Yoane 16 - Rusang rusek rapunta

Yes asuengs baronki ntshoro siwiy kuwiy

¹ Minyi ramabiror mey mene isina binu ubuak bo.

² Banta bupabibing u kat a mpuru si romp ; itankua rumawiya, badjak a binu yebukan bampe : Tshukukeri ngun mua Ntsampe.

³ Yebubiker makima nkos, isina banta uyeb Tata nto ake minyi bo.

⁴ Di minyi ramabiror mey mene, isin nter yeitor itankua risu, keka binu bukan ampe, minyi ramabisuengs. Bu- kwetshi minyi keratubisuengs a manta, isina awak minyi nto a binu.

⁵ Di kekanko minyi ruwe kuwe ngwa tom ami, rek a muot mwetsh u kat a binu mapor ampe : Wene uwe kue ?

⁶ Isina imabiror minyi mey mene, mitem mia binu mimayor a nkebi.

⁷ Minyi rik birori a barabara : mungwa busek bua binu, minyi ruwe, keka isina mpe minyi rawar rek uwe, Nkers yak uwiy ngwa binu bo, mpe minyi rawe, minyi rupabitoms ante.

⁸ Nter iwiy yante, yante ipasuintsh bat ba man, mey mu bube bua banta, nto ake mu busek buami, nto ake ikuaks ra banta.

⁹ Bube bua banta, isina abera ba untshyes minyi.

¹⁰ Busek buami, isina iwe minyi ngwar Tata, binu ukatar minyi bo.

¹¹ Ikuak, isina kumu a bat ba man amakuak.

¹² Minyi runkawar a mey mekra ma buiki mubiror, di binu uyeb umaok bo.

¹³ Di nter iwiy Puinki a barabara, ya ipabitshuar u kat a barabara ikima ; isina ya keitot isina yante yamet bo, di ya iror makima maok yante, ya ipabisuengs mey yemuwiy.

¹⁴ Yante ipatons minyi, isina irab ya mey mami, ya ibisuengs a manta.

¹⁵ Bikima bingwak bia Tata bingwak biami ake, isin kankos imabiror minyi ampe, ya irab mey mami ipabisuengs a manta.

Yes amabasuengs mey mu iwa rante

¹⁶ Itankua kakek binu bakekatar minyi bo, ampis itankua kakek keka binu bapakatar isina iwe minyi ngwa Tata.

¹⁷ Baronki bante bekr kurors ba banta bamet bampe : Mey mene nkos mpuenyi imatshuror ya ampe : Itankua kakek binu bakakatar minyi bo, ampis itankua kakek ake keka binu bapakatar minyi, nto ake ampe : Isina iwe minyi ngwa Tata ?

¹⁸ Banta kutot bampe : Mene mey ma nake ampe : Itankua kakek ? Bitu rek tshuayeb mey mukutot ya bo.

¹⁹ Nter ayeb Yes ampe, banta bangan kungoror, ya kubaror yampe : Binu bukoworors binu a binu isina mey mumabiror minyi ampe : Itankua kakek binu bakukatar minyi bo, ampis itankua kakek ake keka binu bapakatar minyi.

²⁰ Barabara, barabara, minyi rik birori, binu burer kurer a biesur, bukan kukan, bat ba man, buniang kuniang, di binu buwar a nkebi di nkebi a binu ipabanam nianko.

²¹ Ngat nter imotok yante angwak a ntshoro, isina itankua rante rumawiy ; di nter ibot yante muan, yante keankakukan ntshoro siante bo, isina nianko mua muan amatou u kat a bat.

²² Nkos binu ake kekanko bungwar kat a nkebi, di minyi rukakubitar, ntem mua binu mupaniang, rek a muot uyeb ubitampr nianko mua binu.

²³ Rusu ris binu yekubuporor ruey bo. Barabara, barabara, minyi rik birori, bikima birompo binu Tata i rukompua rami, yante ipabiwek a binta.

²⁴ Kakaka a kekanko binu kebaromp iket i rukompua rami bo ; romp ana binu aparab, isina keka nianko mua binu mureks.

²⁵ Minyi rumabiror mey mene kat mikonta ; di itankua rumawiy, minyi kerukatot a binu nto mikonta bo, di minyi rupabiror ruey ra Tata irengene irengene.

²⁶ Rusu ris binu buparomp i rukompua rami, minyi rek ribiror ampe, minyi ruparomp Tata isin binu.

²⁷ Isin Tata yamet amabiwont, isina amapont binu minyi, nto ake ayes binu minyi ratoa ngwa Tata.

²⁸ Minyi ratoa ngwa Tata, ramawiy u kat a bat ba man, kekanko minyi rumakobu u kat a bat, isina kuwe ngwa Tata.

²⁹ Baronki bante kunor bampe : Kekanko wene umatot iren- gene irengene, wene ukabok nkonta bo.

³⁰ Kekanko bitu tshumatar wene wamayeb mey makima, wene rek a ruey isina muot uiworor; isin kankos inyes bitu ampe, Wene watoa ngwa Ntsampe.

³¹ Yes kubasaks yampe : Bumayes kekanko ?

³² Rent, itankua rumawiy, rinta ramawiy, binu bupantshr kupantshr muot muot a mpok ante, binu busampompr minyi amet ; di minyi rek rawara miamet bo, isina Tata angwa nto ami.

³³ Minyi ramabiror mey mene isin binu bunyit u kat ami. Binu yebumon ntshoro kat a bat ba man, nangat ana, minyi ramarek bat ba man bukobu.