Matayos 12 - Ereyga Illaahey Axdiga Cusub

Ciise waa Sayidka Sabtida

¹ Maalin Sabti ah Ciise iyo xertiisi waxey dhex marayeen beer badar ah, xertiisuna wey gaajeysnaayeen waxeyna bilaabeen iney sabuulladii goostaan oo cunaan.

² Markey Farrisiinti arintaas arkeen ayey Ciise ku yiraahdeen, “Fiiri xertaadu waxey sameynayaan wax aan banaaneyn maalinta Sabtida in la sameeyo.”

³ Ciise ayaa ugu jawaabay, “Miyeydan ka akhrisan qoraalka wixii Daa’uud iyo kuwii la jiray sameeyeen goortey gaajeysnaayeen?

⁴ Wuxuu galay guriga Illaahey, isaga iyo kuwii la socdeyna waxey cuneen kibistii goonida loo bixiyay taas oo ey sharci u ahayd iyaga iney sameeyaan laakiin wadaaddada kaliya.

⁵ Sidoo kalana miyaydnaan sharciga Muuse ka akhrinin wadaaddada macbadka ka shaqeynaya maalinta Sabtida ey jabinayaan sharciga Sabtida haddana eysan dembiile ahayn?

⁶ Waxaan idin ku leeyahay, waxaa halkan jooga mid macbadka ka weyn.

⁷ Haddaad ogaan lahaydeen waxey kitaabadu ula jeedeen markey dhahayeen, ‘Intaad allabariyo ii bixin lahaydeen midkiinba midka kale ha u naxariisto,’ kuwan eed la’aanta ah ma eydan xukunteen.

⁸ Waayo Wiilka Aadanahu waa Sayidka Sabtida.”

⁹ Ciise markii uu halkaas ka tagay wuxuu aaday sunagoggooda,

¹⁰ waxaana halkaas joogay nin gacanta curyaan ka ahaa. Qaar Farrisiinta ka mid ah oo Ciise sabab ey ku dacweeyaan raadinaya ayaa weydiiyay, “Miyay banaantahay in Sabtida wax la bogsiiyo?”

¹¹ Ciise ayaa ugu jawaabay, “Haddii midkiin leeyahay lax oo ey maalin Sabti ah god kaga dhacdo, miyuusan kasoo bixin lahayn?

¹² Haddaba intee ka badan ayuu qofku ka qiimo badan yahay lax! Sidaa darteed wey banaantahay in maalinta Sabtida wax wanaagsan la sameeyo.”

¹³ Kadib Ciise ninkii ayuu ku yiri, “Fidi gacantaada.” Isaguna wuu fidiyay, weyna bogsatay sida gacantiisa kale.

¹⁴ Laakiin Farrisiintii wey tageen waxeyna bilaabeen iney qorsheeyaan sidii ey Ciise u dili lahaayeen.

Illaahey adeegihiisa uu doortay

¹⁵ Markii uu Ciise ogaaday wixii ey Farrisiintu u qorshaynayeen, meeshii ayuu ka tagay dad badan ayaana raacay, wuuna bogsiiyay kuwoodi xanuusanaa oo dhan.

¹⁶ Wuxuuna uga digay in eysan qofna u sheegin wax isaga ku saabsan.

¹⁷ Taasina waxey ka dhabeyneysay wixii uu nebi Isayos sheegay isaga oo leh,

¹⁸ “Waa kan adeegaheygi aan doortay, kan aan jeclahay, oo iga farxiya. Waxaan siin doonaa Ruuxeyga, wuxuuna quruumaha dhexdooda ka dhalin doonaa cadaalad.

¹⁹ Ma murmi doono mana qaylin doono, codkiisana jidadka lagama maqli doono.

²⁰ Caws qaloocan xitaa ma jabin doono, liifad qiiqaysana ma damin doono, illaa uu ugu dambaynta si cadaalad ah u guuleysto.

²¹ Quruumuhu magaciisa ayey rajadooda saaran doonaan.”

Ciise iyo Be’elsebul

²² Dad ayaa Ciise u keenay nin ruuxyo wasakh leh qaba oo indhoole ah sidoo kalana aan hadli karin, Ciisana wuu bogsiiyay, ninkiina wuu awooday inuu hadlo waxna arko.

²³ Dadkii oo dhan wey yaabeen waxeyna yiraahdeen, “Ma laga yaabaa inuu yahay Wiilkii Daa’uud?”

²⁴ Laakiin markey Farrisiintii arintaas maqleen ayey yiraahdeen, “Wuxuu ruuxyada wasakhda leh ku saaraa awoodda Be’elsebul oo ah amiirka ruuxyada wasakhda leh.”

²⁵ Ciise wuu ogaa waxey ku fikirayeen wuxuuna ku yiri, “Boqortooyo walboo iska soo horjeesata wey burburaysaa, magaalo walba iyo guri walboo iska soo horjeestana ma sii jiri doonaan.

²⁶ Sidaa darteed haddii Shaydaanku bixiyo Shaydaanka, wuu iska soo hor jeestay. Haddaba sidee ayey boqortooyadiisu usii jiraysaa?

