Markos 5 - Ereyga Illaahey Axdiga Cusub

Ciise oo bogsiiyay nin ruuxyo wasakh leh qabay

¹ Markii ey wartii kasoo gudbeen ayey waxey yimaadeen gobolka Gadareni.

² Ciise markii uu doontii ka degtay ayaa nin ruuxyo wasakh leh qabay oo xabaalaha ku noolaa u yimaaday.

³ Ninkani wuxuu ku noolaa xabaalaha oo qofna isaga ma xiri karin, xitaa silsiladu ma eysan xijin karin.

⁴ Mar walba waxaa lugta iyo gacanta looga xiri jiray silsilad, laakiin silsiladii iyo birtii ayuu jabin jiray, oo qofna ma awoodin inuu xiro xoogga uu lahaa dartiis.

⁵ Habeen iyo maalin ayuu joogi jiray xabaalaha iyo meelaha buuraha ah, isaga oo qaylinaya dhagaxyana isku jarjaraya.

⁶ Laakiin goortii uu Ciise meel dheer ka arkay ayuu u soo orday oo hortiis jilba jabsaday.

⁷ Markaas ayuu cod dheer ku qayliyay oo yiri, “Maxaad iga rabtaa, Ciisow, Wiilka Illaaha ugu Sareeyow? Ballan magaca Illaahey iiga qaad in aadan i ciqaabin!”

⁸ Markaas ayaa Ciise isaga ku yiri, “Kasoo baxa ninkan, Ruux yahow wasakhda leh!”

⁹ Markaas ayuu Ciise weydiiyay isaga, “Magacaa?” Ninkii ayaa ku jawaabay oo yiri, “Magacaygu waa Liijon, waayo waan badanahay.”

¹⁰ Aad ayey Ciise uga baryeen in uusan agagaarkaas ka saarin.

¹¹ Waxaa buurta halkaas u dhaw daaqayay doofaarro badan.

¹² Markaas ayaa ruuxyadii wasakhda lahaa Ciise ka baryeen oo ku yiraahdeen, “Doofaarradaas noo dir, noo ogolow inaan iyaga galno.”

¹³ Markaas ayaa Ciise u fasaxay, oo ruuxyadii wasakhda lahaa ninkii ayey kasoo baxeen oo waxey galeen doofaarradii. Isla markiiba doofaarradii oo gaaraya laba kun ayaa hoos u daadagay oo ku yaacay warta, biyihii ayaana laqay.

¹⁴ Kuwii doofaarrada daajinayay ayaa u cararay magaalada iyo agagaarkeeda oo arintii dadka u sheegay, dadkiina wey yimaadeen si ey u arkaan waxyaalihii dhacay.

¹⁵ Markii dadkii Ciise u yimaadeenna waxey arkeen ninkii ruuxyada wasakhda leh qabi jiray oo fadhiya, isaga oo caqligiisu fiicanyahay oo dhar fiican qaba, aad ayeyna u cabsadeen.

¹⁶ Kuwii arkay wixii dhacay ayaa dadka kale u sheegay waxa ku saabsan ninkii ruuxyada wasakhda leh qabi jiray iyo doofaarrada.

¹⁷ Markaas ayaa dadkii Ciise ka baryeen inuu deegaankooda ka tago.

¹⁸ Ciise goortii uu doonta fuulay oo baxayay ayaa ninkii ruuxyada wasakhda leh laga saaray ka baryay inuu isaga soo raaco.

¹⁹ Ciisana uma ogolaan, laakiin wuxuu ku yiri, “Bax oo dadkaaga u tag oo u sheeg wuxuu Rabbigu kuu sameeyay, iyo siduu kuugu naxariistay.”

²⁰ Markaas ayuu ninkii tagay oo bilaabay inuu ka sheego Dekabolis wixii uu Ciise u sameeyay isaga. Dadkiina aad ayey u yaabeen.

Ciise oo bogsiiyay naag xanuusan sarakiciyayna gabar dhimatay

²¹ Kadib markii uu Ciise doonta fuulay oo u laabtay dhinaca kale ee warta, dad badan ayaa ku soo ag ururay.

