Yoane 15 - Rusang rusek rapunta

Yes isin ru namp mu nte

¹ Minyi ru isin ru namp mua barabara muantompa sia vinyo, Tata angwak nonto a munta.

² Tampa siami sikima si wara rek utsho ntomp bo, yante ikes keka tampa ikima ntshi itsho ntompa, yante itotor sues isina yinta itshui ntompa sekra.

³ Kekanko binu bumayempu isina ruey ramabisuengs minyi.

⁴ War ana u kat ami, minyi ake rapawar u kat abinu. Nko tampa yinta uyeb utsho ntompa yamet bo, mpe yinta unamt nto isina ru namp bo, nkos binu ake bakeyeb utsho mpe binu unamt nto ami bo.

⁵ Minyi rungwa ru isin ru namp, binu bungwak tampa. Ntshu uwar u kat ami, ntshu wara minyi ake u kat ante, ya itshu ntompa sia buiki ; mpe bapamps nto ami binu bak yeb uker iket bo.

⁶ Mpe muot awar rek uwar u kat ami, yebumpis busuebe nko tampa ; ya iom, keka banta bitori, bibok u tshiya, inamat.

⁷ Mpe bawara u kat ami, mey mami ake mpe mawar u kat a binu, romp ana bikima biwont binu, bapabirab.

⁸ Mpe batsho ntompa sia buiki, keka Tata aton, keka binu buwar baronki bami.

⁹ Nko amapont Tata, minyi ake ramabiwont ; war ana u kate nsong ruwont rami.

¹⁰ Mpe binu baront bikin biami, binu bupawar kat nsong muami, nko aronto minyi bikin bia Tata, minyi rungwa kat nsong muante.

¹¹ Minyi rumabiror mey mene, isina nianko muami muwar u kat a binu keka nianko mua binu murek.

¹² Ikin rami ri rine, binu buwonts binu a binu, nko ama-biwont minyi.

¹³ Rek a muot ngwa i nsong munene muareka yone ntshu uwus bampayi bante.

¹⁴ Binu bu bampai bami, mpe binu baker nko amabiror minyi.

Yes awar mpai ntshu baronki

¹⁵ Minyi rak biur baker ngun, isina baker ngun keanyebak mey munkerk kumu ante; di minyi rumabiur bampai isina amabiyeb minyi, mey makima maok minyi ngwa Tata.

¹⁶ Ka binu bamasor minyi bo, di minyi ramabisor, ramabitom isina binu buwe butshu ntompa, keka ntompa a binu iwar sera sera ; isina makima muromp binu Tata i rukompua rami, apabiweke.

¹⁷ Mey mumabiror minyi, isin binu buwonts binu a binu.

¹⁸ Mpe bat ba man bubiok pis, bayeb ana ampe, banta batapok minyi pis buso bua binu.

¹⁹ Mpe binu baruwar bat ba man, bat ba man barak biwont; di isina binu rek bawar bat ba man, minyi ramabisor u nteng a bat, isina kankos bat ba man bu biwok pis.

²⁰ Kana ana ruey ramabiror minyi ampe ; nker ngun keane- kak kumu ante bunen. Amampons ba ntshoro, bukaka- sabimons a binu ake ntshoro ; mpe banta baruronto ruey rami, banta barak saront ra binu.

²¹ Di banta bubiker mey mas makima isina rukompua rami, isina banta uyeb yone ntshu amatom minyi bo.

²² Mpe minyi raruwar rek uwiy, mpe raruwar rek basuengs mey, keka rek bawar i bube bo ; di kekanko banta rek irims ri bube bua banta bo.

²³ Ntshu pok minyi pis, angok ake Tata.

²⁴ Di mpe minyi raruwar, reke uker mingun u nteng a banta miawar muot mwetshi yuek rek uker, keka rek bawar i bube bo ; di kekanko banta bumatar, ba bumapok minyi pis nto ake Tata.

²⁵ Di mey mene mawiy isina kukoks ruey rungwak rapunta u kat ibo ra banta ampe : Bumapok pis?

²⁶ Di nter yeiwiy Nkers, ntshu yeibitoms minyi ngwa Tata, awar Puinki a barabara, yante iwiy ngwa Tata, yante ipatot bungont buami.

²⁷ A binu ake butot bungont buami isina awara binu nto ami bukwetshi. 16