Yacquub 1 - Ereyga Illaahey Axdiga Cusub

Salaan

¹ Warqaddan waxey ka socotaa Yacquub oo ah adeegihii Illaahey iyo Rabbigeena Ciise Masiix. Waxaan warqaddan u qorayaa mu’miniinta aduunka ku kala firdhisan ee kasoo kala jeeda laba iyo tobanka qabiil ee Yuhuudda.

Iimaanka iyo dulqaadka

² Walaalaheyga qaaliga ahaw, u arka fursad farxad weyn leh markii dhibaatooyinku idin ku dhacaan.

³ Waayo waad garaneysaan in markii rumeysadkiina la tijaabiyo uu dulqaadkiinu korayo.

⁴ Laakiin waa inaad barataan inaad u adkeysataan wax walba si aad u noqotaan kuwa koray oo dhameystiran, waxna eysan ka maqnayn.

⁵ Haddii mid idin ka mid ah u baahanyahay xikmad, waa inuu Illaahey ka baryaa, waana la siin doonaa. Lagumana canaanan doono inuu weydiisatay.

⁶ Laakiin markaad wax weydiisataan, waa inaad iimaan leedihiin oo eydan shaki lahayn. Qof kastoo shakiya waa sida hirka badda weyn oo duufaan wata.

⁷ Dadka noocaas ah ma aha iney Rabbiga wax ka helaan.

⁸ Daacadnimadooda waxey u kala qeybsan tahay Illaahey iyo aduunka, wax kastoo ey sameeyaanna ma xasiloona.

⁹ Masiixiyiinta la yaso waxey leeyihiin wax ey ku faanaan, waayo Illaahey ayaa iyaga sharfay.

¹⁰ Kuwa taajiriinta ahna haku faanaan inuu Illaah hooseysiiyay. Waxey u baabi’i doonaan sida ubaxyada duurka oo kale.

¹¹ Markey qoraxdu kulushahay cawskana wuu qalalaa, ubaxa baalashiisa ayaa ka daata oo quruxdooduna wey baaba’daa. Sidaas oo kalana taajiriintu wixii ey sameeyeen oo dhan wey lumi doonaan.

¹² Illaahey wuu barakeeyaa kuwa u samra imtixaanada iyo jarribaadda. Qofkaas wuxuu heli doonaa taajka nolosha ee Rabbigu ka ballan qaaday kuwa isaga jecel.

¹³ Illaahey ha eedeynin markii lagu jarribo, Illaahey xumaan kuma jarribmo, oo isagu xumaa uma isticmaalo inuu dadka kale jarribo.

¹⁴ Laakiin qof walba waa la jarribay, markey jiitaan damacyadiisa sharta leh ee dembiga geliya.

¹⁵ Damacyadan waxey ka dhashaan falal dembiyeed. Dembiga markii la ogolaado inuu weynaado, wuxuu dhalaa dhimasho.

¹⁶ Sidaas oo kale walaalayaal yaan la idin khiyaanin.

¹⁷ Hadiyad kastoo wanaagsan oo kaamil ah waxey ka timaadaa Aabaha abuuray dhamaan nuurka samada. Isaga mar walba waa isku mid oo weligiis iskuma bedbedelo sidii harka oo kale.

¹⁸ Wuxuu doortay inuu na siiyo nolosha weligeed ah markaan rumeysanay ereygiisa runta ah. Si aan u noqono miraha ugu horeeya ee abuurkiisa cusub.

Dhegeysiga iyo sameynta

¹⁹ Walaalaheyga qaaliga ahaw, xasuusta inaad si degan wax u dhegeysataan oo hadalka iyo xanaaqa gaabisaan.

²⁰ Xanaaqa binu aadanku ma keeno xaqnimada uu Illaahey doonayo

²¹ Haddaba iska saara dhamaan wasakhda iyo xumaanta noloshiina ku jirta, oo is hooseysiiya oo aqbala ereyga Illaahey qalbigiina ku beeray, waayo wuxuu leeyahay awood uu naftiina ku badbaadiyo.

²² Adeeca fariinta Illaahey, hana noqonina doqomo markaad maqashaan.

²³ Waayo haddaad ereyga maqashid oo aadan adeecin, waxey la mid tahay adiga oo muraayad ku fiiriyay wejigaaga.

²⁴ Waxaad iloobeysaa sida aad u egtahay isla markaad baxdid.

²⁵ Laakiin haddaad u fiirsato sharciga kaamilka ah ee idin xoreeya, oo aad sameysaan wuxuu idin sheegayo, oo eydan illoobin waxaad maqasheen, Illaahey ayaa kugu barakeyn doona inaad sameysid.

²⁶ Haddaad diin sheegato oo aad carrabkaaga xakameyn weydo, adiga ayaa naftaada khiyaaneeyay, diintaaduna qiimo ma leh.

²⁷ Diinta Illaaha Aabaheena ka farxisa waa iney ahaato mid nadiif ah oo aan qalad lahayn. Waa inaad caawisaa agoonta iyo carmalada baahan, oo yaaney dunidu idin qaribin.