Yoane 21 - Rusang rusek rapunta

Nter asoru Yes ngwa baronki bante u kor irib ra Garirea

¹ Ampis muna Yes kusoru ngwa baronki bante, u kor a mas manen ma Tiberiade, yante asoru nko :

² Simon Petero, Tomas auraka banta Didime, Natanaer nsi Kana u kat a Garirea, nto a ban ba bora Zebede nto baronki bekra bape ba Yes bawa irak rumwetsh.

³ Simon Petero kubaror yampe : Rumawe uwawat basue. Banta kunor bampe : A bitu tshuwe nto awo ake, ba kutou bamanyingn u kat a buat bumwetsh, i butu buna banta uwat iket bo.

⁴ Nyies butu Yes anyemt u nkor a mas ; di baronki uyeb bo ampe, yante awa Yes.

⁵ Yes kubaror yampe : Ban, binu rek buawar nto iket rudja ? Banta kunsaks bampe : Bo.

⁶ Ya kubaror yampe : Bok ana butey urubampi ru nuema rou ra buat, binu bapamon. Banta bamabok nkos ; di banta uyeb ukabunan bo, isina buiki bu basue banen.

⁷ Ronki rawont Yes kuror Petero yampe : Angwa Kumu. Simon Petero nter aok ya nkos ampe, awa Kumu, ya kurat iper rante nto nkueri muante, isina yante awar butaka, ya kurokuo u kat a mas.

⁸ Di Baronki bekra bawiy nto a buat bawinani butey buayora nto basue ; isin banta kebawar tare nto a muin mu nkuentshi bo, rueri masanke makuem mape.

⁹ Nter ator banta u muin mu nkuentshi u man, banta kutar mayar ma tshiya manaminya nto a sue u ruk ra tshunta nto a kat, Yes kubaror yampe :

¹⁰ Witshuar ana basue bunguat binu.

¹¹ Simon Petero kubanta u kat a buat, konan butey u muin mu nkuentshi buayora nto basue banen masanke makuem mape ibasatu ; awar banta ba buiki di butey ubatu bo.

¹² Yes kubaror yampe : Widji ana, baronki bante ya ronki rumwetsh uyeb ungor bo ampe : Wene u nake ? Bamayeb, yante awa Kumu.

¹³ Yes kuses u kora banta kurab kat, yante kubawek, ya kuka bawek ake sue.

¹⁴ Ine yawar soruo ntshi nsat ntshi asoru Yes ngwa baronki bante, ampis aumu yante kat minyiu.

¹⁵ Ampis nter aman ba udja, Yes kuror Simon Petero yampe : Simon, muan a bora Yonas, wene umareb upont urek bene imapont banta ? Yante kunsaks yampe : E, Kumu ! Wene umayeb minyi rumaiwont. Yes kunor yampe : Djis bana bami bu mameme.

¹⁶ Yes kukanor ntor ntshi mpe : Simon, muan a bora Yonas, umaponta ? Petero kunsaks yampe : E, Kumu ! Wene umayeb minyi rumaiwont. Yes kunora yampe : Djis bana bami bu mameme.

¹⁷ Yante kunor ntor ntshi nsat : Simon, muan a bora Yonas, umaponta ? Petero kubuak piu yankebi isina amanor yante ntor ntshi nsat ampe : Umaponta ? Yante kunsaks yampe : Kumu ! Wene umayeb mey makima, wene umayeb minyi rumaiwont. Yes kunor yampe : Djisa bana bami bu mameme.

¹⁸ Barabara, barabara, minyi rik irori : Nter awak wene burenke burunka, wene waratk wene amet, wene wawek irak rawontk wene, di nter inun wene, yeusangn mayatsh mawo, keka yuekra yeirats, yeiwaitshuari u irak yeruwar wene rek wont bo.

¹⁹ Yante amanor nkos, isina kuyebs ampe, nto iwa ru nake yerutonos Petero Ntsampe. Nter aman ya utot nkos, yante kunor yampe : Rabs ami.

²⁰ Petero kubarm ya kutar ronki rawont Yes, awiyi mpis a banta, ya yone nter aukudji banta bisima bikokoro ntshu ayekmu tor a Yes ntshu amangor ampe : Kumu ! nake ntshu maisariy ?

²¹ Nter amantar Petero, ya kuror Yes yampe : Kumu ! muot nywe yeiker biye ?

²² Yes kunor yampe : Mpe minyi rawont nte iwar a mony kakaka nter ikawiy minyi, rungwar ruey rawo ? Wene rabs ami.

²³ Ruey rine ramatshakr u kat a ban ba Ntsampe bampe : ronki rine kuiwu bo. Di Yes keasuen Petero ampe, yekuiwu bo ; di yante aror yampe : Mpe minyi rawont yante iwar a mony kakaka nter ikawiy minyi, rungwa ruey rawo ?

²⁴ Ronki rine ratot mey mene ramamapont ; bitu tshuamayeb bukentshi buante bungwak bua barabara.

²⁵ Yes amaker mey mekra ma buiki ; mpe tshuarak mapunt makima, minyi rukan mikanta mia manta mia buiki keka miamarek bat ba man.