Markos 7 - Ereyga Illaahey Axdiga Cusub

Waxyaalaha qofka nijaaseeya

¹ Haddaba qaar ka mid ah Farrisiintii iyo macalimiintii sharciga Muuse oo ka yimid Yeruusaalem ayaa ku soo ag ururay Ciise,

² waxeyna arkeen xertii qaarkood oo cunteynaya iyagoo gacmahooda wasaq ah oo aan la dhaqin.

³ Waayo Farrisiinta iyo Yuhuudda wax ma cunaan iyagoo aan gacmaha dhaqanin si ey u ilaaliyaan caadada odayaasha.

⁴ Markey wax suuqa ka iibsadaanna ma cunaan iyagoo aan dhaqin. Waxyaalo badan oo dhaqankooda ku saabsan ayaa jira oo ey ilaaliyaan, sida dhaqitaanka koobka, jeega iyo jalmad naxaas ah.

⁵ Markaas ayaa Farrisiintii iyo macalimiintii sharciga Muuse weydiiyeen Ciise, “Xertaadu maxaysan u ilaalin dhaqanka odayaasha, waayo gacmahooda wasaq leh oo aan la dhaqin ayey wax ku cunaan?”

⁶ Markaas ayuu Ciise ugu jawaabay, “Nebi Isayos wuu saxsanaa markii uu sii sheegay waxa idin ku saabsan labawejiilayaal yahow, sida qoran, “ ‘Dadkan waxey igu qadariyaan afkooda, laakiin qalbiyadoodu aad ayey iiga fog yihiin.

⁷ Si been ah ayey ii caabudaan, waxeyna dadka baraan amarro binu aadanku sameeyay.’

⁸ Oo waxey ka tageen amarrada Illaahey waxeyna haystaan waxbaridii binu aadanka.”

⁹ Hadalkii ayuu sii watay, “Waxaad iska dheggo tirteen amarrada Illaahey si aad dhaqankiina u ilaalisaan!

¹⁰ Waayo Muuse ayaa yiri, ‘Aabahaa iyo hooyadaa xushmee, oo qofkii caaya aabihiis ama hooyadiis waa in la dilaa.’

¹¹ Laakiin waxaad dhahdaan ma banaana in qof uu siiyo hooyadiis iyo aabihiis maalkiisa hadduu ku yiraahdo Illaahey ayaan hadiyad ugu baxsaday wixii aan idin siin lahaa.

¹² Kadibna mar dambe uma ogolaanaysaan inuu waalidkiis caawiyo.

¹³ Sidaa darteed awooddii ereyga Illaahey waxaad ku burburiseen waxbaridiina.”

¹⁴ Markaas ayaa Ciise haddana dadkii badnaa iskugu yeeray oo ku yiri, “Bal kuligiin i dhageysta oo arintan fahma.

¹⁵ Cuntadaad cuntid kuma nijaaseynayso, laakiinse waxa qofka nijaaseeya waa waxa qalbigiisa kasoo baxa. [

¹⁶ Qofkii dheggo wax lagu maqlo leh ha maqlo.”]

¹⁷ Markey ka tageen dadkii badnaa oo ey galeen guriga ayaa xertii weydiiyeen Ciise waxyaalo ku saabsan tusaalahaan.

¹⁸ Markaas ayuu u jawaabay oo ku yiri, “Idinkuna ma fahmi weydeen? Miyeydan ogayn in waxaad cuntid eysan ku nijaaseynin?

¹⁹ Waayo waxyaalahaas qalbiga ma galaan ee caloosha ayey galaan kadibna suuliga la geeyo.” (Ciise markii uu waxyaalahan ka hadlayay cuntada oo dhan ayuu xalaal ka dhigay.)

²⁰ Ciise hadalkii ayuu sii watay, “Waxa qofka kasoo baxa ayaa nijaaseeya.

²¹ Waayo qalbigeena waxaa kasoo baxa, fikradaha sharta leh, sinada, tuugnimada iyo dilka,

²² gogol dhaafka, damaca, hungurinimada, xaasidnimada, been sheegida, kufsiga, il xumada, caayda, camal xumaanta iyo kibirka.

²³ Waxyaalahan oo dhan qalbiga ayey ka yimaadaan oo waxey nijaaseeyaan qofka.”

Iimaankii naagta aan Yuhuudda ahayn

²⁴ Ciise halkaas wuu ka tagay oo wuxuu aaday meel u dhaw magaalada Turos. Qof ayuu gurigiisa joogay oo ma uusan dooneyn in dadku ogaadaan meesha uu joogo, laakiin dadkii wey ogaadeen meesha uu joogay.

²⁵ Markaas ayaa naag gabadheeda ruux wasakh leh qabtay maqashay halkii uu Ciise joogay. Isla markiina wey u timaaday oo lugihiisa isku tuurtay.

²⁶ Naagtu waxey ahayd Gariig waxeyna ku dhalatay Suuriyadii Foynike. Waxeyna ka bariday Ciise inuu gabadheeda ruuxyada wasakhda leh ka saaro.

²⁷ Markaas ayaa Ciise ku yiri, “Marka hore caruurtayda ha dhergaan, waayo ma wanaagsana in caruurta kibistooda laga qaado oo loo tuuro eeyaha.”

²⁸ Markaas ayey haweeneydii ku jawaabtay, “Rabbiyow, xitaa eeyuhu miiska caruurta ku cunteynayaan hoos fadhiyaanba waxey cunaan jajabka caruurta ka dhacay.”

²⁹ Kadibna Ciise wuxuu iyada ku yiri, “Jawaabtaad i siisay darteed ruuxyadii wasakhda lahaa gabadha wey ka baxeen ee tag.”

³⁰ Markey guriga tagtay waxey aragtay cunugteeda oo sariirta ku jiifta oo ruuxyadii wasakhda lahaana ka baxeen.

Ciise wuxuu bogsiiyay nin aan hadli karin

³¹ Kadib Ciise wuxuu ka tagay deegaankii Turos ku dhawaa, wuxuuna maray Siidoon oo yimid wartii Galili illaa gobolka Dekabolis.

³² Halkaas isaga oo jooga ayaa dadkii u keeneen nin dhagool ah oo aan si fiican u hadli karin, markaas ayey Ciise ka baryeen inuu bogsiiyo isaga.

³³ Markaas ayaa Ciise dadkii badnaa ninkii ka dhex saaray oo dhinac ugula baxay, oo farahiisa ayuu dhegta ka geliyay, kadibna gacantiisi ayuu candhuuf mariyay oo ku taabtay ninkii carrabkiisa.

³⁴ Markaas ayuu samada fiiriyay oo ninkii ku yiri, “Efata,” taas oo macnaheedu tahay, “Furan!”

³⁵ Isla markiiba dhegahiisi wey furmeen oo carrabkiisina wuu dabcay oo wuxuuna bilaabay inuu si fiican u hadlo.

³⁶ Ciisana wuxuu iyagii ku amray in eysan qofna u sheegin arintan. Laakiin siduu usii amrayay ayey iyagana usii sheegayeen.

³⁷ Dadka aad iyo aad ayey u yaabeen oo waxey yiraahdeen, “Wax walba si wanaagsan ayuu u sameeyaa, wuxuu bogsiiyay qof aan wax maqli karin oo xitaa hadalku dhibo.”