Yoane 5 - Rusang rusek rapunta

Nter aber Yes ikat

¹ Ampis muna, rusu ru nianko ri basi Yuda kuwiy, Yes kuwe ra Yerusarem.

² U Yerusarem u kor ikuik ri Mameme, ipek ra mas rumwetsh rawak, rukompua ra rinta i rutot ri basi Hebreu, Betesda, rawar a mper itan.

³ U kat a mper sine, bat ba buiki babesak ona, babero ba mis mabama, nto batikiya, nto bikat, banta baukubaki per a mas.

⁴ Isin wantsho a Kumu awomnk u kate ipek rine mun iswenki, muna iswenki, anyisk mas, nter aker manta nkos, muot ntshu urokuo u kate buso, buwar buante buberu buawak ante.

⁵ Nunka mwetsh awak ona, i buwar mabur masa masat nto mabur inana.

⁶ Yes amantar yante ames, yante kuyeb amabik a bunta, yante kungor yampe : Umangan uberuo ?

⁷ Mero kunsaks yampe : Kumu ! minyi reke a muot ntshu mpok minyi u kat a mas nter inyisr manta, nter awe minyi, yuekra itaroku u buso buami.

⁸ Yes kunor yampe : Katua, sent ipon rawo, sampa.

⁹ Itank rina muot yona kuberu; ya kusent ipon rante kusamp, rusu rina rawar rusu ru nkira ri basi Yuda.

¹⁰ Basi Yuda kuror muot yona ntshu aberuo bampe : Ankana rusu ru nkira, ikin usent ipon rawo.

¹¹ Yante kubasaks yampe : Ntshu mampers, yante mantor ampe : Rab ipon rawo, sampa.

¹² Ba kungor bampe : Muot yoso nake mairor ampe : Raba ipon rawo, sampa ?

¹³ Ya muot yona ntshu aberu buwar uyeb bo mpe nake ; isina Yes awe usamp u kat a bat ba buiki bawar u irak ri rina.

¹⁴ Ampis warawar Yes kukamon u kat a mpur a Ntsampe, yante kunor yampe : Rent, koy wamabero ; rek ukaker mey mabe, isina mpe waker bube bukarek ka bune bu a kwetsh a kwetshi buapawiy ngwa wene.

¹⁵ Muot yona kuwe, wasuengs basi Yuda ampe, Yes amamers. Nter aukusuengs Yes bat mey mante nto ake misante.

¹⁶ Isin mey mene nkos, basi Yuda akusos ba Yes mey mumons ntshuro, isin aker yante mey mene rusu ru nkira.

¹⁷ Di Yes kubasaks yampe : Tata aker ngun kakaka a kekanko, a minyi ake ruker.

¹⁸ Isin kankos basi Yuda kureks usot undjak, ka na isina apuintsh yante rusu ru nkira bo, di isina atot yante ampe ; Ntsampe Isante, nko yante awar rueri rumwetsh a Ntsampe.

¹⁹ Yes kubaror yampe : Barabara, barabara, minyi rik birori, Muan uyeb uker ruey yamet bo, nko atar yante akera Isante, mey makima maker Tata, Muan ake ikak maker aya.

²⁰ Isin Tata awont Muan, yante amansuintsh mey makima munkerk yante, yante ipansuintsh mayemp mareka mene bunen, nkos keka binu bukany.

²¹ Nko Tata angumnk bat bawa ikabawek mony, nkos keka Muan angwekek mony abat bawont yante.

²² Tata kuankutentisi mey ma muot bo, yante aweke Muan bunono bukima butentents.

²³ Isin keka bat bakima bupuiminy Muan nko apuiminy banta Tata. Ntshu ubera upuiminy Muan, yante yake puiminy Tata ntshu amantom minyi bo.

²⁴ Barabara, barabara, minyi, rik birori, yone ioka ruey rami, mpe yante ayes yona amatom minyi, muot yona iwar a mony usir bo, yekuiwar u utent ibantsha rukuak bo, di yante amasamp iwa, amanyingin u kat a mony.

²⁵ Barabara, barabara, minyi rik birori, itankua yeruwiy kuwiy, rinta ramawiy, yeruok minyiu rubera ra Muan a Ntsampe, bene yeburuok yebuwar a mony.

²⁶ Nko ingwaka Tata nto a mony u kat ante yamet, yante amak awek Muan mony u kat ante.

²⁷ Yante amangwek ake bunono butent isina awar yante Muan a Muot.

²⁸ Rek ana basisu bo, isin mey mene, isina itankua yeruwiy kuwiy, bene bakima bungwak u kate marompa yebuokuok ruey rante.

²⁹ Bene bakera busek yebuumu iumu ra mony, bene bakera bube ake yebuumu iumu rukuak.

³⁰ Minyi rak yeb uker ruey miamet bo, minyi runtentek nko ingok minyi, butente buami bungwak a barabara, isina minyi kurunsotk ruwont rami bo, di minyi runsotok ruwont ra Tata amatom minyi.

³¹ Mpe minyi rakanyis miamet, rukanyi rami rek rawar barabara bo.

³² Muot yuekr itot isin minyi, minyi rumayeb meye mutot yante isin minyi, manta mungwak ma barabara.

³³ Binu bamatom bat ngwa Yoane, mey matot ya mawar ma barabara.

³⁴ Minyi rak sot bo mey muntotok bat, di minyi runtot nkos isina keka binu bubant.

³⁵ Yoane awar muinta muatemuo, binu buamawont unianga nto a muint muante itankua kakek.

³⁶ Bukentshi buami buamarek bua bora Yoane bunen, isin mayemp mamapek Tata isin kumaker, mayemp mene munkerk minyi, mungwak binkongot biami.

³⁷ Tata ntshu amatom minyi, yante yamet amatot mey mami. Binu kubatuok ruey rante pokr imwetsh bo, kubatutar ake buso buante bo.

³⁸ Meye mante rek a manta u kat mitem mia bin bo ; isin aber binu uyes yone ntshu atom.

³⁹ Kebet ana mey mu mukant mua Ntsampe, isina kat a manta binu buyes bumon mony usir bo, manta muntotok bukentshi isin minyi.

⁴⁰ Di binu uwont bo uwiy u kor ami, isin kurab mony.

⁴¹ Minyi kerunsotk ruton rami ngwa bat bo.

⁴² Di minyi rumayeb nsong mua Ntsampe rek a mu u kate mitem mia binu.

⁴³ Minyi ramawiya i rukompua ra Tata, binu bamamper minyi ; mpe muot yuekra awiya i rukompua rante yamet, keka binu bunab.

⁴⁴ Binu buyeb uyes mpuenyi ? Binu bene bungondk ruton ra bene bamwetsh, binu usot ruton rawiya ngwar Ntsampe yamet bo.

⁴⁵ Rek ana bukanan ampe, minyi ruwabisor buso bua Tata, Moise ntshu unkutikiri binu, yante yeibisor.

⁴⁶ Isina mpe binu bamayes Moise, keka binu bukantshyes ake minyi, isina yante apunta isin minyi.

⁴⁷ Mpe binu uyes bo meye mapunta Moise, binu buyes mey mami ipu mpuenyi?