Muujintii 15 - Ereyga Illaahey Axdiga Cusub

Toddobo malaa’ig oo wada toddobo balaayo

¹ Waxaan samada ku arkay calaamad kale oo weyn oo yaab leh, toddobo malaa’ig ayaa hayay toddobadii ugu dambeysay ee balaayo, kuwaasoo xanaaqa Illaahey soo gaba gabeynaya.

² Waxaana arkay wax u eg bad muraayad ah taas oo dab la dhalaaleyso, badda agteedana waxaa taagnaa dadkii kasoo guuleystay bahalkii, sawirkiisi iyo nambarkii magaciisa. Waxeyna haysteen kataarad uu Illaahey siiyay,

³ waxeyna heesayeen heesaha adeegaha Illaahey ee Muuse iyo Wanka, iyagoo dhahaya, “Waxaa weyn oo yaab leh camalladaada, Rabbiyow Illaaha Weynow. Run iyo xaqnimo ayaa jidkaaga ah, Boqorkii quruumahaw.

⁴ Rabbiyow yaan kaa cabsaneynin, oo aan ammaan magacaaga u keeneynin? Waayo adiga kaliya ayaa ah quduus. Quruumaha oo dhan hortaada ayey imaan doonaan oo ey ku caabudi doonaan, waayo ficiladaada xaqa ah waa la muujiyay.”

⁵ Waxyaalahaas kadib waxaan samada ka arkay macbad, kaasoo ah teendhada Quduuska axdiga sharciga oo furantay.

⁶ Macbadkii waxaa kasoo baxay toddobo malaa’ig oo wada toddobo balaayo. Dhar nadiif ah oo dhalaalaya ayey qabeen, shakaal dahab ah ayaa xabadka ugu xirnaa.

⁷ Kadibna mid ka mid ah afarta xayawaan ayaa toddobadii malaa’ig siiyay toddobo baaquli oo ey carada Illaahey ka buuxdo, kaasoo weligiis nool.

⁸ Macbadkana waxaa ka buuxay qiiq ka yimid ammaanta iyo awoodda Illaahey. Qofna ma uusan gali karin macbadka illaa ey toddobada malaa’ig ka dhameeyaan toddobadoodi balaayo.