Yoane 2 - Rusang rusek rapunta

Matompre mi bar u Kana. Isana ri bukwetshi

¹ Matu masat ampis, matompre mibar mawar bora Kana u Garirea ; inyante a Yes awara ona.

² Banta kuur Yes nto ake baronki bante u matompre mibar mana.

³ Nter awint banta mana ma vinyo, inyante a Yes kunor : Banta rek bakamon mana ma vinyo bo.

⁴ Yes kunsaks yampe : Ngat, biye bingwar kat ami nto awo ? Itankua rami rek rato wiy bo.

⁵ Inyant a Yes kuror baker nguna : Mey makima mubiror yante, boker ana.

⁶ Ona mabonko nko mpenta mawar, mabonko masiampr mu mamanya ; batshuer nko nsamp mu ba mu basi Yuda ; u kat ibonko rumwetsh rumwetsh rueri nko makueme ibua.

⁷ Yes kubaror : Yors mabonko mene nto a mas, banta kuyors to ?

⁸ Yes kubaror : Tek ana mas itank rine, wek ana kumu matompr mibar, ba kungwek a manta.

⁹ Nter akik kumu matompr mibar mas maker Yes mawiy mana ma vinyo, ya iyeb bo mpok awiy mas mana, na bat bana baraba mas mana babayeba ; kumu mukang kuur mun ngat.

¹⁰ Kunor yampe : Bat bakima bungwekek mana ma vinyo mamasek buso, ampis mpe batu banyo buiki, keka bukabawek mene mungwa rek busek ampis, di wene unturont mana masek kakaka a kekanko.

¹¹ Isana ri bukwetshi aker Yes bora Kana u Garirea, yante amasor ruton rante, baronki bante kunyes.

¹² Ampis muna, ya kuwe bora Kapernaum nto inyante nto ake bekiyi bante, nto ake baronki bante; banta kubabika matu ma buiki bo.

Nter abing Yes basariy nto ake basomp

¹³ Rusu Rasampa Ntsampe kuwiy kora kor; Yes kuwe ra Yerusarem.

¹⁴ Ya kumon bat kat a mpur a Ntsampe, banta baukusariyi bankwemp, i mameme, i tshukwirp; banta baukusoms biketa, bawar asin.

¹⁵ Nter aker ya nsuinya mu namp muakenke, ya kubabing ruera ba mpur a Ntsampe u tou busuebe, i mameme, i bankwemp ; ya kutshak birok bia bene baukusomsi, ya kupur mes ma banta.

¹⁶ Ya kuror bene baukusariyi tshukwirmp : Wor ana biket bin ane bikima, kat ker ana mpuru a Tata, mpuru ntshi ut impump.

¹⁷ Baronki bante kukan mey mungwak mapunta u kat mukanta mua Ntsampe : Ruwont runen ra mpur awo rungua tshiya tshu mak tump.

¹⁸ Basi Yuda kunor bampe : Yentsh ru na ritshusuintsh wene ukukeri mey mene ?

¹⁹ Yes kubasaks, kubaror yampe : Kar ana mpuru a Ntsampe ine, matu masat minyi rapakaiumun.

²⁰ Basi Yuda kunor bampe : Mpur a Ntsampe ine tshuamaison mabur makuem mane nto mabur masiampr, wene apaison matu masat ?

²¹ Yes atot nkos isin mpuru a Ntsampe ntshi rutok rante.

²² Ampis mpe Yes aumu kat iwa, baronki bante bukan, ya amabaror mey mene, bana buyes mukanta mua Ntsampe, nto ake mey matotok Yes.

²³ Nter awar ya u Yerusarem, rusu ru nkira mu nianko mu Asamp Ntsampe, bat ba buiki bayes rukompua rante, isin atar banta bisana biaker yante.

²⁴ Di Yes uyes mey ma ba bo, isina yante amabayeb ruera ba.

²⁵ Yante kuasot muot unsuengs mey ma bat, isina ya amayeb mey mu mitem mia bat.