Yoane 20 - Rusang rusek rapunta

¹ Rusu ri matetshir mu nkira, Maria-Mangandala kuwe nyies butu ri marompa, muimin muakawar ; yante amatar imanya rumaweriy kat marompa.

² Ya kuwe a mpang ngwa Simon Petero nto ake ngwa ronki rek rawont Yes, yante kubaror yampe : Banta bumakobr Kumu u marompa, bitu reke tshuayeb irak rungwantshuer ba bo.

³ Petero nto ake ronki rekra kutou, banta kuwe ri marompa.

⁴ Banta kusin mpang bape a mwetshi, di ronki rekra kurek Petero rubang, ya kutawator kwetsh a kwetshi u marompa.

⁵ Yante amaturum, yante amatar biatsh bi maper biawar a sin, yante unyingn bo.

⁶ Di Simon Petero ntshu awirabs ante, nter awitor yante, ya kunying u kate marompa, yante amatar biatsh bi maper, miawar a sin.

⁷ Nto ake iper rasik banta ruk ru ntshue mua Yes kerawara bo, rinta rawa riamet irengene.

⁸ Ronki rina ratawator bukwetshi u marompa, kukanying, ya kutar, yante amayes.

⁹ Isina banta kebatokuok mey mu mukanta mua Ntsampe ampe : Yes yeiumu kuumu u kate minyiu.

¹⁰ Baronki kukakaru banta u bor a banta.

Nter asoruo Yesu ngwa Maria-Mangandala

¹¹ Nter anyemt Maria busuebe u kor marompa, aukureri, nter aukurer yante ya kuturum isina kurent u kate marompa.

¹² Ya kutar bawandjo bape barata maper mayem bawa asin u irak rabes rutoko ra Yes, yona mwetshi u ntshue, yona mwetshi u matampi.

¹³ Banta kunor bampe : Ngat, isin ye ikurer wene ? Yante kubasaks yampe : Isina inkobr banta Kumu ami, minyi rek rayeb irak rungwantshuar banta bo.

¹⁴ Nter atot ya nkos, ya kubarme, ya kutar Yes anyemt, di yante uyeb bo, awar Yes.

¹⁵ Yes kunor yampe : Ngat, isin ye ikurer wene ? Ukusot nake ? Yante akan yampe yona kat awar nker ngun mu irak rine, ya kunor yampe : Kumu, mpe wene amansent swintsh minyi irak kue rangwantshuer wene, minyi rapanab.

¹⁶ Yes kunor yampe : Maria ! Yante kubarme kunor i rutot ri basi Hebreu yampe : Raboni ! mpar a rinta ampe : Kumu !

¹⁷ Yes kunor yampe : Rek ukuimn bo, isina minyi reke ratubentu ngwa Tata bo ; di yaka wamon basi bami, ubaror ampe, minyi rumabentu ngwa Tata nto ake ngwa Iso a binu, ngwa Ntsampe ami, nto ake Ntsampe a binu.

¹⁸ Maria-Magandala kuwasuengs baronki ampe, yante amatar Kumu, yante amanor mey mene.

Nter asoru Yes ngwa baronki bante

¹⁹ Ikokoro ri rusu rina rawa rusu ri matetshir mu nkira, makuik mu irak rawa baronki mawa madipiya, isina awa banta i butete isin basi Yuda, Yes kuwiy kunyemt u nteng a banta, kubaror yampe : Banyit ana !

²⁰ Nter aman yante uror nkos, yante kubasuintsh mayatsh mante nto ake rubampi rante, baronki bawa nto nianko atar ba Kumu.

²¹ Yes kukabaror yampe : Banyit ana ! Nko amatom Tata, a minyi ake rumabitom.

²² Ampis a mey mas, yante kuwepr nsos ruk ra banta, yante kubaror yampe : Rab ana Ntem mua Puinki a Ntsampe.

²³ Bene bu u binu bube rimpa buapadimu ; bene buwa binu reke rims bube, bube bua banta buak rimu bo.

²⁴ Tomas aurak banta Didime mwetsh u kat a bene isanke ibape, keawar nto a banta bo, ntera awiy Yes.

²⁵ Baronki bekra kunor bampe : Bitu tshumatar Kumu. Di yante kubaror yampe : Mpe minyi rek utar bientsh bi tshuronto u mayatsh mante, nto ake mpe minyi reke usik iyatsh rami u kate rubampi rante, minyi rak uyes bo.

²⁶ Matu inana ampis, baronki ba Yes bakawar u kate a mpuru, Tomas awar nto a banta, Yes amawiy, makuik mawa madipiya, Yes kunyemt u nteng a banta yampe : Banyit ana !

²⁷ Yante kuror Tomas yampe : Sempr nemp muawo ane, rent mayatsh mami, ka sempr iyatsh rawo, rusik u kate rubampi rami, rek ukawar ikak bo, di yesa.

²⁸ Tomas kunsaks yampe : Kumu ami ! Ntsampe ami !

²⁹ Yes kunor yampe : Isina imatar wene keka inyes wene. Bina nianko bene bawa rek utara banta bamayes !

³⁰ Yes amakak bisana biekra buso bu baronki bante bia buiki bingwak rek uwar biapunta u kate mukanta mune.

³¹ Di mey mene mungwak mapunta isina keka binu buyes ampe, Yes angwa Kristo, Muan a Ntsampe, keka u kate mayes binu bumon mony u kate rukompua rante.