Muujintii 16 - Ereyga Illaahey Axdiga Cusub

Toddobada baaquli ee carada Illaahey ah

¹ Kadibna waxaan maqlay cod weyn oo ka imaanaya macbadka oo toddobadii malaa’ig ku dhahaya, “Taga oo toddobada baaquli ee carada Illaahey ku daadiya aduunka.”

² Malagii ugu horeeyay ayaa macbadka ka tagay oo baaquligiisi aduunka ku daadiyay, waxaana dadkii lahaa calaamaddii bahalka iyo kuwa sawirkiisa caabudayay kasoo baxay boogo daran oo xanuun badan.

³ Kadibna malagii labaad ayaa baaquligiisi ku daadiyay badda, baddiina waxey isku beddeshay dhiig ah kan sida qof dhintay oo kale. Wax walboo badda ku noolna wey dhinteen.

⁴ Malagii saddexaadna wuxuu webiga iyo ilaha biyaha ku daadiyay baaquligii, iyagiina waxey noqdeen dhiig.

⁵ Kadibna waxaan maqlay malagii masuulka ka ahaa biyaha oo dhahaya, “Xaq ayaad ku tahay xukunadan, kan Quduuska ahow, adigan jira ee jiray,

⁶ waayo waxey daadiyeen dhiigga dadkaaga quduuska ah iyo nebiyada, waxaadna siiyay dhiig si ey u cabaan weyna u qalmaan.”

⁷ Waxaanna maqlay cod ka imaanaya meesha allabariga oo dhahaya, “Haa, Rabbiga Illaaha ah, kan Weynow, xukunkaagu waa kan runta iyo xaqa ah.”

⁸ Malagii afaraad ayaa baaquligiisa ku daadiyay qoraxda, qoraxdana waxaa la siiyay awood ey dadka ku gubto.

⁹ Qof walbana kuleyl daran ayaa gubay, waxeyna inkaareen magaca Illaahey, kaasoo xukuma balaayadan oo dhan, laakiin wey diideen iney toobadkeenaan oo ey Illaahey ammaanaan.

¹⁰ Malagii shanaad wuxuu baaquligiisi ku daadiyay carshigii bahalka, boqortooyadiisina wey madoobaatay. Dadkana xanuun dartiis ayey ilkaha iskugu jiririqsadeen,

¹¹ waxeyna inkaareen Illaaha samada boogtoodi iyo xanuunka dartiis. Laakiin wey diideen iney ka toobadkeenaan wixii ey sameeyeen.

¹² Kadibna malagii lixaad ayaa baaquligiisi ku daadiyay webiga weyn ee Yufraad, biyihiisi ayaa guray si uu wadada ugu diyaariyo boqorka ka imaanaya Bariga.

¹³ Waxaanna arkay saddex ruux oo wasakh leh oo u eg rah, waxeyna kasoo baxeen afka masduulaagii, bahalka iyo afka nebiyada beenta ah.

¹⁴ Waxey ahaayeen ruuxyo wasakh leh kuwaas oo sameynaya calaamado, waxeyna u tagaan boqortooyada aduunka oo dhan si ey iskugu keenaan, dagaalka ey Illaahey la leeyihiin dartiis maalinta weyn ee xukunka Illaaha weyn.

¹⁵ “Bal fiiri, waxaan u imaan doonaa sida tuug! Waxaana barakeysan dhamaan kuwa i sugaya, oona dharkoodi gashan si eysan u soconin iyagoo qaawan oo ceeb dareemaya.”

¹⁶ Ruuxyadii wasakhda lahaana waxey boqorradi iyo ciidamadoodi iskugu keeneen meel af Cibraaniga lagu yiraahdo Armageddoon.

¹⁷ Malagii toddobaadna wuxuu baaquligiisi ku daadiyay hawada, waxaana carshigi macbadka yaalay xaggisa ka yimid cod dheer oo dhahaya, “Wey dhamaatay!”

¹⁸ Kadibna waxaa dhacay onkod, hilaac iyo dhul gariir daran, taas oo aan weligeed la arkin illaa iyo abuuristii dadka.

¹⁹ Magaalada weyn ee Baabuloon ayaa saddex meel u kala qeybsantay, magaalooyinkii dadka badan lahaa wey dumeen. Illaaheyna wuxuu xusuustay dembigii Baabuloon, wuxuuna siiyay koob khamri laga buuxiyay carada xanaaqiisa.

²⁰ Jasiirad walba wey baaba’day, buur walbana waa la waayay.

²¹ Cirka waxaa da’ay roob sida dhagaxyo baraf ah, dhagaxyadaas oo uu culeyskoodu u dhowaa afartan iyo shan kiiloogaraam ayaa dadka kusoo dul dhacayay. Balaayadaan darteed ayey Illaahey u inkaareen, waayo balaayadu wey darneyd.