Yoane 7 - Rusang rusek rapunta

Bampai ba Yes bawonta yante iwe ra Yerusarem

¹ Ampis muna yante awar u Garirea, yante aber uwar u Yudea, isin basi Yuda basot kundjak.

² Rusu ru nianko mu basi Yuda, raurak banta nianko mu a mpuru marampa muawar kora kor.

³ Bekiy bante kunor : Kobua ane, yak ra sues a Yuda, isina keka baronki bawo butar ake mayemp muker wene.

⁴ Isina rek a muot unkek mey busuamn bo. Mpe wene inkerk wene mey mene, suintsh bat wene wamet.

⁵ Isina bekiy bante bamet unyes ya bo.

⁶ Yes kubaror yampe : Isoenki rami rek ratuwiy; na isoenki ra binu rungwak matankua makima.

⁷ Bat ba man bak uyeb ubiok pis, di banta bumak pok minyi pis, isin intotok minyi ampe, mey munkerk banta mungwak ma mabe.

⁸ Yak ana binu mukang mune, di minyi rak tobentu bo, isina isoenki rami rek ratokok bo.

⁹ Nter amabaror ya nkos, ya kusasar u Garirea.

¹⁰ Ampis nter awe bekiye bante, ri mukang, ya ake kuwe, kuawe u nteng a bat bo, di yante awe nko busuamn.

¹¹ Basi Yuda baukunsoti u kate matu mu nianko muna bampe : Ya angwa kue ?

¹² Banta baukusiki pantshi isin mey mante, bana bamwetsh bampe : Muot nsek ; bana bamwetsh ake bampe : Bo, yante ank rimp bat.

¹³ Rek a muot mwetsh aukutot ankon isin ya bo, isina aukupakr banta basi Yuda.

¹⁴ Yes kuwe ra mpur a Ntsampe rusu ri mukang muna, aukusuengs bat mey.

¹⁵ Basi Yuda kupak bampe : Muot nywe ayeb Mikanta kue, yante uyek bo ?

¹⁶ Yes kubasaks yampe : Rueye rami kerungwak rami bo, di ra yone ntshu amatom minyi.

¹⁷ Mpe muot awont uker ruwont ra Ntsampe, ya apayeb mey mene mpe ma Ntsampe, di mpe rutotok i bukumu buami miamet.

¹⁸ Muot ntshu nkutoti i bukumu buante ankusoti ruton rante yamet, di muot yona ntshu sota ruton ru ntom ante, yante muot a barabara, rek a ruey rube u ntem muante bo.

¹⁹ Moise kamabiwek bikin ; rek a muot mwetshi u kat a binu mak biyerer bo. Binu bukusoti untshjak minyi isin ye?

²⁰ Bat kunor bampe : Wene ungwar i nsong na ikusoti uidjak?

²¹ Yes kubasaks yampe : Minyi ramaker iyemp rumwetsh, ruera binu bakim bamapak.

²² Moise amabiwek mey miromp kuratoa ngwar Moise bo, ri rinta ratoa ngwar banank binu bunker muot iromp rusu ru nkira.

²³ Mpe muot bumok iromp rusu ru nkira mu basi Yuda, isin ikin ra Moise upuintsh bo, isin ye ingwor binu kabo u mpungun ami isina abers minyi muot rusu ru nkira ?

²⁴ Rek ana butentes muot isin rutoko bo, di tentes ana yona ntshu ngwar a ruey ra barabara.

²⁵ Bana bamwetsh bawak u Yerusarem, kutot bampe : Ka ya yone ntshu ikisot banta undjaka ?

²⁶ Rent ya iktoti u kat a bat bakima irengen irengen, di banta unor ruey bo. Bakumu buma kayeb barabara ampe, yante angwa Kristo.

²⁷ Di bitu tshumayeb mpok ato yone, di Kristo nter iwiy yante, rek a muot iyeb irak yeruto yante.

