Matayos 20 - Ereyga Illaahey Axdiga Cusub

Tusaalihii shaqaalaha beerta canabka ah

¹ “Boqortooyada jannada waa sida nin dhul leh oo aroortii tagay si uu shaqaale ugu raadiyo beertiisa canabka ah.

² Wuxuu kula heshiiyay inuu maalintii siiyo hal diinaar, wuxuuna u diray beertiisi si ey uga shaqeeyaan.

³ “Mar ey tahay saddex saac oo subaxnimo ayuu haddana baxay wuxuuna arkay kuwa kale oo suuqa taagan oo shaqo la’aan ah.

⁴ Markaas ayuu ku yiri, ‘Idinkuna taga beertayda oo ka shaqeeya, waxaanna idin siin doonaa wax kasta oo sax ah.’

⁵ Kadibna beerta ayey aadeen. “Haddana lix saac oo duhurnimo iyo sagaal saac oo galabnimo ayuu baxay, mar walbana shaqaale ayuu beerta ku soo kordhiyay.

⁶ Haddana kow iyo toban saac oo galabnimo ayuu baxay wuxuuna arkay kuwa kale oo suuqa taagan, markaas ayuu weydiiyay, ‘Maxaad maanta oo dhan halkan u taagneydeen idinka oo aan waxba qabaneyn?’

⁷ “Markaas ayey ku jawaabeen, ‘Waayo qofna shaqo nooma dirsan.’ “Markaas ayuu ku yiri, ‘Idinkuna taga oo beertayda ka shaqeeya.’

⁸ “Markii fiidkii la gaaray, ayuu ninkii beerta lahaa u yeeray madaxii shaqaalaha wuxuuna ku yiri, ‘U yeer shaqaalaha siina mushaharkooda, adigoo ka bilaabaya kii ugu dambeeyay ee shaqada yimid una dambaysiinaya kii ugu horeeyay ee shaqada yimid.’

⁹ “Markey yimaadeen kuwii la shaqaaleysiiyay kow iyo toban saac oo galabnimo, ayaa waxaa la siiyay hal diinaar midkiiba.

¹⁰ Haddaba markey yimaadeen kuwii ugu horeeyay ee la shaqaaleysiiyay, waxey u maleynayeen iney wax kuwa kale ka badan heli doonaan. Laakiin mid walboo iyaga ka mid ah wuxuu helay hal diinaar.

¹¹ Waxey qaateen iyagoo ku gunuunacaya ninkii beerta lahaa.

¹² Waxey yiraahdeen, ‘Kuwan gadaal ka yimid waxey shaqeeyeen oo kaliya hal saac, waadna na la sintay inagu oo qoraxda ku shaqeyneynay maalintii oo dhan shaqada culeyskeedina qabanay.’

¹³ “Laakiin wuxuu ugu jawaabay midkood, ‘Saaxiib xaqdaro idin kuma sameyn. Miyaanan idin kula heshiin inaad iigu shaqeysaan hal diinaar?

¹⁴ Mushaharkaaga qaado oo tag. Waxaan rabaa inaan midkii ugu dambeeyay ee la shaqaaleysiiyay siiyo wax la mida waxaan adiga ku siiyay.

¹⁵ Miyaan xaq u lahayn inaan lacagtayda waxaan rabo ku sameeyo? Mise waxaad ka xun tahay inaan deeqsi ahay?’

¹⁶ “Haddaba kuwa sareeya wey hooseyn doonaan kuwa hooseeyana wey sareeyn doonaan.”

Ciise oo markii saddexaad dhimashadiisa sii sheegay

¹⁷ Intuu Ciise Yeruusaalem usii socday, ayuu laba iyo tobankii xertiisa ahaa gooni ula baxay wuxuuna ku yiri,

¹⁸ “Waxaan u soconaa Yeruusaalem, Wiilka Aadanahana waxaa loo gacangelin doonaa gudoomiyayaasha wadaaddada iyo macalimiinta sharciga Muuse. Waxey ku xukumi doonaan dil

¹⁹ Waxaana loo dhiibi doonaa dadka aan Yuhuudda ahayn si ey u bahdilaan oona garaacaan oo iskutallaabta loogu qodbo. Saddex maalmood kadibna wuu soo sarakici doonaa!”

Codsigii hooyada

²⁰ Kadib waxaa Ciise u yimid wiilashii Sebedi hooyadood oo ey wiilasheedi la socdaan, weyna u sujuuday iyadoo wax ka baryaysa.

²¹ Ciise ayaa ku yiri, “Maxaad rabtaa?” Markaas ayey ku tiri, “U ogolow in labadeydan wiil ey kaa kala fariistaan gacantaada midigta kan kalana fariisto bidixda boqortooyadaada dhexdeeda.”

²² Markaas ayaa Ciise ku yiri, “Ma garaneysaan waxaad weydisaneysaan, miyaad ka cabi kartaan koobka aan ka cabi doono?” Markaas ayey ku yiraahdeen, “Waan awoodnaa.”

²³ Ciisana wuxuu iyagii ku yiri, “Runtii waad ka cabi doontaan koobkeyga silaca ah, laakiin inaad midigtayda ama bidixdayda fariisataan anigu ma idiin ogolaan karo. Boosaskaas waxaa leh kuwa uu Aabahay u diyaariyay.”

²⁴ Markey tobankii kale ee xerta ahaa arintan maqleen, aad ayey uga xanaaqeen waxey labadii walaalaha ahaa sameeyeen.

²⁵ Laakiin Ciise ayaa iskugu yeeray oo ku yiri, “Waad garaneysaan sida ey boqorrada dadka aan Yuhuudda ahayn ugu taliyaan dadkooda, iyo sida ey madaxdu dadka awood ugu taliyaan.

²⁶ Laakiin idinku sidaas ha u dhaqmina. Qofkii raba inuu madax noqdo waa inuu dadka u adeego,

²⁷ qofkii raba inuu ugu hormarana waa inuu adoon oo kale idiin noqdo.

²⁸ Sida uusan Wiilka Aadanahu ugu imaan in loo adeego, laakiin inuu adeego, iyo inuu naftiisa u huro si uu kuwo badan u badbaadiyo.”

Labadii indhoole ee aragooda helay

²⁹ Markey Ciise iyo xertiisa Yerixoo kasii baxayeen, waxaa Ciise raacay dad badan.

³⁰ Laba nin oo indha la’ ayaa jidka dhiniciisa fadhiyay, oo markey maqleen inuu Ciise meesha marayo ayey qayliyeen, iyagoo leh, “Sayidow, ina Daa’uudow, noo naxariiso!”

³¹ Dadkii ayaa canaantay oo u sheegay iney aamusaan, laakiin aad ayey usii qayliyeen iyagoo leh, “Sayidow, Wiilkii Daa’uudow, noo naxariiso!”

³² Ciise ayaa joogsaday oo ku yiri, “Maxaad rabtaan inaan idiin sameeyo?”

³³ Waxeyna ku jawaabeen, “Sayidow, waxaan rabnaa inaan wax aragno.”

³⁴ Ciise intuu u naxariistay ayuu indhahooda taabtay. Isla markii ayey wax arkeen weyna raaceen.