Yohana 7 - Ereyga Illaahey Axdiga Cusub

Ciise iyo walaalihiis

¹ Ciise wuxuu go’aansaday inuu Yahuudiya ka tago oo aado dhinaca Galili. Waayo hogaamiyayaashii Yuhuudda ayaa isaga raadinayeen si ey u dilaan.

² Markii dabaaldeggii teendhooyinka ee Yuhuudda soo dhawaatay,

³ ayaa walaalihii Ciise isaga ku yiraahdeen, “Galili ka tag oo aad Yahuudiya, si xertaada halkaas joogta ey u arkaan shaqada aad haysid.

⁴ Maxaa yeelay ma jiro qof caan noqon raba oo hoos hoos wax u sameeya. Sidaa darteed waxyaalahan aad sameyneysid aduunka tus.”

⁵ Xitaa walaalihiis ma eysan aaminin isaga.

⁶ Ciise wuxuu iyaga ku yiri, “Waqtigeyga lama gaarin, laakiin idinka waqtigiina mar walba wuu joogaa.

⁷ Dadka dunidan ma idin nacayaan, laakiin Aniga ayey i nacayaan waayo waxaan ka marqaatifura waxyaalaha sharta leh ey sameeyaan.

⁸ Idinka sii aada dabaaldegga. Anigu uma socdo waayo waqtigeyga weli lama gaarin.”

⁹ Waxyaalahaas markii uu yiri kadib wuxuu ku haray Galili.

¹⁰ Si kastaba ha ahaatee, walaalihiis markey dabaaldeggii tageen, Ciise sidoo kale wuu tagay, laakiin qofna isuma muujinin wuu is qariyay.

¹¹ Haddana dabaaldeggii markii uu dhacayay, hogaamiyayaashii Yuhuudda waxey raadinayeen Ciise, markaas ayey weydiiyeen, “Aaway isaga?”

¹² Dadkii badnaa dhexdooda ayaa dood Ciise ku saabsan ka dhacday. Qaarkood waxey yiraahdeen, “Waa nin wanaagsan.” Kuwa kalana waxey ku jawaabeen, “Maya, isaga dadka ayuu khiyaanaa.”

¹³ Laakiin ma jirin qof si cad isaga uga hadlay waayo waxey ka cabsadeen hogaamiyayaasha.

Ciise oo dadka wax baray goortii uu dabaaldegu dhacayay

¹⁴ Dabaaldeggii markii uu dhexda sii marayay ayaa Ciise wuxuu galay macbadka oo bilaabay inuu dadka wax baro.

¹⁵ Hogaamiyayaashii Yuhuudda aad ayey u yaabeen oo waxey is weydiiyeen, “Sidee ayey ku dhacday ninkan inuu sidan dhan wax u yaqaano? Weligiisna aan wax la barin!”

¹⁶ Markaas ayaa Ciise ugu jawaabay, “Wax baritaankeyga aniga igama imaanin. Wuxuu ka yimaaday kan isoo diray.

¹⁷ Haddii qof walba go’aansado inuu Illaahey adeeco, wuu ogaanayaa in baritaankeygu ka yimid Illaahey mise inaan waxyaalaheyga iskaga hadlayo.

¹⁸ Qof walboo iska hadla ammaantiisa ayuu doonayaa, laakiin midka ammaanta kan isaga soo diray ka hadla waa nin run sheeg ah, wax been ah oo isaga ku saabsanna ma jirto.

¹⁹ Muuse sharciga miyuusan idin siinin? Haddana ma jiro qof idin ka mid ah oo sharciga adeecay. Haddaba maxaad iskugu dayeysaan inaad i dishaan?”

²⁰ Dadkii badnaa ayaa ugu jawaabay, “Ruuxyo wasakh leh ayaad qabtaa, yaa doonayaa inuu ku dilo?”

²¹ Markaas ayaa Ciise iyaga ku yiri, “Markaan hal mucjiso sameeyay idinka oo dhan ayaa wada yaabay.

²² Laakiin Muusana wuxuu idin amray inaad wiilashiina gudaan. Xitaa muusan ahayn Muuse kan idin amray, waxey ahaayeen awoowayaashiin oo xitaa maalinta Sabtida wiilashiina waad gudaan.

²³ Haddaba haddii wiil la gudi karo maalinta Sabtida si sharciga Muuse uusan u jibin, maxaad iigu xanaaqdeen markaan nin bogsiiyay maalintii Sabtida?

²⁴ Muuqaalka haku xukumina, laakiin si sax ah wax u xukuma.”

Dadka oo aan isku raacin Ciise qofka uu yahay

²⁵ Sidaa darteed qaar ka mid ah dadka Yeruusaalem ayaa waxey bilaabeen iney weydiiyaan, “Soo kani ma ahayn ninkii ey dili rabeen?

²⁶ Waa kan oo si caddaan ah ayuu u hadlayaa, qofna wax kuma dhahayo. Runtii taliyayaashu miyey ogaadeen inuu yahay Masiixa?

