Yoane 4 - Rusang rusek rapunta

Ngat a Samaria

¹ Nter ayeb Yes ampe, bafarisai bumaok ya ikuweki baronki ba buiki batis amarek Yoane.

² Di ka Yes aukuwek batis bo, baronki bante baukuwek batis.

³ Ya kukobu u sues a Yuda, ya kuwe ra Garirea.

⁴ Mayemen itu samp u sina a Samaria.

⁵ Ya kutor u kat a bora bumwetsh bua Samaria, rukompua ra bunta Sikar, u kor irak rawek Yakob muan’ante Yosef.

⁶ Ipek ra mas ra bora Yakob rawara ona, arey Yes, yante kuwar asin u kor ipek rina, itankua rawar kora kor matankua masiampr.

⁷ Ngat mwetsh ntshu a Samaria kuwiy tek mas, Yes kunor yampe : Pek minyi mas ranyo.

⁸ Isin baronki bante bawe u bora bawasomp bisima.

⁹ Ngat a Samaria kunor yampe : Wene u nsi Yuda, isin ye intomp wene minyi mas munyo, minyi ru ngat a Samaria ? Isina basi Yuda kubatak umwens i basi Samaria bo.

¹⁰ Yes kunsaks yampe : Mpe wene wayeb mukuant mua Ntsampe nto ake nake ikutot awo ampe : Peke minyi mas munyo, wene wamet nak nomp mas, yante yare kiwek mas ma mony.

¹¹ Ngat kunor yampe : Kumu ! Wene rek iket bo rurab mas, nto ake ipek rungwar ntima u man, wene mas mas ma mony nak mamona kue ?

¹² Wene unek tat a bitu Yakob bunen, ntshu asatshuwek ipek rine ra mas, ya mun a rinta anyuk mas mene, nto ake bana bante nto ake basutu bante?

¹³ Yes kunsaks yampe : Muot ntshu nyo mas mene puesa ikak ungwat ;

¹⁴ Di muot inyo mas mungwek minyi, pues a mas yak kangwat bo, mas mungwek minyi mupiru kok a rues u kat ante, kakaka ukat a mony usir bo.

¹⁵ Ngat kusakr : Kumu ! Pek minyi mas mene pues a mas ukapuat minyi bo, minyi ukawiy ane uwiy tek mas ane bo.

¹⁶ Yes kunor yampe : Yaka ur nuem awo, keka uwiy ane.

¹⁷ Ngat kunsaks yampe : Minyi rek nunk bo, Yes kunor yampe : Wene untot a barabara ampe : Minyi reke nunk bo ;

¹⁸ Isin wene wamatomp barunka batan, di yona ntshu ngwar awo kekanko, ka nuem awo bo ; wene untot a barabara nkos.

¹⁹ Ngat kunor yampe : Kumu ! Minyi rumatar wene u profete.

²⁰ Batata ba bitu barompok Ntsampe ruk ru nkuentsh mune, di binu biampe ; irak ruromp Ntsampe u Yerusarem.

²¹ Yes kunor yampe : Ngat, ntshyes minyi, itankua ruwiy kuwiy, yeruromp binu Tata, mpe ruk ru nkuentshi mune bo, mpe u Yerusarem bo.

²² Di binu bunomp ka rine rak yeb binu ; di bitu tshunomp ri rine rayeb bitu, isina ibants ratoa i basi Yuda.

²³ Iswenki yeruwiy kuwiy, rinta ramawiy, yeruromp baromp a barabara Ntsampe, yeburomp Tata ya Puinki a Ntsampe (kate mitem mia banta) a barabara, isin Tata ansotok baromp nkos.

²⁴ Ntsampe angwak mony, busek baromp ante, bunomp a Puinki a Ntsampe nto ake a barabara.

²⁵ Ngat kunsaks yampe : Minyi rumayeb Messia (mpar a rinta ampe Kristo) Ipawiy, mpe yante awiy, yante ipatshusuengs bitu meye makima.

²⁶ Yes kunor yampe : Minyi rikutot awo, minyi ru yante.

