Yoane 19 - Rusang rusek rapunta

Nter asik banta Yes pok misuey mia kenke

¹ Pirato amarab Yes amamor misuinya.

² Mayor mamaker pok ntshi a kenke ntshi bukumu, bamasik ruk ru ntshue muante, bamanats misuekiya mia baba.

³ Keka banta bases u kor ante bampe : Mawiya, kumu basi Yuda ; banta bauku mor makas.

⁴ Pirato kukatou ake, kuror basi Yuda yampe : Rent ana, minyi rumawibitshuas ante busuebe, isina keka binu bayeb, minyi rek ramon ruey rube u kat ante bo.

⁵ Yes amatou arata pok ntshi a kenke, nto ake misuekiya mia baba ; Pirato kubaror yampe : Rent Muot !

⁶ Nter amantar bampang bakump banen nto ake tshuparai, banta kubok minoro bampe : Ndjak ruk ru nte muataka ! ndjak ruku ru nte muataka ! Pirato kubaror yampe : Nab ana binu bina a rinta biamet bundjak ruk ru nte muataka ; isina minyi rek ramon ruey rube ukat ante bo.

⁷ Basi Yuda kunsaks bampe : Bitu tshungwak nto ibo rumwetsh, busek yante iwi, nko ngwak ibo, isina inker ya ampe : Muan a Ntsampe.

⁸ Nter aok Pirato rutot ris nkos, yante kureks upak.

⁹ Ya kukanyingin u kat a mpuru inen ntshi a kumu, ya kuror Yes yampe : Wene watou kue ? Di Yes unsaks ruey bo.

¹⁰ Pirato kunor yampe : Wene utot nto ami bo ? Wene reke wayeb, minyi rungwa i bunono buidjak ruk ru nte mu- ataka, nto ake rungwa i bunono buipusura ?

¹¹ Yes kusaks yampe : Wene rek bunono bumwetsh ruk rami, yar uwar yone ntshu a ru rek iwek a bunta ; isina kankos yone ntshu mantampr minyi ungwa wene, ya nker bube bu bunen.

¹² Itankua rina Pirato asot kumpusur ; di basi Yuda kubok minoro bampe : Mpe umpusur wene uka mpai a bora Sesaro bo ; muot ntshu rora ampe : minyi ru kumu, yante muna pis a bora Sesaro.

¹³ Nter aoka Pirato mey mas nkos, ya kuwitshuar Yes u busuebe, yante awar ruk ra nkuas ntshi bupatasampo u irak raurak banta ampe : Mamanya mapong a sin, i rutot ribasi Hebreu, bampe : Gabata.

¹⁴ Mapong mu rusu Rasamp Ntsampe, nter ator itankua rueri itankua musiampr Pirato kuror basi Yuda yampe : Rent ana kumu a binu.

¹⁵ Di banta kuwam bampe : Ngor ! ngor! Ndjok ruk ru nte muataka ! Pirato kubaror yampe : Rudjak kumu a binu ? Bakumu bu bampang bakump kusakr bampe : Bitu rek a kumu yuekr bo, ya yante Sesaro.

¹⁶ Ampis keka ya kubawek ante u biar isina banta bundjak u nte muataka, banta bamarab Yes bamawantshuari.

¹⁷ Yes kusent nte muante muataka, bamawator u irak raur banta ampe : Nguere mu ntshue, i rutot ri basi Hebreu ampe : Golgota.

¹⁸ Bamandjak ruk ru nte muataka ona, nto ake bat bekr bape, yona ona, yona ona, Yes u nteng.

¹⁹ Pirato kupunt mukanta kumusik u ruk runte muataka, apunt ampe : Yes nsi Nazareta, kumu nen ntshu basi Yuda.

²⁰ Basi Yuda ba buiki barenta mukant mune, isina irak rawa Yes ruk ru nte muataka rawar kor a bora ; mukanta muawar muapunta i rutot ri Hebreu, nto rutot ra Greke, nto ake rutot ri Latin.

²¹ Bakumu bu bampang bakump bu basi Yuda kuror Pirato bampe : Kat punt ampe : Kumu basi Yuda bo, di punt ampe, yante aror ampe : Minyi ru kumu basi Yuda.