²⁷ Laakiin waan ognahay ninkan halkii uu ka yimaaday, laakiin goortii Masiixu yimaado qofna ma ogaan doono halka uu ka yimaado.”

²⁸ Ciise isaga oo weli macbadka wax ku baraya ayuu yiri, “Haa waad i garaneysaan, waana garaneysaan halkan ka imid. Xooggeyga halkan kuma joogo, laakiin waa run ma garaneysaan kan isoo diray.

²⁹ Laakiin Anigu waan garanayaa isaga waayo waxaan ka imaaday isaga wuuna isoo diray.”

³⁰ Dadka qaar ayaa isku dayay iney halkaas Ciise ku qabtaan. Laakiin qofna ma awoodin inuu gacanta isaga saaro waayo waqtigiisi lama gaarin.

³¹ Laakiin weli dad badan ayaa isaga aaminay. Waxey yiraahdeen, “Masiixa goortii uu yimaado miyuu mucjisooyin isaga ka badan sameyn doonaa?”

³² Goortey Farrisiintii maqleen dadkii badnaa iney Ciise ka hadlayeen ayaa waxey kulan la sameeyeen gudoomiyayaasha wadaaddada, kadibna askar ayey macbadka u direen si ey isaga u soo qabtaan.

³³ Laakiin Ciise wuxuu iyaga ku yiri, “Waqti yar ayaan idin la joogaa, kadibna waxaan u laabanayaa kii isoo diray.

³⁴ Waad i raadin doontaan laakiin ima heli doontaan, halkan joogana ma imaan kartaan.”

³⁵ Yuhuuddiina waxey iska dhex yiraahdeen, “Ninkan halkee ayuu u socdaa oo aanan ka heli doonin? Miyuu u tagi doona Yuhuudda joogta waddan kale, halkaas miyuu wax ku bari doonaa dadka Gariiga ah?

³⁶ Muxuu ka waday markii uu yiri, ‘Waad i raadin doontaan laakiin ima heli doontaan,’ iyo, ‘Halkan joogana ma imaan kartaan’?”

³⁷ Maalintii ugu dambeysay oo uguna muhiimsanayd dabaaldegga, Ciise intuu istaagay ayuu cod dheer ku yiri, “Mid walboo haraadsan ha ii yimaado oo ha cabo.

³⁸ Mid walboo i aamina, qorniinku wuxuu leeyahay, webi biyo nool ah ayaa isaga ku dhex qulquli doona.”

³⁹ Ciise wuxuu ka waday Ruuxa Quduuska ah, taas oo la siin doono mid walboo isaga aamina. Ruuxa weli qofna lama siinin, waayo Ciise weli ammaantiisa ma galin.

⁴⁰ Markii dadkii badnaa maqleen waxyaalihii Ciise ku hadlay ayaa waxey yiraahdeen, “Runtii ninkan waa nebi.”

⁴¹ Kuwa kalana waxey yiraahdeen, “Isagu waa Masiixa.” Weli kuwa kalana waxey yiraahdeen, “Sidee ayey ku noqon kartaa in Masiixu ka yimaado Galili?

⁴² Qorniinku wuxuu leeyahay Masiixu wuxuu ka imaan doonaa farcankii Daa’uud. Taasi micnaheedu miyuusan ahayn inuu ku dhalan doono magaalada Daa’uud ee Beytlaxam?”

⁴³ Dadkii ayaa kala qeybsameen Ciise dartiis.

⁴⁴ Qaarkood ayaa doonayay iney qabtaan laakiin qofna gacanta ma saarin.

Hogaamiyayaashii wey diideen iney Ciise aaminaan

⁴⁵ Askartii macbadka markey u laabteen gudoomiyayaashii wadaaddada iyo Farrisiintii waxey ku yiraahdeen, “Maxaad Ciise halkan u keeni wayseen?”

⁴⁶ Markaas ayaa askartii ugu jawaabeen, “Qof sida ninkaas oo kale weligiis u hadlay ma jiro.”

⁴⁷ Farrisiintii waxey iyaga ku yiraahdeen, “Idinkana ma la idin soo khiyaanay?

⁴⁸ Gudoomiyayaasha wadaaddada iyo Farrisiinta midkoodna miyuu Ciise aaminay?

⁴⁹ Dadkan aan sharciga Muuse garaneyninna waxey hoos joogaan inkaarta Illaahey.”

⁵⁰ Halkaas waxaa joogay Nikodemoskii markii hore Ciise u tagay oona iyaga ka mid ahaa wuxuuna weydiiyay,

⁵¹ “Sharcigeena ma ogola in qof la xukumo isaga oo aan weli la maqlin. Ma xukumi karno illaa aan ka ogaano wuxuu sameeyay.”

⁵² Kadibna waxey yiraahdeen, “Nikodemosow, ma waxaad ka timid Galili? Qoraalka akhriso, waadna ogaan doontaa in uusan nebi ka imaanaynin Galili.” [

⁵³ Kadib qof walba gurigiisi ayuu aaday.