Yoane 1 - Rusang rusek rapunta

Rueye rapirua muot

¹ Bukwetshi Ruey rawara, Ruey rawara irak rumwetsh a Ntsampe ; Ruey rawara Ntsampe.

² Ruey rawara bukwetshi irak rumwetshi a Ntsampe.

³ Biket bikim bukwetshi biakera yante, rek iket rumwetsh rawara yante rek uker.

⁴ Mony muawara kat ante, mony muawara muer mua bat.

⁵ Muer muatemuo u nteng a maimin, muimin rab muer bo.

⁶ Muot mwetsh, rukompua rante Yoane, Ntsampe amantom.

⁷ Muot yona awiya nko nkentshi mua Ntsampe, itshusuengs bitu mey ma Muer muna, isina bat bakima buyes isin mey mante.

⁸ Yone kuawar Muer bo, yante awiya isin kutshusuengs meye ma Muer.

⁹ Muer mune, muawar a barabara, muawiya u kat a bat, muatemuo u nteng a bat bakima.

¹⁰ Yante awaka u manu, yante akera manu, bat ba manu unyeb yante bo.

¹¹ Yante awiya ngwar bat bante, bat bante bamamer.

¹² Bene bakima bamanyes yante, yante amabaweke bunono bupiru ban ba Ntsampe,

¹³ Ka ibuetshi ri makera bo, mpe ri rutoko bo, mpe ri ruwont ra muot bo, baba bana babota Ntsampe.

¹⁴ Ruey rapirua muot, rawar u nteng a bitu, rayora nto nsampr nto ake barabara, bitu tshuamatar ruton rante, rawara nko ruton ra Muan mwetshi ntshu a Tata.

Bukentshi bua Yoane Batis

¹⁵ Yoane awar nkentshi muante kutot ankon : Yante yone arorak minyi ampe : Yante iwirabs ami, yante iwar bunen usamp minyi, isina yante awar buso buami.

¹⁶ Iwus rante bitu bakima tshuamarab, nto ake nsampr muarek nsampr.

¹⁷ Isina Moise awek ibo, ru nsampr nto ake barabara mawiya a Yes Kristo.

¹⁸ Rek a muot mwetsh atotar Ntsampe, tar imwetsh bo ; Muan ante mwetsh awak u tor a Tata, yante amatshuyebs.

¹⁹ Bune bukentshi bua Yoane, basi Yuda ba Yeru­sarem, ntera tinta bampang bakump banen nto ake basi Levit, isina kuwor ampe : Wene u nake ?

²⁰ Yante uber bo, utot ampe : Minyi ka ru Kristo bo.

²¹ Banta kuwor bampe : Wene u nake ? Wene u Iria ? Yante kutot : Minyi ka ru yante bo ; Wene u profete  ? Yante kusakr : Bo.

²² Banta kunor bampe : Wene u nake ? Tshusue­ngs bitu, isin bitu tshuayeb wasaks mey ma bat bumatshutom bitu. Wene nor mpueny isina wene wamet?

²³ Yoane kutot yampe : Minyi rungwar rutot ra muot yone aukuwami busuebe bu ibwings ampe : Sikiy ana mpok a Kumu nko aror profete Isay.

²⁴ Batoma bawar bafarisai.

²⁵ Banta kukawor : Wene ukuweki batis isin ye, mpe wene ka u Kristo bo, wene ka u Iria bo, mpe wene ka u profete bo ?

²⁶ Yoane kubasaks yampe : Minyi rikeweki batis kat a mas; muot mwetshi angwar u kat a binu, binu unyeb ya bo.

²⁷ Ya ntshu wiy ampis ami, amantek minyi ; namp mua sabat sante, minyi uyeb upusur bo.

²⁸ Mey mene mawar u Betania, muin mua ntshare a Yordani, irak rawekek Yoane batis.

²⁹ Nyies muna Yoane kutar Yes kuwiy kor ante, Yoane kutot : Rent, Imeme ra Ntsampe ruworo mey mabe ma bat.

³⁰ Ya yone aror minyi ampe : Ntshu uwiya mpis ami, amasamp minyi, isin yante awar buso buami.

³¹ Minyi kuramanyeb ya bo ; minyi rawiy batis bat nto a mas, isin ya isoru kat basi Israer.

³² Yoane kutot yampe : Minyi rumatar Puinki a Ntsampe anto u ruk, nko puru, yante amanyam ruk rante.

³³ Buso minyi kuratonyeb bo, di ntshu amatom minyi isin kuwek batis nto a mas, ya amantor : Ntshu tar wene Puinki a Ntsampe ito u ruk anyam ruk rante, yone yante ntshu batisa nto Ntem mua Puinki a Ntsampe.

³⁴ Minyi rumantar yante, isin kankose atot minyi, Ya awar Muan

Baronki ba kwetshi a kwetshi

³⁵ Nyies muna, Yoane akawar ona ake nto baronki bante bape.

³⁶ Nter atar yante Yes iwasampi, yante kutot yampe : Rent ana, Imeme ra Ntsampe.

³⁷ Nter aoka baronki bape ba Yoane nkos, ba kurabs a Yes.

³⁸ Yes kubarm, kubatar bene bawirabs ante, ya kubaror yampe : Binu bukusot ye ? Banta kunsaks : Rabbi ? (mpar a rinta ampe : Kumu) Wene ungwak kue ?

³⁹ Yes kubaror yampe : Wimon ana ; ba kuwe kuwamon irak rawak yante, banta bawar nto ante rusu rina, isin rinta rawar kora kor itankua isanke.

⁴⁰ Andere muekiy a Simon Petero, yawar ntsumpe u kat a bene baok mey maror Yoane, barabs a Yes.

⁴¹ Awar ya awamwens nto a muan inyante Simon kwetsh a kwetshi, kunor yampe : Bitu tshumamon Messia, (mpar a rinta ampe : Kristo).

⁴² Yante kuwintshuar ngwar Yes, nter amantar Yes, ya kunor yampe : Wene u Simon muan a bora Yona ? Banta biur wene Sefas, (mpar a rinta ampe : Imanya).

⁴³ Rusu rakawirabs i rusu rina, Yes arakuwe ra Garirea, yante kumwens nto a Firipo, ya kunor : Wirabs ami.

⁴⁴ Firipo nsi Betsaida, bora Andere nto ake Petero.

⁴⁵ Firipo kumwens nto a Natanaer, ya kunor yampe : Bitu tshumamon nywe apunta Moise kat mukanta mu ibo, nto ake atoto baprofete ampe : Yes nsi Nazaret, muan a Yosef.

⁴⁶ Natanaer kunor yampe : Mey, wimon.

⁴⁷ Yes kutar Natanaer kuwiy kor ante, yante kunor yampe : Rent, muot nywe, yante angwar barabara nsi Israer, yante rek ikuis bo.

⁴⁸ Natanaer kutot nto ante : Wene mantshyeb minyi aye ? Yes kusaks : Buso nter imaiur Firipo, nter ingwar wene sin nte mua figuier, minyi rumaitar.

⁴⁹ Natanaer kunsaks yampe : Rabbi ? Wene u Muan a Ntsampe, wene u Kumu basi Israer.

⁵⁰ Yes kunsaks yampe : Isin imairor minyi ampe ; minyi rumaitar wene sin nte mua figuier, wene umayesa ? Wene wapatar mey masampa mey mene bunen.

⁵¹ Yes kunor : Barabara, barabara, minyi rik birori, binu bapatar ruk ra Ntsampe raripra, i bawantsho ba Ntsampe bubent u ruk, yebuworm ruk ra Muan a Muot. 2