Yoane 11 - Rusang rusek rapunta

Nter aumua Lazaro kat iwa

¹ Muot mwetsh awar i buwar, rukompua rante Lazaro, nsi Betania, bor a Maria nto ake Marta bapank bante.

² Maria mene ntshu asing Kumu bonko, akanumun matampi mante nto a punyu siante ; Lazaro ntshu awar i buwar, awar pank ante.

³ Bapank bante bu bawat kutom ruey ngwa Yes bampe : Kumu ! yone ntshu awont wene angwa i buwar.

⁴ Nter aoka Yes mey mas, ya kutot yampe : Bus rek buawar buwar buwa bo, bungwa isin ruton ra Ntsampe, keka Muan a Ntsampe iton.

⁵ Yes awont Marta nto ake muan inyante, nto ake Lazaro.

⁶ Nter aok ya ampe ya angwa i buwar, ya kukawar ona matu mape.

⁷ Ampis ya kuror baronk bante yampe : Tshue ana, tshuakaru ra Yudea.

⁸ Baronk kunor bampe : Kumu ! basi Yuda bunkusot ikuet mamanya, kekanko wene ukangan kuwe ona ?

⁹ Yes kusakr : Itankua kerungwak matankua isanke imape u kat rusu ? Mpe muot asamp nto a muanyi, yante yak buak bo, isina yante ikutar muer mua bat ba man.

¹⁰ Di mpe muot asamp i butu, ya ibuak, isin ya rek a muer bo.

¹¹ Nter atot ya mey mene nko, ya kubaror yampe : Mpai a bitu Lazaro ames, di minyi ruwe kuwe isina kuwa ngumun.

¹² Baronki bante kunor bampe : Kumu ! mpe ya amakubes, ya apaberu.

¹³ Yes aukuror iwa ra bora Lazaro, di banta baukukan ya aukutot mey mu ntshuentshi mua barabara.

¹⁴ Yes kubaror irengene irengene yampe : Lazaro amawa.

¹⁵ Minyi rikuniang isin binu, isin minyi uwar ona bo, di isin keka binu bayes. Tshue ana ngwa ya.

¹⁶ Tomas aurk banta Didime kuror baronki bekr yampe : Tshue ana a bitu ake, isina kuwa nto ante.

¹⁷ Nter awitor Yes, atumon Lazaro u kate marompa matu mane.

¹⁸ Betania awar kora kor a Yerusarem rueri (stade) isanke ibatanu.

¹⁹ Basi Yuda ba buiki bawiya isin kuwitan Marta nto a Maria isina pank a banta awu yante.

²⁰ Nter aoka Marta ampe : Yes iwiwiyi, ya kuwe buso buante, di Maria asasar asin u mpuru.

²¹ Marta kuror Yes yampe : Kumu ! Mpe wene warak war ane, pank ami kuyar uwa bo.

²² Di minyi rumayeb kekanko ampe ; makima muromp wene Ntsampe, Ntsampe apaiwek.

²³ Yes kunor yampe : Pank awo apakaumu kat iwa.

²⁴ Marta kunsaks yampe : Minyi rumayeb yante ipaumu rusu yeruumu minyiu rusu ri buso.

²⁵ Yes kunor yampe : Minyi rungwar rungumun nto a mony, ntshu ntshyes minyi iwar a mony nter iwa yante ake.

²⁶ Ntshu ngwar a mony, mpe antshyes minyi, yekuiwa sera sera bo. Wene umayes nkoso ?

²⁷ Yante kunor yampe : E, Kumu ! Rumayes wene u Kristo, Muan a Ntsampe, ntshu yeuwiy u kat a bat ba man.

²⁸ Nter amanor ya nkos, ya kuwe uwaur muan inyante Maria busuamn, kunor yampe : Kumu angwa ane, ya ikiuri.

²⁹ Nter aok ya ruey risu, ya kukatu buas buasi kuwe ngwa Yes.

³⁰ Isin Yes keatunyingin u bora bo, yante keakobu irak ramwens Marta nto ante.

³¹ Basi Yuda bawar nto a Maria bawintan, ntera amantar banta akatu ya uto buas buasi, banta kurabs nto ante baukukan bampe : Ya iwe ri marompa isin kuwarer ona.

