Matayos 21 - Ereyga Illaahey Axdiga Cusub

Ciise oo u yimid Yeruusaalem sidii boqorkii

¹ Markey u soo dhawaadeen Yeruusaalem oo ey yimaadeen Beytfaage Buur Saytuun agteeda, ayuu Ciise diray laba ka mid ah xertiisi,

² isaga oo ku yiri, “Tuulada idin ka horaysa taga, waxaadna arki doontaan dameer halkaas ku xiran, oo uu ilmaheedi la joogo. Xarigga kasoo fura oo ii keena.

³ Haddii qof idin weydiiyo maxaad xarigga uga furaysaan, waxaad ku tiraahdaan Sayidka ayaa u baahan, wuuna soo celin doonaa.”

⁴ Arintaanna waxey u dhacday si ey u dhabowdo wixii kitaabkii nebiga lagu sheegay,

⁵ “Gabadha Siyoon ku dhaha, ‘Fiiri, boqorkaagi wuu kuu imaanayaa, isaga oo qalbi dabacsan oo dameer saaran, wuxuu imaanayaa isaga oo saaran qayl dameer.’ ”

⁶ Markaas ayey xertii tageen oo sameeyeen sidii uu Ciise amray.

⁷ Waxey keeneen dameertii iyo qeylkeedii waxeyna dusha ka saareen dharkoodi si uu Ciise ugu fariisto.

⁸ Dad badan ayaa maryahoodii wadada goglay, qaar kalana waxey jareen geedaha laamahooda oo waxey ku gogleen wadada.

⁹ Dadkii la socday iyo kuwii ka horeeyayba waxey ku qaylinayeen, “Ammaan ha u ahaato Wiilka Daa’uud!” “Waxaa barakeysan kan ku imaanaya magaca Rabbiga!” “Hoosanna haku ahaato meesha ugu sareeysa!”

¹⁰ Markii uu Ciise Yeruusaalem galay dadka magaalada oo dhan wey yaabanaayeen waxeyna yiraahdeen, “Ninkan yuu yahay?”

¹¹ Dadkii badnaa ayaa u jawaabay oo ku yiri, “Kani waa Ciise oo ah nebi ka yimid Naasareddii Galili ku taalay.”

Ciise oo macbadka jooga

¹² Ciise wuxuu galay macbadka deyrkiisa wuxuuna kala ceyriyay dhamaan kuwii wax gadayay iyo kuwii wax gadanayay. Wuxuu daba gadiyay miisaskii lacagta lagu kala baddelanayay iyo kuraastii kuwii qoolleyda gadayay.

¹³ Wuxuuna iyagii ku yiri, “Waxaa qoran, ‘Gurigeyga waxaa loogu yeeri doonaa guriga ducada,’ laakiin waxaad ka dhigteen ‘Xerada tuugada.’ ”

¹⁴ Kuwii indhaha la’aa iyo kuwii curyaanka ahaa ayaa ugu yimid macbadka, wuuna bogsiiyay.

¹⁵ Laakiin gudoomiyayaashii wadaaddada iyo macalimiintii sharciga Muuse wey xanaaqeen, markey arkeen waxyaalihii la yaabka lahaa ee uu Ciise sameeyay iyo caruurtii joogtay macbadka deyrkiisa oo ku qaylinaya, “Ammaan ha u ahaato Wiilka Daa’uud.”

¹⁶ Markaas ayey Ciise weydiiyeen, “Ma maqlaysaa waxey carruurtan leeyihiin?” Ciise ayaa ugu jawaabay, “Haa, miyaydnaan weligiin akhrinin meesha uu kitaabku ku leeyahay, “ ‘Caruurta iyo dhalaanka ayaa ammaani doona’?”

¹⁷ Wuuna ka tagay oo magaalada ayuu ka baxay wuxuuna kasii aaday Beytaniya, halkaas oo uu habeenkaas joogay.

Ciise oo geed berde ah inkaaray

¹⁸ Subixii ku xigay aroortii, Ciise wuxuu rabay inuu magaalada Yeruusaalem ku laabto, wuuna gaajeysnaa.

¹⁹ Wuxuu wadada ku arkay geed berde ah, laakiin markii uu ag yimid wax mirro ah ma lahayn caleemo kaliya ayaa ku yaalay. Markaas ayuu geedkii ku yiri, “Weligaa mirro ha dhalin!” Isla markii ayuu geedkii qalalay.

²⁰ Markey xertii arintaas arkeen, aad ayey ula yaabeen waxeyna is weydiiyeen, “Sidee ayuu geedka berdaha ah dhaqso ugu qalalay?”

²¹ Ciise ayaa ugu jawaabay, “Runtii waxaan idin ku leeyahay, haddii aad iimaan leedihiin oo eydan shakin, waad sameyn kartaan waxaan geedkan berdaha ah ku sameeyay iyo wax ka badan, waxaad ku dhihi kartaan buurtan, ‘Tag oo badda isku tuur,’ weyna isku tuuri doontaa.

²² Wax walboo aad salaadda ku baridaan idinka oo rumeysan waad heli doontaan.”

Ciise oo awooddiisa wax laga weydiiyay

²³ Ciise markii uu galay macbadka deyrkiisa, isaga oo wax baraya ayaa waxaa u yimid gudoomiyayaashii wadaaddada iyo odayaashii dadka, waxeyna weydiiyeen, “Awoodee ayaad waxyaalahan ku sameysaa? Yaana ku siiyay awoodan?”

²⁴ Ciise ayaa ugu jawaabay, “Hal su’aal ayaan idin weydiinayaa. Haddaad iiga jawaabtaan, waan idiin sheegi doonaa awoodda aan waxyaalahan ku sameeyo.

