayeb mpok ato minyi nto ake mpok ikawe minyi ; di binu uyeb bo, mpok ingwiy minyi, nto ake mpok iwe minyi.

¹⁵ Binu ibuntentek mey mu rutoko, di minyi utente meye ma muot bo.

¹⁶ Di mpe minyi ratents muot, butente buami bungwa a barabara, isina minyi kurungwak mia amet bo ; di Tata ntshu amatom angwa nto ami.

¹⁷ Mungwak mapunta u kat mukanta mu ibo ra binu, bukentshi bua bat bape bungwak bua barabara.

¹⁸ Minyi rik toti bukentshi buami miamet ; Tata ntshu amatom minyi ake antotok bukentshi buami.

¹⁹ Ba kunor bampe : Iso ankue ? Yes kusakra : Binu reke bantshyeb minyi bo, bake yeba ake Tata bo ; mpe binu bare ntshyeb minyi, kek bar kayeb ake Tata.

²⁰ Yes aror mey mene, aukusuengn kat ampuru a Ntsampe u kor irak rarontok banta birok ; rek a muot mwetsh amangwat bo, isin isoenki rante utukok bo.

²¹ Yes kukabaror yampe : Minyi ruwe kuwe, binu busakusot minyi, binu ake busakuwa u kat bube bua binu ; binu bak yeb uwiy mpok iwe minyi.

²² Basi Yuda kutot bampe : Ya idjaks yamet, isin inor yante nkos : Binu bak yeb uwiy mpok iwe minyi ?

²³ Ya kubaror yampe : Binu bu basi sina a man, minyi ake ru nsi ruk. Binu bungwar bubat ba man mene, di minyi rek rawar nsi man mene bo.

²⁴ Isin kankos imabiror minyi ampe : Buukuwa u kat bube bua binu ; isina mpe binu uyes bo, minyi nywe rungwara, binu busakuw u kat bube bua binu.

²⁵ Banta kunor : Wene u nake ? Yes kubaror : Rine ramabiror minyi kwetshi a kwetshi.

²⁶ Minyi rungwa a mey ma buiki mubiror, nto ake mubikuaks, yante amatom minyi angwak a barabara, mey maok minyi ngwar yante, minyi rumatot u kat a bat ba man.

²⁷ Ba uok bo, aukubaror Yes mey ma Tata.

²⁸ Yes kubaror yampe : Nter ibentes binu Muan a Muot, keka bupayeb minyi ru yante, minyi kurunkerk iket miamet bo, di minyi runtotok mey mamasuengs Tata.

²⁹ Yone ntshu amatom minyi angwak nto ami, Tata umpompr minyi amet bo, isina inkerak minyi matank makima mey mawont yante.

³⁰ Nter atot Yes mey mene nkos, bat ba buiki kunyes yante.

³¹ Yes kuror basi Yuda bene bamanyes : Mpe binu bawar u kat a mey mami, nkos keka bungwar bu baronk bami ba barabara.

³² Binu bapayeb barabara, keka barabara yapabipusur.

³³ Banta kunsaks bampe : Bitu tshu bakana ba bora Abraham, bitu ketshuatowar basou ba muot bo ; a wene nkos unor mpuenyi ampe : Binu bapapusu ?

³⁴ Yes kubasaks yampe : Barabara, barabara, minyi rik birori, muot ntshu nkerk bube, angwak nsou bube.

³⁵ Nsou kuangwak u kat a mpuru matankua makima sera sera bo ; di muan isin ya ngwak matank makima sera sera.

³⁶ Mpe Muan ibipusur, binu bapapusu a barabara.

³⁷ Minyi rumayeb binu bungwar bu bakana ba bora Abraham ; di binu bukusot untshak minyi, isin mey mami rek manyingin u kat a binu bo.

³⁸ Minyi runtotak mey matar minyi bora a Tata, binu ake bunkerk mey matar binu bora iso a binu.

³⁹ Ba kunsaks bampe : Tata a bitu, Abraham, Yes kubaror yampe : Binu barawar bana ba bora Abraham, keka bumpaker nko akerk Abraham.

⁴⁰ Di kekanko binu bukusot untshak minyi, minyi muot rumak biror mey ma barabara maok minyi ngwa Ntsampe ; Abraham keakerk nkos bo.

⁴¹ Di binu bunkerk mingun miso a binu. Ba kunor bampe : Bitu rek tshuawar bana bu misuesuempe ; bitu tshungwar a Tata a bitu mwetshi, yante Ntsampe.

⁴² Yes kubaror yampe : Mpe Ntsampe yar war Iso a binu, keka bamapont minyi, isin minyi rato ngwa yante, minyi rawiy ngwa yante; minyi kerawiy mi amet bo, di ya amatom minyi.

⁴³ Isin ye binu uok rutot rami bo ? Isin binu uyeb bo uok ruey rami.

⁴⁴ Binu bungwa bana ba bora Satan, binu bungontok kukokos ruwont ru iso a binu. Ya awak ndjak a bat kwetshi a kwetshi, yante uwar u kat a barabara bo, isina barabara rek a yinta u kat ante bo. Matank makim mpe yante atot ikuis antotok meye mante muntotok ya, isina ya angwak muna ikuis, angwak ake isante makuis.

⁴⁵ Di minyi, isin intotok minyi a barabara, kek imerk binu untshyes.

⁴⁶ Nake u kat a binu itusuengs bube buaker minyi ? Mpe rumak biror mey ma barabara, isin ye binu untshyes minyi bo ?

⁴⁷ Mpe muot awar muot a Ntsampe, ya iok mey ma Ntsampe ; binu bungwak rek maok ; isina binu rek bawar bat ba Ntsampe bo.

⁴⁸ Basi Yuda kunsaks bampe : Bitu tshuntot a barabara ampe, wene u nsi Samaria, nto ake wene ngwa nto nsong mua Satan mpe ?

⁴⁹ Yes kusaks yampe : Rek nsong mua Satan u kat ami bo ; di minyi runkupuiminyi Tata, di binu bunkusip minyi.

⁵⁰ Minyi kerunsotok ruton rami bo, di yuekr ntshu nsotoka angwar, yante yeitent a barabara.

⁵¹ Barabara, barabara minyi rik birori, mpe muot aront mey mami, yekeimon iwa bo.

⁵² Basi Yuda kunor bampe : Antana tshumayeb wene ungwar i nsong mua Satan, Abraham amawa, nto ake baprofete, wene wampe : Mpe muot aront mey mami, yekeimon iwa bo.

⁵³ Wene unek tata a bitu Abraham bunene, yante ntshu awa ? Baprofete ake bamawa, wene ake u nak ?

⁵⁴ Yes kusakr yampe : Mpe minyi ratons miamet ruton rami rungwa nkona, Tata, utonos minyi ; ya yone unok binu ampe, Ntsampe a binu.

⁵⁵ Binu kebamanyeb ya bo, di minyi ramanyeb, mpe minyi raror ampe, minyi kuramanyeb, minyi ruwiy mun ikuis nko binu ; minyi ramanyeb yante, minyi runkaront mey mante.

⁵⁶ Iso a binu Abraham awar i nianko isin kutar rus rami, ya amarutar, yante awar i nianko.

⁵⁷ Basi Yuda kunor bampe : Mabur mawo rek mawar makuem matanu wene wamatar Abraham !

⁵⁸ Yes kubaror yampe : Barabara, barabara, minyi rik birori, buso Abraham utowar bo, minyi rapakwar.

⁵⁹ Di banta kurab mamanya isina kunkuet, Yes kusuam, ya kutoa u mpur a Ntsampe, ya kuwe.