²⁷ Itank rina, baronki ba Yes kuwiy, banta kusisu, nter atar ba. Ya ikutoti i ngat a Samaria, rek a muot u kat a banta amanor ampe : Ukungor ye ? Nto ake ukutot ante isin ye ?

²⁸ Ngat kusabompr mpent ante, ya kuwe ra bora kuwasuengs bat u bora yampe :

²⁹ Wiy ana, buwimon muot mwetsh amantor mey makima maker minyi ; yante ka Kristo bo ?

³⁰ Ba kuto u bora, kuwiy ngwar yante.

Basi Samaria kuyes Yes

³¹ Baronki bante kunor bampe : Kumu ! dja.

³² Di Yes kubaror yampe : Minyi rungwa ibisima binu rek bubiyeb bo.

³³ Baronki kuwors ba banta bamet bampe : Muot mwetshi ngwiy ntshuasi bisima ?

³⁴ Yes kubaror yampe : Bisima biami bingwa kutoker ruwont ra yone ntshu amatom minyi, utukokos ngun muante,

³⁵ Ka binu bukutot ampe; nkont Sinsasar ine nter sent biket bia nkonto? Di minyi rik birori umun ana mis nkonto bisima bimanang isin kusent.

³⁶ Ntshu sente irab konko ante, ikwiny ntompa isin mony usir bo, nkos ntshu nguinya nto ake nsente, buniang irak rumwetsh.

³⁷ Mey mas nkos maror banta mawar barabara, yona mwetsh angwak nguinyi, yona ake nsente.

³⁸ Minyi ramabitom usente rine rawar binu rek uker bo ; beker baker binu bamakwiny u kate nguna mua banta.

³⁹ Basi Samaria ba buiki u bor buna bayesa Yes, isina rutot ru ngat yona aror ya ampe : Yante amantor mey makima maker minyi.

⁴⁰ Nter awiy basi Samaria ngwa yante ba kunor uwar nto a banta, yante amawar nto a banta matu mape.

⁴¹ Bat ba buiki bekra bayesa isina rutot rante.

⁴² Ba kuror ngat bampe : Bitu rek tshuayes isina ruey runor wene bo, isin bitu tshumangok bit amet, bitu tshumayeb yante angwar Mantis a bat ba man a barabara.

Nter aberes Yes muan a kum mayor

⁴³ Matu mape ampis muna, yante kukatu kuwe ra Garirea.

⁴⁴ Isin Yes yamet amatot ampe ; profete kuantonk u bora ante bo.

⁴⁵ Nter awitor yante u Garirea, basi Garirea kunyes, isina banta bamatar meye makima maker yante u Yerusarem rusu ru nianko ; isina banta ake bawar ona rusu rina.

⁴⁶ Yes kukawiy u bora Kana u Garirea irak raker yante mas mawiya mana ma vinyo. Kumu mayor awar ona, muan’ante aukutati u Kapernaum.

⁴⁷ Nter aok yante rusang ra Yes, rakatu yante u Yuda, rawiy yante u Garirea, ya kuwe kuwamon isin kubos nto ante, isina kuonab wibers muan’ante awa kor uwa.

⁴⁸ Yes kunor yampe : Mpe binu utotar mayemp nto bisana bo, binu bak yes bo.

⁴⁹ Kumu mayor kunor yampe : Kumu ! woroma buso ingwar muan ami rek utowa.

⁵⁰ Yes kunor yampe : Yaka, muan awo angwar a mony ; muot yona kuyes mey mamano Yes, ya kuwe.

⁵¹ Nter awe yante, ya kumwens i baker ngun bante, ba kunor bampe : Muan awo amaberu.

⁵² Ya kubawor itankua raberu yante, ba kutot : A bukoro itankua rasampuare tshiya kumompr.

⁵³ Isante a muan kuyeb rent itankua ramanor Yes ampe : Muan awo angwar a mony. Ya kuyes, nto ake basi mper a mpur ante bakima.

⁵⁴ Rine rawar isana ru mpe raker Yes, nter akatu yante u Yuda awiy yante u Garirea.