²² Kadibna nin hogaamiye sunagogga ka ahaa oo magaciisuna yahay Yayros ayaa yimaaday, markii uu Ciise arkay ayuu lugahiisi ku dhacay.

²³ Aad ayuu uga baryay isaga oo leh, “Gabadheydi waa sakaraad ee fadlan kaalay oo gacantaada saar si ey u bogsato oo ey u noolaato.”

²⁴ Sidaa darteed Ciise wuu raacay isaga. Dad badanna wey raaceen oo agtiisa ayey isku ciriiriyeen.

²⁵ Dadkii badnaa dhexdooda waxaa ku jiray haweeyney laba iyo toban sano dhiig ka socday.

²⁶ Dhakhtarro badan ayey u tagtay laakiin ma eysan bogsan xitaa waxey haysatay oo dhan ayey ku bixisay laakiin intey bogsan lahayd wey kasii daraysay.

²⁷ Markey Ciise warkiisa maqashay ayey dadkii soo dhex martay oo ey gadaashiisa timid, markaas ayey maradiisa taabatay,

²⁸ waayo waxey isku tiri, “Haddii aan maradiisa taabto waan bogsan doonaa.”

²⁹ Isla markiina dhiiggii ka socday wuu joogsaday oo waxey jirkeeda ka dareentay in cudurkii laga xoreeyay.

³⁰ Isla waqtigaasba Ciise wuxuu gartay in xoogga wax lagu bogsiiyo isaga ka baxay. Markaas ayuu dadkii badnaa u jeestay oo weydiiyay, “Yaa dharkeyga taabtay?”

³¹ Markaas ayaa xertiisi u jawaabeen oo yiraahdeen, “Waad u jeedaa dadkan badan oo kugu ag ururay, sidee ayaad u weydiin kartaa, ‘Yaa i taabtay?’ ”

³² Laakiin Ciise dadkii ayuu fiiriyay si uu u arko qofka isaga taabtay.

³³ Kadib naagtii oo ogaatay in la bogsiiyay ayaa timaaday oo cagihii Ciise ku dhacday, iyadoo cabsi la giriiraysa, oo sheegtay runtii wixii ey sameysay.

³⁴ Ciise ayaa ku yiri, “Gabadheydiyey iimaankaaga ayaa ku bogsiiyay. Nabad ku tag oo ka xorrow xanuunkii ku hayay.”

³⁵ Ciise oo weli hadlaya ayaa kuwa ka yimaadeen gurigii Yayros, kaasoo hogaamiyaha sunagogga ahaa, oo ku yiraahdeen, “Gabadhaadi wey dhimatay, ee macalinka maxaad u dhibaysaa?”

³⁶ Ciise markii uu arintan maqlay ayuu ku yiri Yayros kan sunagogga hogaamiya, “Ha cabsan ee iimaan lahaw.”

³⁷ Qofna uma ogolaan inuu raaco waxaanan ka ahayn Butros, Yacquub iyo Yooxanaa.

³⁸ Markey yimaadeen gurigii Yayros kan sunagogga hogaamiya ayaa waxey arkeen dadkii oo ooynaya oo aad u barooranaya.

³⁹ Ciise intuu gurigii galay ayuu ku yiri, “Maxaad u buuqaysaan oo aad u ooyneysaan? Cunugtu ma dhimanin ee wey jiiftaa.”

⁴⁰ Laakiin wey ku qosleen isaga. Markaas ayuu Ciise iyagoo dhan banaanka u saaray oo la haray gabadha waalidkeed iyo xertiisi, oo waxey galeen gabadhu halkii ey jiiftay.

⁴¹ Gabadhii ayuu gacanta qabtay oo ku yiri, “Talita qumi!” (Taas oo macnaheedu yahay “Yariisay, waxaan kugu leeyahay kac!”)

⁴² Isla markiiba gabadhii wey kacday oo waxey bilowday iney socoto. Dadkii oo dhan ayaa aad uga yaabeen arintan.

⁴³ Laakiin Ciise wuxuu iyaga ku amray in eysan qofna u sheegin arintaas, wuxuuna u sheegay iney cunto siiyaan gabadha.