Yoane 17 - Rusang rusek rapunta

Yes kuromp Ntsampe isin baronki bante

¹ Ampis muna nter amana Yes utot nkos, yante kurent u ruk ya kuror yampe : Tata ! itankua rumawiy ; tonos Muan awo, isin keka Muan awo ikaitonos wene.

² Nko amangwe wene bunono ruk ra toku sikima, keka yante iwek bene bakima bamangwek wene, mony usir bo.

³ Mony usir bo mungwak; banta iyeb, wene Ntsampe mwetsh ntshu a barabara, nto a Yes Kristo ntshu atom wene.

⁴ Minyi ramaitons u ruk ra man, ramaman ngun muamapek wene muker.

⁵ Tata ! kekanko wene tonos minyi u kora awo, wen amet i ruton rawak minyi u kor awo bukwetshi awar man rek utuwar bo.

⁶ Minyi ramayebs bat ba man rukompua rawo, bamapek wene u nteng a bat, banta bawak bawo, wene wamapek a banta, banta bumaront ruey rawo.

⁷ Kekanko banta bamayeb, makima mene mamapek wene matowa ngwa wene.

⁸ Isin minyi ramabawek mey mamapek wene, banta bamamarab ; banta bamayeb a barabara, minyi ratoa ngwa wene, bamayes ampe, wene wamatom minyi.

⁹ Minyi rik rompi isina banta kerikirompi isin bat ba man bo, di isina ka bene bamapek wene, isin banta bungwa bawo.

¹⁰ Biami bikima bingwak biawo, biawo bingwak biami ake, minyi ruton u kat a banta.

¹¹ Minyi rek rakawar u kat a bat ba man bo, di banta bungwar u kat a bat, minyi ruwiy angwa wene. Tata Nsek ! ubaront u kat rukompua rawo bene bamapek wene, isina kek banta buwar mwetshi nko bitu.

¹² Nter awak minyi nto a banta u kat a bat baman, minyi ramabaront u kat rukompua rawo. Minyi raronto ka bene bamapek wene, rek mwetsh ntshu a banta adimu bo, di muan ntshu adimua isin kukoks rine rawak rapunta ukate mukanta mua Ntsampe.

¹³ Kekanko minyi rumawiy ngwa wene, minyi ruror mey mene u kat a bat, isina banta buwar i nianko muami u kat a banta muyemen u kat a banta.

¹⁴ Minyi ramabawek ruey rawo, bat ba man buk baok pis, isin banta rek bawar bat ba man bo, nko minyi rek rawar ntshu a bat bo.

¹⁵ Minyi rek iromp isina kubakobr u kat a bat, di isina kubabants u kat bube.

¹⁶ Banta rek bawar bat ba man bo, nko minyi rek rawar ntshu a bat ba man.

¹⁷ Ubayemps nto a barabara awo ; ruey rawo rungwak ra barabara.

¹⁸ Nko amatom wene u kat a bat ba man, minyi ake ramabatom u kat a bat ba man.

¹⁹ Minyi rumpes minyi amet isina banta, isina keka ba ake buwar bayempuo nto a barabara.

²⁰ Minyi kerik rompi isin ba banta bo, di rik romp ake isina bene yebuyes u kat ami i rutot ra banta.

²¹ Isina keka bakima buwar a mwetshi, nko wene, Tata ! Wene ungwa u kat ami, minyi ake rungwar u kat awo ; isina banta ake buwar a mwetshi u kat a bitu, isina keka bat buyes, wene wamatom.

²² Minyi ramabawek ruton ramapek wene, isin keka banta buwar a mwetsh nko ngwak bitu a mwetsh.

²³ Minyi rungwa u kat a banta, wene ake u kat ami, isin banta buyemen a mwetsh, isin bat buyeb, wene wamatom, wene wamabawont, nko amapont wene.

²⁴ Tata ! minyi rungont bene bamapek wene, buwar nto ami u irak ruwar minyi ake, isin keka banta batar ruton rami, ruton ramapek wene, isina amapont wene bukwetshi bat nto ake man reke utowang bo.

²⁵ Tata Ntshu Nsek ! bat ba manu kebamaiyeb wene bo, di minyi ramaiyeb wene, bene ake bamayeb, wene wamatom minyi.

²⁶ Minyi ramabayebs rukompua rawo, rapak basuintsh a rinta, isin keka nsong muamapont wene muwar u kat a banta, nto a minyi ake ruwar u kat a banta.