Yoane 12 - Rusang rusek rapunta

Nter asing Maria mikor mia Yes sari a bonko

¹ Matu masiampr buso bu rusu ru nkira mu Asamp Ntsampe, Yes kuwiy u Betania irak rawak Lazaro nyiu muaumun ya u kat iwa.

² Ona bamanamps bisima bikokoro, Marta aukubakersi, di Lazaro awar nto a bene bawar nto ante u mes u yinta ri bisima.

³ Maria kurab ireng ra rari a bonko, mu mant munono, mu masek mu inang, ya kusing matampi ma Yes, kukanumun nto a punyu siante si ntshue, di sor kuyor to, u kat a mpuru.

⁴ Mwetshi ntshu baronk bante Yuda Iskariot ntshuawar nsariy ante, ya kuror yampe :

⁵ Isin ye ba usariy bonk bune nto birok masanke makuem masat isina kuwek tshumpua a sinta ?

⁶ Ya kuatot mey mas isin tshumpua bo, di isina ya awar muempo, awar nont a kuempe ntshi atshuerk ba birok.

⁷ Di Yes kunor yampe : Mompr iker ya iront sari a bonko isin rusu rumareir mami.

⁸ Isin binu buwar i tshumpua matankua makima, di binu bak war ami matankua makim.

⁹ Basi Yuda ba buiki nter aoka ba ampe, Yes angwa ona, ba kuwiy, ba kebawiya isin na Yes bo, di isin kutar Lazaro ntshu aumun yante kat iwa.

¹⁰ Bakumu bu bampank bakump bawont kukadjak Lazaro.

¹¹ Isin basi Yuda ba buiki bamakobu, uyes Yes isina mey mu Lazaro.

Yes anyingin u Yerusarem nto ruton

¹² Nyies muna bat ba buiki bawiy rusu ru nianko, nter aok ba ampe, Yes iwiy kuwiy ra Yerusalem.

¹³ Ba kurab mang ma sampa, kuto isina kuamwens nto ante, ba bamabok minor bampe : Hosana ! Ntshu awiya i rukompua ra Kumu, Kumu basi Israer angwar i nianko.

¹⁴ Yes amon ya muan kabaro, ya kunyangm ruk rante, nko mene mungwak mapunt ampe :

¹⁵ Muan ngat ntshu a Sion, rek upak bo, rent, Kumu awo amawiy ruk ra muan kabaro.

¹⁶ Baronk bante uok mey mene buso bo, di nter atonos Yes, keka banta kukan mey mene mawak mapunta isina yante, manta mamamuir.

¹⁷ Bat bawar nto ante nter aur yante Lazaro kat marompa, nter amangumn yante kat minyiu, bawar binkongot biante.

¹⁸ Isin kankos awe bat buso buante, isin aok banta aker ya isana rine.

¹⁹ Bafarisai kutot ba banta bampe : Rent ana burab biye ; Bat bakima bumarabs ampis ante.

Basi Greke bawont kutar Yes

²⁰ Basi Greke bamwetsh bawar u kat a bene bawiy bentui isin kuwiromp Ntsampe rusu ru nianko.

²¹ Ba kuwiy ngwa Firipo nsi Betsaida kat a sin a Garirea, ba kunor bampe : Kumu, bitu tshungont kuntor Yes.

²² Firipo kuwiy kusuengs Andere, Andere nto Firipo kuwa- suengs Yes.

²³ Yes kubaror yampe : Itankua rumawiy, Muan a Muot iton kuton.

²⁴ Barabara, barabara, minyi rik birori, mpe ru nker ra “blé” rawar rek uwa nter irupis banta kat a man, rinta ruwar ri amet, di mpe rawa, rinta rutshui ntompa sekra sia buiki.

²⁵ Ntshu uwont mony muante ikak mudimis, ntshu uber uwont mony muante u kat a bat bene, ya ipawar a munta isin mony usir bo.

