Yoane 10 - Rusang rusek rapunta

Yes angwar mpake nsek

¹ Barabara, barabara, minyi rik birori, muot ntshu wara rek unyingin u mper u kat a mpuru mameme, di ya ibant u irak rekra, ya angwak muempo, muot me.

² Di ya ntshu nyingn u mper angwa mpake ntshu mame-me.

³ Mpake ntshu ikuik imarips ya, mameme ake muok rutot rante, ya iur mameme mante, kompua sia manta, ya imatuey u busuebe ruera manta makima.

⁴ Nter aman ya umatuey, ya ikitr u buso bua manta, keka mameme murabs ante, isin ayeb manta rutot rante.

⁵ Di manta urabs nto a mueyampang bo, manta muntin, isina manta uyeb rutot ra beyampang bo.

⁶ Yes amabaror nkonta mune, di banta uok bo mey mama- baror yante.

⁷ Yes kukabaror yampe : Barabara, barabara, minyi rik birori, minyi rungwa ru mper ntshi mameme.

⁸ Bene bakima bungwik buso buami bungwak biempo, bat babe, di mameme mak uok rutot ra ba bo.

⁹ Minyi rungwak ru mper, muot ntshu nyingn ngwa minyi, ya apabant; ya apanyingn nto ake ya apakato, ipamon nenke.

¹⁰ Muempo angwik isina kuwempr, nto ake isina kudjak, nto ake isin kupantsh ; di minyi rawiy isina keka mameme muwar a mony, manta mumon mony mua buiki.

¹¹ Minyi rungwak ru mpake ntshu mameme ntshu nsek, mpake ntshu nsek ntshu uwus mameme mante.

¹² Di nker ngun ntshu ngwak ka mpake mameme, mameme ake ka mameme mante bo, nter atar ya kuey amawiy, ya isabompr mameme, ya itin ; kuey isawat mameme nto ake isamapantshi.

¹³ Nker ngun antin isina awar yante nker ngun, ya ka isuer ri mameme bo.

¹⁴ Minyi ru mpake nsek, ramayeb mameme mami, mameme mami ake mamantshyeb.

¹⁵ Nko amantshyeb Tata, nko ayeb minyi ake Tata, minyi uwek mony muami isin mameme mami.

¹⁶ Mameme mami mekra munkawar, manta rek matowar u kat a mpur ine, busek minyi ruwimatshuari, manta mapaok rutot rami, manta yemuwar tong imwetsh, nto ake mpake mwetsh.

¹⁷ Tata amapont isin kankos, isin iwek minyi mony muami isin kukamurab.

¹⁸ Rek a muot utampr a munta, minyi rimuwek, minyi rungwar i bunono bumutuey nto ake i bunono bukamurab ; ruey rine ra rab ngwa Tata.

¹⁹ Basi Yuda bamakapamps isin mey mene.

²⁰ Ba buiki u kat a ba bampe : Ya angwa insong mua Satan u kat ante, angwa i buwar bu marar; binu bukungokm isin ye ?

²¹ Bana bekra bampe : Mey mene rek mawar mey ma muot ntshu ngwak i nsong mua Satan muamayeb udipr mis ma mun a mis mabama ?

Nter atot Yes ampe : Minyi ru Ntsampe

²² Rusu ru nianko mupong mpur a Ntsampe muawar u Yerusarem, rawar ibur ra piu.

²³ Nter aukurerm Yes u mpuru a Ntsampe, u ipuer ra bora Saromon.

²⁴ Basi Yuda kunong, ba kunor bampe : Wene utshuser pantshi nter ye iwengs wene puing sia bitu? Mpe wene ungwar Kristo, tshusueng irengene irengene.

²⁵ Yes kubasaks yampe : Minyi ramabisuengs, di binu uyes bo. Mayemp munkerk minyi irukompua ra Tata, manta munkerk bukentshi isin minyi.

²⁶ Di binu uyes bo, isin binu rek bawar mameme mami nko imabiror minyi.

²⁷ Mameme mami muok rutot rami, minyi ramamayeb, manta ake murabs ami.

²⁸ Minyi rumawek mony usir bo, manta yekumuwa bo ; rek a muot utampr a manta u rou rami bo.

²⁹ Tata ntshu amapek a manta, amarek bakima bunene, rek a muot uyeb utampr u rou ra Tata bo.

³⁰ Minyi nto a Tata tshungwak a mwetsh.

³¹ Basi Yuda kukarab mamanya isin kunkuet.

³² Yes kubaror yampe : Minyi ramaker u buso bua binu mayemp mamasek ma buiki ma Tata, binu bukuet mamanya isin ru nake ?

³³ Basi Yuda kunsaks bampe : Tshuak ikuet mamanya isina iyemp rusek raker we bo, di isina misinku mikuto wene Ntsampe, nto ake isina wene u muot, di wene wampe u Ntsampe.

³⁴ Yes kubasaks yampe : Kemungwak mapunta u kate ibo ra binu : Minyi ramaror ampe : Binu bungwak tshuntsampe ?

³⁵ Mpe ibo raur bene batoms ya rueye ampe, tshuntsampe, mey matot mukanta mua Ntsampe makaka bo.

³⁶ Isin ye ik rori binu, minyi nywe ntshu ayempes Ntsampe ntshu atom ya u kat a bat ba man ampe : Wene ukuto Ntsampe misinku isin intot minyi ampe : Minyi ru Muan a Ntsampe.

³⁷ Mpe minyi kurunkerk mayemp ma Tata, rek ana buntshyes bo.

³⁸ Di mpe minyi rumpak maker, binu uwont untshyes bo, mayes ana manta, isina keka binu bayeb nto ake bayes ampe, Tata angwak u kat ami, minyi ake rungwak u kat a Tata.

³⁹ Ba kukasot ungwat, di ya kusopu u biar bia banta.

⁴⁰ Ya kukakaru u muin mua Yordani u kate irak ratetshiye Yoane uwek batis, ya awar ona.

⁴¹ Bat ba buiki kuwiy ngwa ya bampe : Yoane keataker isana rumwetsh bo ; di mey makima maror Yoane isin muot nywe, mawar ma barabara.

⁴² Bat ba buiki na kunyes.