Yoane 13 - Rusang rusek rapunta

¹ Buso bu nianko mu rusu Rasamp Ntsampe, Yes kuyeb ampe, itankua rante ramator rukobu u kat a bat ba man, isina kuwe ra bor Isante, yante amawont bat bante ba man, amabawont kakaka u tunt.

² Ampis nter aman banta bisima bikokoro, Satan kunyingns mey u kate ntem mua Yuda Iskariot, muan a bora Simon isina kusariy Yes.

³ Yes amayeb Isante amangwek biket bikima u biar biante, yante atoa ngwar Ntsampe, ya ikakaru ngwa Ntsampe.

⁴ Nter aukudji banta, ya kukatu u mes u iyinta, ya kuwor misuekiya miante, ya kurab itampar ya kururat.

⁵ Ampis ya kusik mas u kate a somp, ya kutetshiy uwebs matampi mu baronki bante, yante kukamanumun nto itampar rarat yante.

⁶ Ya kuwiy ngwa Simon Petero, Simon Petero kunor yampe : Ye, Kumu ! Wene upueb minyi matampi ?

⁷ Yes kunsaks yampe : Wene wakuyeb mey muk biker minyi kekanko bo, di wene wapasamayeb ampis.

⁸ Petero kunor yampe : Bo, Kumu ! Wene wakuwebs matampi mami bo, Yes kunor yampe : Mpe rawa rek iwebs wene wakuwar ikapua nto ami bo.

⁹ Simon Petero kunor yampe : Kumu ! rek upuebs na matampi mami bo, upuebs i mayatsh, i ntshue ake.

¹⁰ Yes kunor yampe : Ntshu uwok matampi mumayenem i matampi ; di yante apayempu rutoko rukima, binu bamayempu, di reke bawar nkos ruera binu bakim bo.

¹¹ Isina ya amatayeb ntshu awak nsariy ante, isina kankos aror ya ampe : Binu bakima rek bawar bayemp bo.

¹² Nter aman yante ubawebs matampi, ya kukarab misuekiya miante, ya kukawar u mes nto a banta kubaror yampe : Bumayeb mey mene mumabiker minyi ?

¹³ Binu bapur ana, Ronki, nto ake Kumu, batot ana busek isina minyi ru yante.

¹⁴ Mpe minyi Kumu nto ake Ronki rumabiwebs matampi ma binu, busek binu ake bukuwebs matampi bana bam- wetshi bekra ba binu.

¹⁵ Isin minyi ramabiwek ipua isin binu buker nko amabiker minyi binu.

¹⁶ Barabara, barabara, minyi rik birori, nker ngun keanekak kumu ante bo, mpe Apotre keanekak ntshu makuntom bo.

¹⁷ Mpe binu bayeb mey mene binu bungwa bina nianko mpe bumaront.

¹⁸ Minyi rek ribiror ruera binu bakim bo, isina minyi ramayeb bene basor minyi, di mey mene muwiya isin kukoks mey maror mukanta mua Ntsampe ampe : Ntshu ndjik kat nto ami insanginy itinti u mpungun ami.

¹⁹ Minyi ribiror kekanko buso ingwar ruey rek ututor, isina keka nter itor rinta keka binu buyeb, minyi ru yante.

²⁰ Barabara, barabara, minyi rik birori, muot ntshu raba yone yetoma minyi, amantab minyi, ntshuntab minyi ake anab ntoma ami.

Nter aten Yes nsariy ante

²¹ Nter aman Yes uror nkos, ntem muante kunyisr, yante kutot irengene irengene yampe : Barabara, barabara, minyi rik birori, mwetsh u kat a binu isariy kusariy minyi.

²² Baronki baukurentsi bamet usik pantshi umitem mia banta ampe, ya ik ror nake ?

²³ Ronki rumwetsh ntshu awont Yes abesa u tor a Yes.

²⁴ Simon Petero kunsuengen isin kungor ampe, nake ntshu ikiteni yante.

²⁵ Yante isina awar yante u tor a Yes, ya kungor yampe : Kumu ! nake ?

²⁶ Yes kunsaks yampe : Angwa yante ntshuwek minyi nyimu mua kat mu sasr. Yante kate nyimu mua kat nkos, keka yante kuwek Yuda Iskariot muan a bora Simon.

²⁷ Ampis nter amangwe yante nyimu muna, Satan kunyingin u ntem muante. Yes kunor yampe : Ker buasi buasi ruey rungan wene.

²⁸ A muot mwetshi kat a bene bawar u mes uyeb bo isin ye amanor yante nkos.

²⁹ Isina Yuda awar nont a kuempe, bana bamwetsh bakan bampe : Yes amanor, kusomp biket biawara banta isot rusu ru nianko, mpe kuwek tshumpua iket.

³⁰ Nter arab Yuda nyimu muna, yante kuto busuebe buas buasi. Butu buamapit.

³¹ Nter ato Yuda, Yes kutot yampe : Kekanko Muan a Muot amaton, Ntsampe amaton ukate ante.

³² Mpe Ntsampe amaton nto ante, Ntsampe ake apakantons yamet, yante ansot ntonos.

³³ Bana bami bakeke, minyi ruwar a binu itankua kakek, binu busak sot minyi, nko aror minyi basi Yuda ampe, binu bak yeb uwiy u irak ruwe minyi, rubiror binu ake kekanko.

³⁴ Minyi rumabiwek ikin rumwetsh ra roronto, isina binu buwont ake bekra ba binu, nko amabiwont minyi, binu bukawonts binu a binu.

³⁵ Isina mey mene keka bat bakima bayeb ampe, binu bungwak baronki bami mpe binu ba wonts binu a binu.

³⁶ Simon Petero kunor yampe : Kumu ! wene uwe kue ? Yes kunsaks yampe : Wene wakeyeb urabs ami kekanko irako ruwe minyi bo ; wene uparabs ami ampis.

³⁷ Petero kunor yampe : Kumu ! Isin ye iwar minyi rek uyeb urabs awo kekanko ? Minyi rapaiwus.

³⁸ Yes kunsaks yampe : Wene wak pus minyi ! Barabara, barabara, minyi rik irori, buso koko utubek bo, wene umper kumper mpeer isat.