Galatiya 5 - Ereyga Illaahey Axdiga Cusub

Xoriyadda Masiixa lagu helo

¹ Waa xoryad Masiixu nagu xoreeyay. Haddaba ku adkeysta, mar kalana naftiina ha u ogolaanina culeyska harqoodka adoonsiga.

² Dhageysta, aniga Bawlos ah waxaan idin ku leeyahay, haddii aad isku haleyneysaan gudniinka si aad Illaahey hortiisa kuwo xaq ah ugu noqotaan, Masiixu micno la’aan ayuu idiin ahaanayaa.

³ Haddana waxaan idin leeyahay nin walboo gudniinka maro wuxuu ku qasbanyahay inuu adeeco sharcigoo dhan.

⁴ Waayo haddii aad isku daydo in aad xaq ku noqoto adigoo adeecaya sharciga, ajnabi ayaad ka tahay Masiixa oo waadna ka fogaatay nimcadiisa.

⁵ Waxaan xaga Ruuxa si xamaasad leh rumeysad ugu sugeynay xaqnimada taas oo aan rajeyneyno.

⁶ Waayo xagga Ciise Masiix Gudniin iyo gudniin la’aanba midkoodna waxba kama aha. Waxa kaliya oo muhiimka ah waa iimaanka kaasoo kaa dhigaya inaad kuwa kale jeclaatid.

⁷ Si wanaagsan ayaad u ordeyseen. Yaa gadaal idiin reebay si eydan runta u raacin?

⁸ Qanaacada noocaas ah ka ma imaan midka idiin yeeray.

⁹ “Khamiir yar ayaa faxiya cajiin badan.”

¹⁰ Waxaan ku kalsoonnahay Illaahey inuu idin ka ilaaliyo wax baritaanka beenta ah. Illaahey wuu xukumi doonaa qofkaas, qof alla qofka uu yahayba waa la ciqaabi doonaa.

¹¹ Walaalayaalow haddii aan weli ku wacdinayo waxa ku saabsan gudniinka maxaa la ii silcinayaa? Xaaladaas darteed dembiga iskutallaabta waa la baabi’iyay.

¹² Waxaan jeclaan lahaa kuwa dhibka wada oo idin gudi raba iney iyagana is gudaan.

Ku noolaashada Ruuxa

¹³ Walaalayaalow waxaa la idiin kugu yeeray inaad xor ahaataan. Laakiin xornimadiina ha u isticmaalina inaan jirkiina kaga farxisaan. Laakiin dhexdiina iskugu adeega indinkoo jaceyl istusaya.

¹⁴ Waayo sharcigoo dhan wuxuu ku dhaboobaa halkaas amar haddii la ilaaliyo, “U jeclaw deriskaaga sida aad isu jaceshahay.”

¹⁵ Laakiin haddii aad isku weerartaan sida xayawaan duureedka, waa inaad is ilaalisaan waayo waad is dhameyn doontaan.

¹⁶ Sidaa darteed waxaan idin leeyahay Ruuxa ku socda. Markaasna ma sameyneysaan waxyaalaha uu jirkiinu rabo.

¹⁷ Waayo jirku wuxuu rabaa wax ka duwan Ruuxa, Ruuxuna wuxuu rabaa wax ka duwan jirka. Wey iska soo hor jeedaan, si aadan u sameynin waxyaalaha aad rabto.

¹⁸ Laakiin haddii uu Ruuxu ku hogaaminayo sharciga kuma hoos jirtid.

¹⁹ Waxyaalaha uu jirku rabo waa, sinada, wasakhnimo, dhaqan xumo,

²⁰ sanam caabudida iyo sixir, naceyb, khilaaf, maseyr, xanaaq, hamiga, daneysiga, kala qeybsamid.

²¹ Damac, sarqaamid, rabshooyin iyo dembiyo kale oo la mid ah. Waan idin waaninayaa mar labaad, kuwa xaaladdaas ku nool ma dhaxli doonaan boqortooyada Illaahey.

²² Laakiin hadiyada Ruuxa waa jaceyl, farxad, nabad, isu dulqaadashado, naxariis, wanaag, aaminaad,

²³ dabacsanaanta iyo is celinta. Waxyaalahan sharci ma aha.

²⁴ Kuwa Ciise Masiix raacsan wey qodbeen jirkooda iyo waxyaalihii uu jirkoodu rabay.

²⁵ Haddii aan Ruuxa ku nool nahay, Ruuxu ha nagu hogaamiyo waxyaalaha aan nolosheena ka sameyno oo dhan.

²⁶ Yaanu kibrin oo aan kuwa kale xumaan dareensiinin, anaga oo isku arkayna inaan iyaga ka fiicannahay.