²⁷ Haddii aan anigu ruuxyada wasakhda leh ku bixiyo awoodda Be’elsebul, dadkiinu maxey ku bixiyaan? Iyaga ayaa idin xukumi doona.

²⁸ Laakiin haddii aan ruuxyada wasakhda leh ku saaray Ruuxa Illaahey, haddaba boqortooyada Illaahey wey idiin timid.

²⁹ “Sidee ayey ku dhici kartaa in qof galo guriga nin xoog leh kadibna uu hantidiisa xado hadduusan marka hore ninka xoogga leh xirin? Kadib wax walba wuu ka dhici karaa.

³⁰ “Qof walboo aan ila jirin wuu iga soo horjeedaa, qof walboo aan ila ururinna wuu kala firdhiyaa.

³¹ Sidaa darteed waxaan idin ku leeyahay, dembi walba iyo caay walba waa la cafin karaa, laakiin caayda la caayo Ruuxa Quduuska ah lama cafin doono.

³² Qofkii wax ka sheega Wiilka Aadanaha waa la cafin karaa, laakiin qofkii wax ka sheega Ruuxa Quduuska lama cafin doono, waqtigan iyo waqtiga imaan doonaba.

³³ “Haddii aad mirro wanaagsan rabto geed wanaagsan abuur, haddii aad geed xun abuurto waxaad heli doontaa mirro xun, waayo geedka mirihiisa ayaa lagu gartaa.

³⁴ Dhasha abeesadow, sidee ayaad idinka oo shar leh wax wanaagsan ugu hadli kartaan? Waayo afku wuxuu ku hadlaa waxa qalbiga ka buuxa.

³⁵ Qofka wanaagsan wuxuu soo saaraa waxyaalaha wanaagsan ee qalbigiisa ku jira, qofka sharta lehna wuxuu soo saaraa waxyaalaha sharta ah ee qalbigiisa ku jira.

³⁶ Laakiin waxaan idin ku leeyahay maalinta wax la xukumayo, qof walba waa lagula xisaabtami doonaa hadalkii macno darada ahaa ee uu ku hadlay.

³⁷ Waayo hadalladaada ayaa cadayn doona inaad xaq tahay iyo in kale, hadalladaada ayaana lagugu xukumi doonaa.”

Calaamaddii Yoonis

³⁸ Qaar ka mid ah Farrisiintii iyo macalimiinta sharciga Muuse ayaa Ciise ku yiri, “Macalinow, calaamad inaad na tusto ayaan rabnaa.”

³⁹ Ciise ayaa ugu jawaabay, “Qoom shar leh oo sino badan ayaa calaamad raba! Laakiin calaamad lama siin doono calaamaddii nebi Yoonis maahee.

⁴⁰ Waayo siduu Yoonis saddex habeen iyo saddex maalmood ugu jiray calooshii nibiriga ayuu Wiilka Aadanahuna saddex habeen iyo saddex maalmood ku jiri doonaa xudunta dhulka.

⁴¹ Dadkii Ninewehna wey idin la istaagayaan maalinta xukunka oo idin eedeyn doonaan waayo iyagu waxey ku toobadkeeneen wacdigii Yoonis, bal fiiri maanta mid Yoonis ka weyn ayaa halkan jooga.

⁴² Maalintii xukunka markii la gaaro, boqoradda Koonfureed ayaa idin la istaageysa oo idin dacweyn doonta, waayo meesha dhulka ugu fog ayey kasoo safartay si ey u maqasho xigmaddii Sulaymaan. Halkanna waxaa jooga mid Sulaymaan ka weyn.

⁴³ “Markii ruux wasakh leh qof ka baxo wuxuu dul maraa meel qalalan isaga oo raadinaya meel uu ku nasto.

⁴⁴ Kadib ayuu isku yiraahdaa, ‘Waxaan ku laabanayaa gurigeygi aan kasoo baxay.’ Markii uu yimaado meeshii wuxuu helaa gurigii oo cidla ah oo nadiif ah oona hagaajisan.

⁴⁵ Kadibna dib ayuu u laabtaa wuxuuna soo wataa toddoba ruux oo kale oo isaga kasii xun, weyna galaan oo halkaas ayey ku noolaadaan, qofkaasna xaaladiisa dambe ayaa ka darnaata sidii uu markii hore ahaa. Sidaas ayeyna ahaan doonaan jiilkan sharta badan.”

Ciise hooyadiis iyo walaalihiis

⁴⁶ Ciise oo weli la hadlaya dadkii badnaa, ayaa waxaa banaanka soo istaagay hooyadiis iyo walaalihiis, iyagoo raba iney la hadlaan.

⁴⁷ Qof ayaana Ciise ku yiri, “Hooyadaa iyo walaalahaa ayaa banaanka taagan, waxeyna rabaan iney kula hadlaan.”

⁴⁸ Ciise ayaa ugu jawaabay, “Yaa hooyaday ah, yaana walaalahay ah?”

⁴⁹ Kadib intuu xertiisi farta ku fiiqay ayuu yiri, “Waa kuwan hooyaday iyo walaalahay.

⁵⁰ Mid walboo sameeya doonista Aabahayga jannada ku jira ayaa walaalkay iyo walaashay iyo hooyadayba ah.”