²⁸ Yes kutot ankon u kat a mpur a Ntsampe, nter aukusuengs ya bat mey, yampe : Binu bamantshyeb, binu bamayeb mpok ato minyi, minyi kerawiy miamet bo, di ntshu amatom minyi, angwak a barabara ; binu kebamanyeb ya bo.

²⁹ Minyi ramanyeb yante isin minyi rato ngwa yante, ya amatom minyi.

³⁰ Banta barab kungwat yante, di muot mwetsh uses rou u kora ante bo, isina isoenki rante utakok bo.

³¹ Bat ba buiki u kat a tong a bat kunyes, ba kutot bampe : Nter yeiwiy Kristo, yeipaker bisana binkerk yone ?

³² Bafarisaii bamaok mey maukukukukuk bat isin Yes, bakumu bu bampang bakump banen nto ake bafarisaii kutom tshuparai isina kungwat.

³³ Yes kutot yampe : Minyi rukawar nto a binu itankua kakek, ampis minyi rukawe ngwa yone ntshu amatom minyi.

³⁴ Binu yebusak sot minyi, yekebumpon bo, binu yekebuyeb uwiy irak yeruwar minyi bo.

³⁵ Isina mey mas, basi Yuda kutot u kat a banta bampe : Yante yeiwe kue, keka iwa bitu rek umon bo ? Yeiwe kat a bene batshakra bungwak u nteng basi Greke mpe ; uwasuengs basi Greke ?

³⁶ Mey maye mene munor ya ampe : Binu yebusak sot minyi, yekebumpon bo, binu yekebuyeb uwiy irak yeruwar minyi bo ?

³⁷ Rusu rumans ri runen ru nianko, Yes kukatu kunyemt, kuwam ankon yampe : Mpe muot awar a puesa, iwiy ngwa minyi, ya inyui.

³⁸ Muot ntshu ntshes minyi, ntshare sia mas ma mony sito u kat a tor ante, nko aror mukant mua Ntsampe.

³⁹ Ya atot mey mas isin Ntem mua Puinki a Ntsampe, mu rab bene yebunyes yante, isin Ntem mua Puinki a Ntsampe utowiy bo, isina Yes utotonos bo.

⁴⁰ Babuik u kate a tong a bat, nter aok ba mey mas bampe : Ya nywe angwa profete a barabara.

⁴¹ Bat bamwetsh bampe : Ya nywe Kristo. Bana bamwetsh bampe : Kristo yeito u Garirea ?

⁴² Mukant mua Ntsampe kumuaror ampe : Kristo yeito iruentsh ra bura Davir nto ake u bora basi Betrehem irak rawak Davir ?

⁴³ Bat bamakaps isin mey ma Yes.

⁴⁴ Bat bamwetsh barab kungwat, ya muot mwetsh usik rou u ruk rant bo.

⁴⁵ Mayor kukakaru ngwa bamene ba banta nto ake u kor Bafarisaii, banta kuror mayor : Isin ye binu bumer ngwat uwintshuar ane ?

⁴⁶ Mayor kubasaks bampe : Muot mwetsh rek ante ntshu tot mey bunono nko ya bo.

⁴⁷ Bafarisai kubasaks : A binu ake bumak nyesa ?

⁴⁸ Muot mwetsh u kat bakumu, nto ake Bafarisaii bamatanyes yante ?

⁴⁹ Tong a bat bene baber yeb mey mibo bungwa bantshera.

⁵⁰ Nikodem, yone atawiy ngwa Yes i butu, ya awar u kat a ba yampe.

⁵¹ Ibo ra bitu rumpakuaks muot, mpe utuok nonto muante bo, nto ake bitu tshumon mey maker yante?

⁵² Ba kunsaks : A wene ake u nsi Garirea ? Sot busek, wene wapatar rek a profete mwetshi atoa u Garirea.

⁵³ Ampis muna, ba bakima kumuangn muota muot kukaru ra mpur ante.