Rooma 13 - Ereyga Illaahey Axdiga Cusub

Xaakimada oo la adeeco

¹ Qof kasto ha adeeca maamulka xukuma. Waayo ma jiro awood aan ahayn tan uu Illaahey aasaasay. Awood kasta oo jirta waa inuu Illaahey aasaasay.

² Dadka ka hor yimaada xaakimyadooda waxey ka hor yimaadeen qorshaha Illaahey, waana la ciqaabi doonaa.

³ Dadka wanaagsan kama cabsadaan xaakimyada ee kuwa xumaanta wada ayaa ka cabsada xaakimyada. Waxa wanaagsan samee waadna ka amaan heleysaa xaakimyada.

⁴ Waayo xaakimyadu waa Illaahey adeegayaashiisa, waxaana loo soo diray wanaagaaga. Laakiin haddaad qalad sameyneysid waad cabsaneysaa, waayo waxey awood u leeyihiin iney ku ciqaabaan. Xaakimyadu waa adeegayaashii Illaahey waxaana loo soo diray iney ciqaabaan kuwa waxa xun sameeya.

⁵ Haddaba waa waajib in aad iyaga adeecdid, mana aha inaad ciqaab ka badbaadid oo kaliya laakiin inuu damiirkaagu nadiif ahaado.

⁶ Sidoo kale canshuurta bixi, waayo shaqaalaha dowladu waxey u baahanyihiin mushahar, shaqada ey hayaanna waxey ugu adeegayaan Illaahey.

⁷ Wax walboo lagugu leeyahay iska bixi, bixi canshuurta iyo waxyaalaha ey dowladu kaa rabto, xushmad iyo qadarinna sii kuwa ku xukuma.

Jaceylka ayaa ka dhabeeya sharciga

⁸ Jaceylku ha noqdo deynta kaliya ee la idin ku leeyahay! Hadduu qaarkiin qaarka kale jecel yahay waxaad sameyseen wax walboo sharcigu idin ka rabay.

⁹ Sharcigu wuxuu leeyahay amarro badan sida, “Gogol dhaaf ha sameynin. Ha dilin. Ha xadin. Dadka kale waxooda ha damcin.” Laakiin intan oo dhan waxey kusoo urureen amarka dhahaya, “Dadka kale u jeclow sidaad naftaada u jeceshahay.”

¹⁰ Qofku hadduu dadka jecel yahay ma dhibaateynayo. Sidaa darteed jaceylku waa waxa kaliya ee uu sharcigu kaa rabo.

Maalinta Masiixu soo laabanayo

¹¹ Sidaasna sameeya idinkoo og in saacaddu dhowdahay. Hadda waa waqtigii hurdada laga kici lahaa, badbaadadeenuna haddey ka dhowdahay maalintii aan Rabbiga aaminnay.

¹² Habeenku wuu dhamaan rabaa, mar dhowna maalintii ayaa bilaabaneysa. Waa inaan joojinaa dhaqanka sida dadka mugdiga ku jira, ee gashanaa hubka dhalaalaya ee nolosha saxda ah.

¹³ Haddaba waa inaan u dhaqannaa sida ey dadka iftiinka joogaa u dhaqmaan. Ha aadina meelaha ey dadka xun xun iskugu yimaadaan cabtoyna ha noqonina, yeydaan noqon ciyaal suuq iyo kuwo sineysta. Hana noqonina kuwa qilaaf iyo maseyr leh

¹⁴ Beddelkii isku dabool Ciise Masiixna. Hana ka fikirina sidaad u qancin laheyd damaca jirka.