Matayos 14 - Ereyga Illaahey Axdiga Cusub

Dhimashadii Yooxanaa Baabtiisaha

¹ Waqtigaas ayuu taliye Herodos maqlay warka ku saabsan Ciise,

² wuxuuna askartiisi ku yiri, “Kani waa Yooxanaa Baabtiisaha, wuxuu kasoo sarakacay dhimashada! Waana sababta uu u haysto awoodda mucjisooyinka lagu sameeyo.”

³ Herodos horay ayuu Yooxanaa u qabtay oo ku xiray xabsi Herodiya oo ahayd xaaska walaalkiis Filibos darteed,

⁴ waayo Yooxanaa ayaa isaga ku yiri, “Kuuma banaana inaad naagta walaalkaa guursatid.”

⁵ Herodos wuxuu rabay inuu dilo Yooxanaa, laakiin dadka ayuu ka cabsanayay, waayo dadku waxey Yooxanaa u haysteen nebi.

⁶ Markii la gaaray maalintii xuska dhalashada Herodos, gabadhii Herodiya ayaa si fiican martidii ugu ciyaartay aad ayeyna uga farxisay Herodos,

⁷ markaas ayuu ku dhaartay inuu siinayo wax walboo ey weydiisato.

⁸ Iyadoo ey hooyadeed horay ula soo talisay ayey tiri, “Saxan weyn iigu rid madaxa Yooxanaa Baabtiisaha.”

⁹ Boqorku wuu ka xumaa wuxuu ballan qaaday, laakiin ma uu rabin inuu jabiyo ballantii uu martida hortooda ku qaaday, haddaba wuxuu amray in dalabkeeda la yeelo,

¹⁰ oo Yooxanaa madaxa xabsiga looga soo gooyo.

¹¹ Waxaa la keenay madixiisi oo saxan ku jira waxaana la siiyay gabadhii, iyaduna waxey u geysay hooyadeed.

¹² Xertii Yooxanaa ayaa yimaadeen oo qaateen jirkiisi weyna duugeen. Kadibna waxey u sheegeen Ciise.

Ciise oo quudiyay shan kun oo qof

¹³ Markii uu Ciise maqlay dhimashadii Yooxanaa, wuxuu qaatay doon wuxuuna aaday dhinaca kale ee warta Galili si uu kaligiis u ahaado. Laakiin markey dadkii ogaadeen wey raaceen iyagoo ka kala yimid magaalooyin kala duwan.

¹⁴ Markii uu Ciise doontii ka dagtay oo uuna arkay dadkii badnaa, wuu u naxariistay wuxuuna bogsiiyay kuwoodi xanuusanaa.

¹⁵ Markii fiidkii la gaaray, ayey xertii Ciise u yimaadeen waxeyna ku yiraahdeen, “Meeshan waa meel cidlo ah, waqti dambe ayaana la joogaa, ee dadkan kala dir si ey tuulooyinka u tagaan oo ey cunto uga soo gataan.”

¹⁶ Ciise ayaa ugu jawaabay, “Uma baahna iney tagaan. Idinku siiya waxey cunaan.”

¹⁷ Xertii ayaa ku jawaabeen, “Waxaan halkan ku haynaa oo kaliya shan kibis iyo laba kalluun.”

¹⁸ Markaas ayuu Ciise ku yiri, “Halkan iigu keena.”

¹⁹ Wuxuuna dadkii u sheegay iney cawska fariistaan. Ciise intuu shantii kibis iyo labadii kalluun kor u qaaday oo uu cirka fiiriyay, ayuu Illaahey u mahadceliyay wuxuuna kala googooyay kibistii. Kadibna wuxuu u dhiibay xertii, xertiina waxey sii siiyeen dadkii.

²⁰ Dadkii oo dhan wey cuneen weyna dhargeen, xertiina waxey soo ururiyeen laba iyo toban dambiil oo jabab kibis ah ka buuxaan.

²¹ Tirada kuwa meeshaas wax ku cunay waxey ahaayeen shan kun oo nin marka laga reebo haweenka iyo caruurta.

Ciise oo ku dul socday biyo

²² Isla markiiba Ciise wuxuu xertii ku amray iney raacaan doon oo ey kaga hor maraan dhinaca kale ee warta intuu dadkii badnaa kala dirayay.

²³ Markii uu iyaga kala diray kadib ayuu kaligii aaday buurta dhinaceeda si uu u soo duceysto. Halkaas ayuuna habeenkii intiisi badnaa kaligiis joogay,

²⁴ doontiina aad ayey dhulka uga fogaatay, hirarkuna wey dhibayeen waayo dabaysha ayaa celineysay.

²⁵ Wax yar ka hor waaberiga ayuu Ciise iyaga u tagay, isaga oo biyaha warta ku dul soconaya.

²⁶ Markey xertii arkeen isaga oo biyaha warta ku kor socda, aad ayey u argagaxeen, waxeyna iyagoo qaylinaya yiraahdeen, “Waa ruuxaan.”

²⁷ Laakiin Ciise ayaa isla markiiba ku yiri, “Ha welwelina! Waa anigee. Ha cabsanina.”

²⁸ Markaas ayaa Butros u jawaabay oo ku yiri, “Sayidow, haddaad adiga tahay igu amar inaan kuugu imaado biyaha korkooda.”

²⁹ Ciise ayaa ku yiri, “Kaalay.” Kadib Butros doontii ayuu ka dagtay, biyihii ayuuna ku dul socday wuxuuna aaday dhinicii Ciise.

³⁰ Laakiin markii uu dabayshii arkay ayuu cabsaday, wuxuuna bilaabay inuu quuso markaas ayuu ku qayliyay, “Sayidow, i badbaadi!”

³¹ Isla markiiba Ciise intuu gacantiisa soo fidiyay ayuu qabtay wuxuuna ku yiri, “Iimaan yare yahow, maxaad u shakiday?”

³² Markii Ciise iyo Butros doontii fuuleen dabayshiina wey dagtay.

³³ Kadibna kuwii doonta saarnaa ayaa Ciise u sujuuday iyagoo leh, “Runtii waxaad tahay Wiilka Illaahey.”

³⁴ Ciise iyo xertiisi markey u gudbeen dhinaca kale, waxey yimaadeen dhulka Gennesared.

³⁵ Nimankii meeshaasna markey aqoonsadeen Ciise, ayey fariin u direen dhulalkii u dhawaa oo dhan. Waxeyna Ciise u keeneen dadkii xanuusanaa oo dhan

³⁶ waxeyna ka baryeen iney darafka maradiisa oo kaliya taabtaan, kuwii taabteyna wey bogsadeen.