Tiitos 3 - Ereyga Illaahey Axdiga Cusub

Waxaa na loo badbaadiyay si aan wanaag u sameyno

¹ Xasuusi dadka iney adeecaan taliyayaasha iyo kuwa amarka leh, waa iney mar walba diyaar u yihiin si ey u sameeyaan wax wanaagsan.

² Waa in eysan wax xun dadka ka sheegin, waa iney ahaadaan kuwa nabad ah oo una naxariistaan qof walba, mar walbana waa iney ahaadaan kuwa dadka oo dhan u roon.

³ Anaguna sidoo kale waqti ayaan ahayn kuwa nacasyo iyo caasiyiin ah. Waana na la khiyaameeyay oo waxaan adoomo u noqonay damacyo iyo raaxo badan, nolosheena waxaa ka buuxsamay shar iyo xaasidnimo, waana isnacnay.

⁴ Laakiin markii naxariista iyo jaceylka Illaahey oo Badbaadiyaheena ah soo muuqatay,

⁵ wuu na badbaadiyay, mana aha waxyaalaha xaqa ah aan sameynay darteed, laakiin waa naxariistiisa darteed. Wuxuu naga dhaqay dembiyadeena, oo wuxuu na siiyay dhalasho iyo nolol cusub isaga oo u maraya Ruuxa Quduuska ah.

⁶ Kaasoo si deeqsinimo leh noogu shubay isaga oo u maraya Ciise Masiix Badbaadiyaheena.

⁷ Nimcadiisa darteed ayuu nooga dhigay kuwa xaqa ah oona na siiyay rajada aan ku dhaxli lahayn nolosha weligeed ah.

⁸ Tani waa fariin run ah, waxaana rabaa inaad ku adkeysataan waxbaridan si kuwa walboo aamina Illaahey ey isku xil saaraan iney sameeyaan waxa wanaagsan. Waxbaridan waa mid wanaagsan oo faa’iido u ah qof walba.

⁹ Laakiin iska ilaaliya dood nacasnimo ah oo ka timid awoowayaasheen ama muran ku saabsan sharciga Muuse, waayo waxyaalahan qiimo ma laha waqti ayeyna idin ka dhuminayaan.

¹⁰ Haddii ey dadku idinku dhex abuuraan kala qeybsanaan, hal mar ama laba mar canaanta. Intaas ka badanna faraha ka qaada.

¹¹ Waayo dadkaas oo kale waxey ka leexdeen runta, oo dembiyadooda ayaana xukumay.

Hadalladii ugu dambeeyay ee Bawlos iyo salaantiisi

¹² Waxaan qorsheynayaa inaan mar dhow kuu soo diro Artemaas ama Tukhikos. Oo markii midkood yimaado, ku dadaal inaad igula kulanto Nikobolis, waayo waxaan go’aansaday inaan halkaas joogo xiliga qabowga.

¹³ Samee wax walboo aad awoodid si aad Seenaas oo ah garyaqaan iyo Abolloos uga caawiso safarkooda.

¹⁴ Dadkeenu waa iney bartaan iney waqtigooda ku bixiyaan wanaag sameynta, si ey u helaan rabitaankooda degdega ah oo eysan ku noolaanin nolol aan micno lahayn.

¹⁵ Mid kastoo halkan ila jooga wuu ku soo salaamayaa. Fadlan iigu salaan kuwa nagu jacel iimaanka. Nimcada Illaahey kuligiin ha idin la jirto.