³² Nter ator Maria u irak rawar Yes, nter amantar yante, ya kubuak a sin u matampi mante, ya kunor yampe : Kumu ! Mpe wene wawar ane pank ami kuyar uwa bo.

³³ Nter amantar Yes arer ya, nto basi Yuda bawar nto ante ake kurer, yante kumon nkebi kat ntem muante, yante kurit.

³⁴ Yante kuror yampe : Bamaney kue ? Banta kunsaks bampe : Kumu ! Wiya, wimon.

³⁵ Yes kurer.

³⁶ Basi Yuda kutot bampe : Rent ana nko amangont yante.

³⁷ Bana bamwetsh u kat a banta kutot bampe : Ya adipr mis ma bin a mis mabama, ya rek ayeb uber iwa uwat muot nywe ?

³⁸ Yes kukamon nkebi, ya kurit, ya kuwiy ri marompa, marompa mawar kata por imanya, barita imanya buso.

³⁹ Yes kuror yampe : Wor ana imanya, Marta panke a bor nyiu kunor yampe : Kumu ! ya amapont isina ya amabik matu mane ane.

⁴⁰ Yes kunor yampe : Minyi rek riror ampe : Mpe wene wayes, wapatar ruton ra Ntsampe?

⁴¹ Ba kuwor imanya rawa u mper irak rabes nyiu, Yes kurent mis u ruku yampe : Tata ! Minyi rikiweki misanka isina wene umaok rutot rami.

⁴² Minyi rumayeb wene umpak pok minyi matankua makima, di minyi runtot nko, isina bat bene bunyemt ane bumantong keka bayes, wene wamatom.

⁴³ Nter aman ya utot nkos ya kuwam ankono yampe : Lazaro, toa.

⁴⁴ Nyiu kuto, biyer nto ake matampi makanta nto iper, buso buante ake buawar buarar iper. Yes kubaror yampe : Mpusur ana, bumompr iwe.

⁴⁵ Basi Yuda ba buiki bawiya ngwa Maria, batar mey maker Yes, ba kunyes.

⁴⁶ Di bamwetsh u kat a banta kuwe ngwa Bafarisai kuwa- basuengs mey maker Yes makima.

Bafarisai kubuak kuk ntshi djak Yes

⁴⁷ Bampank bakump banen nto ake Bafarisai kubwak kuk bampe : Bitu tshuker mpuenyi ? Isin muot nywe ikukeri bisana bia buiki.

⁴⁸ Mpe bitu tshumompor nkona, bat bakima bunyes kunyes ; basi Rome buwiy kuwiy upants bor a bitu nto ake sin a bitu.

⁴⁹ Di mwetsh kat a banta, rukompua rante Kaifa, awar kumu bampank bakump ntshu nene ibur rina, ya kubaror yampe : Binu rek bayeb mey bo.

⁵⁰ Binu ukan bo, busek muot mwetsh iwa isina bat bakima, sin ikima uwa bo.

⁵¹ Di ya kuaror nkos isina ya yamet bo, isina ya awar kumu bampank bakump ntshu nene ibur rina, ya atot mey makutowiy, Yes yeiwa isin sin.

⁵² Ya keawa isina sin imwetsh bo, isina kukuekiy ban ba Ntsampe bakima bamuangn nko rutoko rumwetsh.

⁵³ Rusu rina banta bamakueriy mey isin kundjak.

⁵⁴ Isin mey mene Yes ukatou irengene irengene kat basi Yuda bo, ya kukatu kuwe ra sin awar a kora kor u busuebe bu ibuings u kat abor bumwetsh rukompua ra bunta Efraim, ya awar na nto baronki bante.

⁵⁵ Rusu ru nianko nkira mu Asamp Ntsampe mu basi Yuda muawar kora kor, bat ba buiki bamakatu u sin a banta, bamabentu ra Yerusarem buso bu rusu Rasampa Ntsampe isin kuyemps mitem mia ba.

⁵⁶ Ba baukusot Yes, ba baukutot ba ba awar ba u mpuru a Ntsampe bampe : Binu bukukan mpuenyi ? Yante yak wiy rusu ru nianko mun mpe ?

⁵⁷ Bampank bakump banen nto ake Bafarisai bamatey ibo bampe : Mpe muot amayeb irak rungwa yante isuengen, isin keka ba buwangwat.