Yacquub 5 - Ereyga Illaahey Axdiga Cusub

Digniin ku socota taajiriinta

¹ Bal eega, kuwiinan taajiriinta ahow, ooya oo aad u cabsada dhibaatooyinka xun oo idin kusoo socda aawadood.

² Maalkiini wuu qurmay, oo dharkiini qurxoonaana aboor ayaa cunay.

³ Dahabkiina iyo lacagtiina waa wax aan waxba tarayn. Maalkii aad ku xisaabtami jirteen ayaa hilibkiina u cuni doona sida dab oo kale. Maalkan aad urursateen wuxuu cadayn idin ku ahaan doonaa maalinta xisaabta.

⁴ Dhegaysta! Maqla oohinta shaqaalihii beerta ee aad khiyaaneyseen mushaharkooda. Mushaharkii aad bixin weyseen ayaa idin ka cabanaya. Oo oohintii kuwii beertiina goynayay waxey gaartay dhegihii Rabbiga Weyn.

⁵ Inti aad dhulka joogteen, waxaad ku fikirteen inaad calooshiina buuxisaan oo aad waqti fiican qaadataan. Laakiin hadda waxaad la mid tihiin dibiyo buurbuuran oo la gowraci rabo.

⁶ Idinku waxaad xukunteen oo disheen dad aan waxba galabsan, oo xitaa is difaaci kari waayay.

Samir naxariis iyo duco

⁷ Walaalayaal sabra inta aad sugeysaan soo laabashada Rabbiga. Bal u fiirsada sida beeraleydu u sugaan inta uu dhulku miro qiima leh u soo saaraayo, iyaga oo sabar ku sugaya roobabka guga iyo dayr.

⁸ Idinka xitaa samir lahaada. Qalbiyadiina xoogeeya, waayo imaanshada Rabbigu wey dhowdahay.

⁹ Walaalayaal midkiinba midka kale yuusan ka gunuunicin, haddii kale waa la idin xukumayaa, oo xaakinku albaabka ayuu taagan yahay.

¹⁰ Walaalayaalow, ku dayda nebiyadii magaca Rabbiga ku hadlay. Wey samreen, xitaa markii uu dhib ku dhacay.

¹¹ Runtii, kuwii dulqaatay waxaan u aragnaa kuwo barakeysan. Waxaad xusuusan tihiin siduu Ayuub u dulqaadan jiray iyo siduu Rabbigu ugu dambeyntii u caawiyay. Maxaa yeelay, Rabbigu waa mid naxariis iyo raxmad badan.

¹² Walaalayaalow, ha dhaaranina. Waa in eydan ku dhaaranin samada, ama dhulka, ama wax kale. “Haa” ama “Maya” waa waxa kaliya ee aad u baahantihiin inaad tiraahdaan. Haddii aad wax ka badan tiraahdaan, waa la idin xukumi doonaa.

Awoodda ducada

¹³ Haddii ey dhibaato idin haysato, waa inaad duceysataan. Haddii aad dareentaan farxad, waa inaad ku heestaan heeso ammaan ah.

¹⁴ Haddii aad xanuusan tihiin, weydiiya hogaamiyayaasha kaniisadda iney idiin yimaadaan oo idiin duceeyaan. Weydiiya iney magaca Rabbiga saliid idin kugu subkaan.

¹⁵ Haddii aad rumeysad leedihiin markaad u duceysaan dadka xanuusan wey bogsan doonaan. Oo Rabbigu iyaga wuu bogsiin doonaa, oo haddii ey dembaabeen, wuu cafin doonaa.

¹⁶ Haddii aad dembaabteen waa inaad isu sheegtaan wixii aad sameyseen. Markaas ayaad isku duceyn kartaan oo aad bogsaneysaan. Qofka xaqa ah baryadiisu wey xoog badan tahay, oo aad ayey waxtar u leedahay.

¹⁷ Eliyaas wuxuu ahaa binu aadan anaga oo kale ah. Saddex sano iyo bar ayuu aad ugu duceystay in uusan roob da’in, dhulkana roob kuma da’in.

¹⁸ Laakiin markii uu mar kale ku duceystay inuu roob da’o cirkiina roob ayuu soo daayay dhulkiina mirro ayuu dhalay.

¹⁹ Walaalayaalow, haddii kuwa Masiixa raacsan ey runta ka leexdaan, lana soo celiyo,

²⁰ waa hubaal in qofkii soo celyay dembiilayaashaas uu iyaga ka badbaadiyay dhimasho una keenay cafiska dembiyo badan.