Yoane 6 - Rusang rusek rapunta

Nter apur makuimpi

¹ Ampis muna, Yes kubuer mas ma Garirea, rukompua rekra mas ma Tiberiade.

² Bat ba buiki bawirabs ante, isin atar banta bisana biaker yante ruk ri babero.

³ Yes kuwe ra ruk ru nkuentshi, yante kuwar ona nto baronki bante.

⁴ Isina rusu ru nkira mu Asampar Ntsampe muawar kora kor, nkira munene mu basi Yuda.

⁵ Yes kuumun mis, yante kutar bat ba buiki bawiy ngwa yante, yante kuror Firipo : Bitu tshusomp bisima kue, isin bat bene ruera banta budji ?

⁶ Yante atot nkos isina kukik Firipo, di yante amayeb mey masot yante ker.

⁷ Firipo kunsaks yampe : Bisima bi birok masanke makuem mape bia takok muota muot irab kakek.

⁸ Ronki rante rumwetsh rekra Andere, muan inyante a bora Simon Petero kunor :

⁹ Muan nunka mwetsh angwar ane, yante angwar nto makuimpi matan, nto ake basue bape babakeke, biapakok nto a bat bene babuiki ?

¹⁰ Yes kuror yampe : Tshuer ana bat asin, ona nenke mua buiki muawara ; bat bene kuwar asin, bawar rueri tuku itanu.

¹¹ Yes kurab makuimpi matan, nter amana yante uromp Ntsampe, yante kukaps baronki bante, keka baronki bante bakaps bene bawar asin ; yante kukabawek ake basue nko awont banta.

¹² Nter awuut banta, yante kuror baronki bante yampe : Tor ana mabeye isina biteny udimu bo.

¹³ Banta kubitor, banta kuyoros mitet isank nto mitet mipe mabeye mu biteny bi makuimpi, mabese bene badja.

¹⁴ Nter atar bat bene isana raker Yes, banta bampe : Barabara, yone angwar profete, yeuwiy u kat a bat ba man.

¹⁵ Nter ayeb Yes ampe, bat baukunsoti kunats bukumu i bunono, kuwe ra ruk ru nkuentshi yamet.

Nter asamp Yes ruk ra mas

¹⁶ Nter awitor itankua rikokoro, baronki bante kuoworme kwar a mas manen.

¹⁷ Banta kunyingin u kat a buat, bawont kubuer u muin muwe ri Kapernaum kupit, Yes utowiy ngwa ba bo.

¹⁸ Mas kukatu nto bunono isina puinki ntshunene aker.

¹⁹ Nter aman banta uru buat buamator tare ruera ntshueri (stade=km) itan mpe isampr, banta kutar Yes iwisampi ra mas, yante awar u kor a buat, banta kupak.

²⁰ Di yante kubaror yampe : Mi nywe ; kat pak ana !

²¹ Banta kunyings u kat a buat nto nianko, keka buat kutor u irak rawawe ba.

Yes awar kat a monyo

²² Nyies muna tong a bat bawar u muin mua mas, atar ba Yes ke war u kat buat, nto baronk bante bo baronk bawe bamet.

²³ Di mat mekr matoa u Tiberiade masamp u kor irak radji banta nter aman uromp Kumu.

²⁴ Nter atar ba ampe, Yes rek ante ona, i baronk bante, banta kunyingn kat a mat, kuwe ri Kapernaum uwasot Yes

²⁵ Ba kuamon u muin mua mas, ba kunor bampe : Kumu ! Wene wawir nter ye ane ?

²⁶ Yes kubasaks yampe : Barabara, barabara, minyi rikibirori, binu kubukusoti minyi isin atar binu bisan bo, di isina atar binu, awuut binu, keka ikusot binu.

²⁷ Kat ker ana ngun isin bisima bikawa, di sot ana bine bia mony usir bo, yemubiwek Muan a Muot, isina Tata ntshu ngwaka Ntsampe amansik yentsh.

²⁸ Ba kunor bampe : Bitu tshuker mpueny isin kuker mayemp ma Ntsampe ?

²⁹ Yes kubasaks yampe : Iyemp ra Ntsampe rungwak kanko, binu buyes yone ntshu atom yante.

³⁰ Ba kunor bampe : Isana ru na runkerk wene, bitu tshuatar isina keka tshuiyes ? Iyemp ru na runkerk wene ?

³¹ Batat ba bitu bamadja manne u busuebe bu ibuings, nko awak manta mapunta ; kat mukanta mua Ntsampe. Yante amabawek bisima bia ruk isina kudja.

³² Yes kubaror yampe : Barabara, barabara, minyi rik birori, Moise kuamabiwek kat atoa a ruku bo, di Tata ibiwek binu kat a barabara atoa a ruk.

³³ Kat a Ntsampe ingwak ya yone atoa a ruk, ya iwek bat ba manu mony.

³⁴ Ba kunor bampe : Kumu ! Tshuwek kat yis matank makima.

³⁵ Yes kubaror yampe : Minyi rungwar kat a mony, muot ntshu wiya ngwa minyi, yak awar a ntshar, ntshu ntshyesa minyi, yak awar a puesa.

³⁶ Minyi ramabiror, binu bamatar, di binu untshyes bo.

