Yoane 14 - Rusang rusek rapunta

Yes awek baronki bante inyitis

¹ Mitem mia binu upak bo, yes ana Ntsampe, bunkan- tshyes ake minyi.

² Marak ma buiki mungwar u mpur a Tata ; mpe mey mene uwar nkos bo, keka rumabisuengs, minyi ruwe kuwe isina kuwabipongos irak.

³ Nter yeiwe minyi, nter yeibipongos minyi irak, minyi rupakawiy, minyi yerupabirab nto ami, isina irak ye- ruwar minyi, binu ake buwar.

⁴ Binu bumayeb irak ruwe minyi, binu bumayeb mpok.

⁵ Tomas kunor yampe : Kumu ! bitu reke tshuayeb irak ruwe wene ; a bitu tshuyeb mpok mpuenyi ake ?

⁶ Yes kunor yampe : Minyi ru mpok, ru barabara, nto a mony ; muot rek uwiy ngwa Tata, mpe ya rek utowiy ngwa minyi bo.

⁷ Mpe bumantshyeb minyi, binu bumayeb Tata ake ; kekanko binu bumanyeb, binu bumantar.

⁸ Firipo kunor yampe : Kumu ! tshusuintshi Tata, keka rayerm a bitu.

⁹ Yes kunsaks yampe : Minyi rumabik nto a binu, wene kewatotshuyeb Firipo? Ntshu imatar minyi, amatar ake Tata. Mpuenyi ake inora wene ampe : Tshusuintsh Tata ?

¹⁰ Wene rek wayes ampe minyi rungwar kat a Tata, nto ake Tata angwar u kat ami ? Mey mumak biror minyi kerumak maror ma minyi amet bo ; Tata angwak u kat ami ya nkerk mayemp.

¹¹ Ntshyes ana minyi, minyi rungwa kat a Tata, nto ake Tata u kat ami, bayes ana isina mayemp mene.

¹² Barabara, barabara, minyi rik birori : Ntshu ntshyes minyi, apaker mayemp ake nko inkerk minyi, yante ipaker mareka, isina minyi ruwe ngwa Tata.

¹³ Ruey rukim ruromp binu Tata i rukompua rami, minyi ruparuker, isina keka Tata iton kat a Muan.

¹⁴ Mpe baromp iket i rukompua rami, minyi raparuker.

¹⁵ Mpe bumapont minyi, yere ana bikin biami.

¹⁶ Minyi ruparomp Tata, yante ipabiwek Nkers yuekra, isina yante iwar nto a binu sera sera.

¹⁷ Puinki a Ntsampe a barabara, bat ba man uyeb unab bo, isina banta untar bo, unyeb akebo, di binu bunyeb yante isina iwa yante nto a binu, yeiwar kat a binu.

¹⁸ Minyi rak sabibompr bitiki bo, minyi rapawiy kat a binu.

¹⁹ Itankua kakek bat ba man bak katar minyi bo ; di binu bapatar minyi ; isina ingwa minyi a mony, binu ake bukak war a mony.

²⁰ Rusu risu binu bupayeb minyi rungwak kat a Tata, binu ake u kat ami, minyi ake u kat a binu.

²¹ Ntshu ngwar i bikin biami mak biront, ya yos mapont ; ntshu upont minyi, Tata apakangont yante, minyi rupangont, minyi rupanyeb.

²² Yuda ka Iskariot bo, kunor yampe : Kumu ! mpuenyi ake itshuyeb wene bitu, di ngwa bat ba man bo ?

²³ Yes kunsaks yampe : Mpe muot apont minyi, yante aparont mey mami, Tata apangonta; bitu tshupawiy ngwa yante, tshuker irak ruwar u kat ante.

²⁴ Ntshu wa rek upont minyi, yak ront ake mey mami bo. Ruey rik oki binu rek rawar rami bo, di ra bora Tata ntshu amatom minyi.

²⁵ Minyi rik birori mey mene isina ingwa minyi nto a binu.

²⁶ Di Nkers ntshu ngwaka Ntem mua Puinki a Ntsampe ntshu yetom Tata i rukompua rami, ipabisuengs mey makima, nto ake yante ipabikanans mey makima mumabisuengs minyi.

²⁷ Minyi rusabibombs inyitis, minyi ribiwek inyitis rami, minyi rak biwek nko ingwekeke bat. Mitem mia binu umon ntshoro bo, upak bo.

²⁸ Binu bamaok minyi rumabiror ampe : Minyi ruwe kuwe, minyi rapakawiy ngwa binu. Mpe binu bamapont, keka binu bumaniang isina iwe minyi ngwa Tata ; isina Tata amantek minyi.

²⁹ Minyi rik birori mey mene kekanko buso ingwa manta rek ututor, isin nter yeitor manta, keka binu buyes.

³⁰ Minyi rak ka biror mey ma buik bo, isina kumu a bat ba man mene amawiy, ya rek a ruey u kat ami bo.

³¹ Di isina keka bat ba man bayeb ampe minyi ramawont Tata, minyi runker bikin biamapek Tata. Katu ana, tshuawe.