²² Pirato kusakr yampe : Minyi rumatapunt rine rumpunt minyi.

²³ Mayor nter aman banta udjak Yes ruk ru nte muataka, banta kurab maper mante, banta kukap makapua mane, iyor ikapua, iyor ikapua. Banta kukarab misuekiya miante, dimisuekiya miawara reke nsang bo, ya tente yankere.

²⁴ Banta kuror bampe : Tshuak mikar bo, tshumibok pantsha, mpe nake imiraba, nkos bakokos ruey rawak rapunta ampe : Banta bamakap maper mami, banta bamabok pantsha imisuekiya miami. Nkos aker mayor.

²⁵ Ri inyante nto nsi mua bor inyante, Maria ngar a bora Kreopas, nto ake Maria-Mangandala, banyimt u kora nte mua Yes muataka.

²⁶ Nter atar Yes inyante nto ake ronki rawont yante u kor’ante, yante kuror inyante yampe : Ngat, rent muan awo.

²⁷ Yante kukaror ronki yampe : Rent nyo. Itankua rina ronki ris kunab isina kuwar nto ante u bora ante.

²⁸ Ampis muna Yes amayeb mey makima mumasir isina kukoks mey mawak mapunta u kat mukanta mua Ntsampe ; yante kuror yampe : Minyi rungwa a puesa.

²⁹ Ona ibonko rumwetshi rawar rayora to a “vinaigre” . Mayor kuyors vinaigre yina u kat nteka, keka banta kusik kat a tampa “hisope” , banta kuses u nump muante.

³⁰ Nter nyo Yes mas ma vinaigre nko, yante kuror yampe : Makima mumakok. Yante kutuiriy ntshue, yante kubatu mony.

³¹ Banta bawar nto butete isina toko usar ruk ru nte muataka rusu ru nkira mu basi Yuda, isina rina rawar rusu rupong rusu ru nkira mu basi Yuda, rawak rusu runen, basi Yuda kuromp Pirato isina kubokr mikor mia bene bawa ruk ri mite miataka, keka banta bubakobr.

³² Mayor kuwiy banta kubokor mikor mia yona ntshu bukwetshi, nto ake mia yuekra ntshu awa ruk runte muataka nto ante.

³³ Di nter ases banta u kor a Yes ba kuntar yante amatawa, banta umokor mikor bo.

³⁴ Di iyor rumwetshi kunusur rubampi nto ikonko, makera kutou buash buashi nto ake mas.

³⁵ Yona ntshu atar mey mene amatot bukentshi bua manta, bukentshi buante buawar a barabara, ya amayeb ampe, aror a barabara, isina keka a binu ake buyes.

³⁶ Mey mene mator nkos isina kukokos mey mawak mapunta kat mukanta mua Ntsampe ampe : Nguer muante mwetsh yekumuboku bo.

³⁷ Irak rekra rawak rapunta kate mukanta mua Ntsampe ake ampe : Banta yebupatar yona ntshu arusur banta.

Nter arey banta Yes

³⁸ Ampis muna Yosef nsi Arimatea, awaka ronki ra Yes busuaman, apakar basi Yuda, yante kuromp Pirato mpok ntshi rab rutoko ra Yes ; Pirato kungwek mpok. Yante amawiy kurab rutoko ra Yes.

³⁹ Nikodem ntshu awiya ngwa Yes buso buso i butu, ya amawiy kuwitshuar ake “mire” nto “aroes”, baputur, buruturu rueri ri masanke isanke.

⁴⁰ Banta kurab rutoko ra Yes banta kurusuekiy kate maper nto biket bine bia sor ntshi isek, nko nsamp mu basi Yuda murey bat.

⁴¹ Irak rawa Yes ruk ru nte muataka, yuok rawar ona, u kat a yuok rine marompa ma mwetshi ma roronto mawa ona makautosik muot bo.

⁴² Banta kusik Yes ona isina rusu ri basi Yuda rupong, isina ake marompa mawa kora kora. Nter aumua Yes kat iwa