Rooma 6 - Ereyga Illaahey Axdiga Cusub

Awooddii dembiga waa la burburiyay

¹ Haddaba maxaan niraahnaa? Miyaan ku sii soconaa dembiga si nimcada Illaahey usii badato?

² Maya lagama yaabo! Waayo waxaa na lagu xukumay dhimasho dembiga dartiis, haddaba sidee ayaan dembi ugu noolaaneynaa?

³ Mise miyeydan ogayn in kuweena lagu baabtiisay Ciise Masiix sidoo kalana lagu baabtiisay dhimashadiisi?

⁴ Waayo markii na la baabtiisay, waan dhimanay waxaana nalala aasay Masiixa. Sidii uu Ciise dhimashada uga soo sarakacay ammaanta Illaaha Aabaha ah ayaan inaguna hadda ugu noolaaneynaa nolol cusub.

⁵ Haddii aan Ciise baabtiiska kula wadaagnay dhimashadiisa, sidoo kalana waan la wadaageynaa sarakicidda si aan ula noolaanno isaga.

⁶ Waayo waan ognahay in nolosheeni hore Ciise lagula qodbay iskutallaabta, si jirkeena dembiga badan loo baabi’iyo, mar dambana aanan dembiga adoon ugu ahaanin.

⁷ Waayo markaan la dhimanay Masiixa ayaa naga xoreeyay awooddii dembiga.

⁸ Hadda haddii aan la dhimano Masiixa, waxaan aaminsanahay inaan la noolaan doono isaga.

⁹ Waan hubnaa in dembigu uusan Masiixa korkiisa awood ku lahayn. Wuu dhintay waana la soo sarakiciyay, isaga oo aan mar labaad dhimaneyn.

¹⁰ Markii uu Masiixa dhintay dembiga oo dhan ayuu hal mar u dhintay. Laakiin hadda wuxuu u nool yahay ammaanta Illaahey.

¹¹ Sidaas si la mid ah, idinkuna isku tiriya inaad awoodda dembiga ka dhimateen. Laakiin Ciise Masiix ayaa nolol idin siiyay, waxaadna u nooshihiin Illaahey.

¹² Sidaa darteed ha u ogolaanina dembigu inuu u taliyo jirkaaga aan dhimaneyn, oo aad adeecdid damacyadiisa xun xun.

¹³ Ha u ogolaanina qeyb jirkiina ka mid ah iney noqoto qalab shar ah oo u adeega dembiga. Laakiin si dhameystiran naftiina u siiya Illaahey, waayo waxaad ahaydeen kuwo dhintay, laakiin hadda waxaad hesheen nolol cusub. Haddaba u isticmaala jirkiina sidii qalab waxa xaqa ah loogu sameeyo ammaanta Illaahey.

¹⁴ Dembiga sayid idiin ma aha mar dambe, waayo sharciga kuma hoos jirtaan, laakiin waxaad ku hoos jirtaan nimcada Illaahey.

Adoomada xaqnimada

¹⁵ Haddaba waxan oo dhan muxuu macnahoodu yahay? Miyuu macnahoodu yahay waxaan xor u nahay inaan dembaabno, waayo ma hoos joogno sharciga ee waxaan hoos joognaa nimcada Illaahey? Maya lagama yaabo!

¹⁶ Miyeydan ogayn inaad adoon u tihiin qofkii aad adeecdaan? Waxaad adoon u noqon kartaan dembiga kaasoo dhimasho dadka ku haga, ama waxaad noqon kartaan adoomo adeeca Illaahey waxaadna noqoneysaan xaq.

¹⁷ Waxaad adoon u ahaan jirteen dembiga. Laakiin waxaan Illaahey ugu mahadcelinayaa inaad qalbigiina ka adeecdeen waxbaridan idin siiyay oo dhan.

¹⁸ Hadda waxaad xor ka noqoteen dembiga waxaadna noqoteen adoomo Illaahey oo xaq ah.

¹⁹ Jirkiina daciifnimadiisa darteed ayaan u isticmaalayaa tusaalaha adoonnimada si aan idin kaga caawiyo inaad arimahan fahantaan. Horey wuxuu jirkiinu adoon ugu ahaa fikradihiina xun xun. Hadda waa inaad jirkiina u hibeysaan xaqnimada si aad quduus u noqotaan.

²⁰ Markaad dembiga adoomada u ahaydeen, waxaad xor ka ahaydeen xukunka xaqnimada.

²¹ Haddaba waqtigaas maxaa faa’iido ah oo aad ka haysateen waxyaalaha aad hadda ka xishooneysaan? Kuwaasoo ey natiijadoodu tahay dhimasho!

²² Laakiin hadda oo aad xor ka noqoteen dembiga oo aadna noqoteen adoomadii Illaahey, waxey idin ka dhigeysaa quduus waxeyna idin ku hageysaa nolosha weligeed ah.

²³ Waayo abaalgudka dembigu waa dhimasho, laakiin hadiyada Illaahey waa nolosha weligeed ah ee lagu helo Sayidkeena Ciise Masiix.