²⁵ Yooxanaa yaa siiyay awoodda uu wax ku baabtiisayay? Samada miyey ka timid mise dhinaca binu aadanka?” Intey dhexdooda ka wada hadleen ayey isku yiraahdeen, “Haddii aan dhahno, ‘samada xaggeeda,’ wuxuu na weydiin doonaa, maxaad u aamini weyseen?

²⁶ Laakiin haddii aan niraahno, ‘Dadka xaggiisa ayey ka timid’ dadka ayaa ka cabsaneynaa waayo waxey aaminsanyihiin Yooxanaa inuu nebi ahaa.”

²⁷ Markaas ayey ku jawaabeen, “Ma garaneyno.” Ciise ayaa yiri, “Aniguna idiin ma sheegi doono awoodda aan waxyaalahan ku sameynayo.

Tusaalihii labada wiil

²⁸ “Maxey idin la tahay? Waxaa jiray nin laba wiil leh. Kii koowaad ayuu u tagay wuxuuna ku yiri, ‘Wiilkeygiyow orod oo maanta ka shaqee beerta canabka.’

²⁹ “Wiilkii ayaa ku jawaabay, ‘Ma aadayo.’ Laakiin gadaal ayuu ka shalaayay wuuna baxay si uu beerta uga soo shaqeeyo.

³⁰ “Kadib aabihii wuxuu u tagay wiilkii kale wuxuuna ku yiri, ‘Wiilkeygiyow orod oo maanta beerta kasoo shaqee.’ Wiilkii ayaa ku jawaabay, ‘Haye mudane,’ laakiin ma uusan aadin beerta.

³¹ “Labada wiil keebaa sameeyay wuxuu aabihiis ka rabay?” Waxey ku jawaabeen, “Kii hore.” Markaas ayuu Ciise ku yiri, “Runtii waxaan idin ku leeyahay, canshuur qaadayaasha iyo kuwa jirkooda ka ganacsada ayaa boqortooyada Illaahey idin ka hor gali doona.

³² Waayo Yooxanaa wuxuu idin kugu yimid si uu jidka xaqa ah idiin tuso, mana eydan rumeysan, laakiin canshuur qaadayaasha iyo kuwa jirkooda ka ganacsada wey rumeysteen. Xitaa markaad arintaas aragteen, ma eydnaan toobadkeenin oo ma eydnaan rumeysan isaga.

Tusaalihii kiroolayaasha

³³ “Waxaan idiin sheegayaa tusaale kale ee dhagaysta. Nin ayaa dhul lahaa wuxuu ka dhex beeray beer canab ah. Derbi ayuu ku wareejiyay, kadibna god canabka lagu shiido ayuu ka dhex qoday wuxuu kale oo ka dhex dhisay taalo dheer oo beerta lagu ilaaliyo. Kadibna wuxuu ka kireeyay niman beeraley ah wuxuuna aaday meel kale.

³⁴ Markii waqtigii gurashada la gaaray, ninkii beerta lahaa wuxuu soo diray qaar shaqaalihiisi ka mid ah si ey kiroolayaasha ugu tagaan oo qeybtiisi miraha ahayd uga soo qaadaan.

³⁵ “Laakiin kiroolayaashii ayaa shaqaalihii ninka qabtay oo kii koowaad garaacay, kii labaadna dilay, kii saddexaadna dhagax ku dilay.

³⁶ Kadib wuxuu u diray shaqaale kale kuwii hore ka badan, laakiin kiroolayaashii waxey ula dhaqmeen si la mida sidii ey kuwii hore ula dhaqmeen.

³⁷ Ugu dambayntii, wuxuu kiroolayaashii u soo diray wiilkiisi wuxuuna isku yiri, ‘Waxaa laga yaabaa iney xushmeeyaan.’

³⁸ “Laakiin kiroolayaashii markey arkeen wiilkii, waxey isku yiraahdeen, ‘Kani waa kii dhaxli lahaa beerta, kaalaya aan dilnee kadibna aan dhaxalno beerta.’

³⁹ Haddaba intey beerta canabka ah banaanka uga baxsheen ayey dileen.

⁴⁰ “Sidaa darteed, markii uu ninka beerta leh yimaado, muxuu ku sameyn doonaa kiroolayaashaas?”

⁴¹ Markaas ayaa gudoomiyayaashii wadaaddada iyo odayaashii ku jawaabeen, “Wuxuu u dili doonaa si aan naxariis lahayn. Kadibna wuxuu beertiisa ka kirayn doonaa dad markii waqtiga gurashada la gaaro qeybtiisa miraha ah siiya.”

⁴² Markaas ayuu Ciise iyagii ku yiri, “Miyeydan akhrisan qorniinka dhahaya, “ ‘Dhagaxii ey kuwa guriga dhisaya diideen ayaa noqday dhagaxa ugu muhiimsan dhismaha guriga, waxyaalahan Rabbiga ayaa sameeyay, anagana yaab ayey na la tahay’?

⁴³ “Sidaa darteed, waxaan idiin sheegayaa in boqortooyada Illaahey la idin ka qaadi doono lana siin doono dad mirro kasoo saara.

⁴⁴ Qofkii dhagaxan ku dul kufa wuu jajabi doonaa, kii uu ku soo kor dhacana wuu burburin doonaa.”

⁴⁵ Gudoomiyayaashii wadaaddada iyo Farrisiintii markey maqleen tusaalayaashii Ciise, wey ogaadeen inuu iyaga kaga hadlayay.

⁴⁶ Waxeyna rabeen iney qabtaan, laakiin waxey ka cabsadeen dadkii badnaa waayo dadku waxey Ciise u aaminsanaayeen inuu nebi yahay.