³⁷ Bakima bupek Tata bapawiy ami, muot uwiya ngwa minyi, minyi rake uming bo.

³⁸ Minyi kuratoa a ruk isin kuwiy ker ruwont rami bo, di ruwont ra yone ntshu amatom minyi.

³⁹ Rine ruwont ra Tata ntshu amatom minyi, minyi rake rimis muot u kat a bene bamapek ya bo, di minyi ribaumun rusu ru buso.

⁴⁰ Rine ruwont ra yone ntshu amatom minyi, muot ntshu tar Muan, inyesa, angwar a mony usir bo, minyi rupangumun rusu ru buso.

⁴¹ Di basi Yuda baukukukuk isina atot yante ampe : Minyi ru kat ato a ruk.

⁴² Ba kutot bampe : Ka Yes muan a Yosef nywe, bitu tshuamayeb isante nto ake inyante ? Isin ye ikutot ya ampe : Minyi rato ruk ?

⁴³ Yes kubaror yampe : Kat kukukuk ana u kat a binu.

⁴⁴ Rek a muot uyeb uwiy ngwa minyi bo, mpe Tata ntshu amatom minyi rek unan ; minyi rapangumun rusu ri buso.

⁴⁵ Mungwar mapunta u kat mukanta mu Baprofete : Ntsampe ipabisuengs bakima. Muot ntshu oka mey ma Tata ntshu maraba, ya iwiya ngwa minyi.

⁴⁶ Rek a muot atutar Tata bo, di ya yante atoa ngwar Ntsampe, yante atar Tata.

⁴⁷ Barabara, barabara, minyi rik birori, mpe muot antshyes minyi, yante angwar a mony usir bo.

⁴⁸ Minyi rungwak ru kat a mony.

⁴⁹ Biso bia binu banta bamadja manne u busuebe bu ibuings, banta bamawa.

⁵⁰ Ine ingwak kat atoa a ruk, isina ntshu idja yak kawa bo.

⁵¹ Minyi rungwak kat a mony ato a ruk, mpe muot adja kat ine, yante iwar a mony usir bo ; kat ntshi biwek minyi, ingwak rutoko rami, yeruwek minyi bat bakim ba man, isin mony usir bo.

⁵² Basi Yuda baukuwamsi bamet bampe : Muot nywe iyeb tshuwek rutoko rante udja mpueny ?

⁵³ Yes kubaror : Barabara, barabara, minyi rik birori, mpe binu udja rutoko ra Muan a Muot bo, unyo ake makera mante bo, binu bak mon mony bin amet bo.

⁵⁴ Muot udja rutoko rami, unyo ake makera mami, yante iwar a mony usir bo, minyi rupangumun rusu ri buso.

⁵⁵ Isin rutoko rami rungwak isina ra barabara, makera mami ake mungwak inyur ra barabara.

⁵⁶ Muot udja rutoko rami, inyo makera mami, yante iwar u kat ami, minyi ake ruwar u kat ante.

⁵⁷ Nko Tata a mony amatom minyi, minyi rungwak a mony isin Tata, nkos muot udja rutoko rami, yante iwar a mony isin minyi.

⁵⁸ Yine ingwak kat ato a ruk, kumungwak nko kat adji biso bia binu, banta bamawa. Ntshu udja kat ine yeiwar a mony usir bo.

⁵⁹ Yes aukuror mey mene, aukusuengn u kat irak ruromp u Kapernaum.

Yes akika baronki bante

⁶⁰ Nter aoka baronki bante ba buiki mey mene, ba kutot bampe : Mey mene mungwak ntshoro, na uyeb maok?

⁶¹ Nter ayeb Yes u ntem muante mey maukukukukuk baronki bante, ya kubaror yampe : Mey mene mumabipampra?

⁶² Mpe butar Muan a Muot ibentu ya irak ratawar yante buso buso.

⁶³ Puinki a Ntsampe ngwekek mony, ri rutoko kurunkerk iket bo. Mey mumak biror minyi mungwak Puinki a Ntsampe nto ake mony.

⁶⁴ U kat a binu, bat bungwak bak yes bo. Isin Yes amatayeb buso buso bat bak yes bo, nto ake na ingwek yante kat a rou ra bat babe.

⁶⁵ Ya kutot yampe : Isin kankos imabiror minyi ampe, muot yak yeb uwiy ngwa minyi bo, mpe Tata ungwek bunono buwiy ngwa minyi bo.

⁶⁶ Itank rina baronki bante ba buiki kukaru banta ukawe nto ante bo isin mey mene.

⁶⁷ Yes kukaror baronki bante isanke ibape yampe : A binu ake reke bawont uwent ?

⁶⁸ Simon Petero kunsaks Kumu ! Bitu tshuwe a nake ? Wene ungwar mey ma mony usir bo.

⁶⁹ Bitu tshuamayes, bitu tshuamayeb wene awar barabara Kristo, Muan a Ntsampe ntshu a mony.

⁷⁰ Yes kubaror, minyi keramabisor isanke ibape ? Di mwetsh u kat a binu angwar nsong mua Satan.

⁷¹ Yante atot nkose isina Yuda Iskariot, muan a bora Simon ; ya awar ntshu isanke i bape, nsariy ante.