²⁶ Mpe muot akers minyi ngun, ya irabs ami irak yeruwar minyi, nker ngun muami yeiwar kuwar ake ; mpe muot akers minyi ngun, Tata apampuiminy.

²⁷ Kekanko ntem muami mukunyisiri, rutot mpuenyi ? Tata, mpants minyi itankua rine, di isina kankos awiy minyi itankua rine.

²⁸ Tata ! Tonos rukompua rawo. Rutot kutou u ruk kutot ampe : Minyi rumarutons rapakarutons ake.

²⁹ Tong a bat awara ona, baok rutot rine, kutot bampe : Ikum ra mpur runkuma, bekra bampe : Wandjo ntot nto ante.

³⁰ Yes kuror yampe : Rutot risu rek rawiy isina minyi bo, di rungwiy isin binu.

³¹ Ikuak ra bat ba man mene rumawiy kekanko busot bing kumu a man mene kekanko.

³² Nto ake minyi nter yeiumu minyi u kat a man, minyi yerupanan bat bakim nto ami.

³³ Ya atota nkos isin kebayeb iwa yeruwa yante.

³⁴ Bat kunsaks bampe : Bitu tshuamaok u kat ibo ra Ntsampe, Kristo yeiwar sera sera ; isin ye inor wene ampe, Muan a Muot bumentes? Muan a Muot yos angwar nake ?

³⁵ Yes kubaror yampe : Muer mukawar a binu isin itankua kakek, sampa ana nter ingwar binu a muer, isina muimin yar mubiwat ; isina ntshu sampa u kat a muimin keanyebak mpok ingwe yante.

³⁶ Nter ingwar binu a muer, yes ana muer, mene, ya kuwe, ya, yesa ana muer, isina keka binu bawar bana ba muer. Nter aror Yes mey mene, ya kuwe ya kuwaba- suaman.

³⁷ Yante amaker bisana bia buiki u mis ma banta, ba unyes ya bo.

³⁸ Keka mey matot profete Isay mamakok ampe : Kumu ! nake ayesa rutot ra bitu, rou ra Kumu rasoru ngwa nake ?

³⁹ Banta bakeyeb uyes bo isina Isay amakatot ampe :

⁴⁰ Yante amabamp mis ma ba, amanangs mitem mia banta, nkos mis ma banta utarar bo, mitem mia banta uok bo, banta bak sekuo bo, mpe minyi rek babers.

⁴¹ Isay atot mey mene isina atar yante ruton rante, keka atot ya mey mante.

⁴² Bat banene bamanyes, di banta utot ankon bo, bapakr Bafarisai yar bubabing u mpuru ntshi romp.

⁴³ Isin areb ba uwont ruton ra bat urek ra Ntsampe.

⁴⁴ Yes kuwam ankon yampe : Muot ntshu ntshyes minyi, keintshyesak minyi a minyi bo, di yante iyes yone ntshu amatom minyi,

⁴⁵ Ntshu tar minyi, itar yone ntshu amatom minyi.

⁴⁶ Minyi ramawiy u kat a bat nko muer, isin keka ntshu ntshyes minyi, yak kawar kat a muimin bo.

⁴⁷ Mpe muot aoka rutot rami, aber uront, minyi rak ntentes bo isin minyi kerawiy isina kutentes bat ba man bo, di isin kubants bat ba man.

⁴⁸ Ntshu mper minyi, iber ake ruey rami, angwar i butente buante; mey masuengen minyi manta yemuntents rusu ri buso.

⁴⁹ Isina minyi keratot isin miamet bo, di Tata ntshu amatom minyi, yante amapek meye yemutot minyi nto ake yemu- suengen minyi.

⁵⁰ Minyi rumayeb ikin rante rungwak mony usir bo. Mey munor minyi, runtot nko amasuengs Tata a manta. Nter awebes Yes mikor mi baronki bante