Falimaha 26 - Ereyga Illaahey Axdiga Cusub

¹ Markaas ayaa Agribba ku yiri Bawlos, “Waad u fasaxantahay inaad nafsadaada u hadashid.” Haddaba Bawlos intuu gacan haatiyay ayuu yiri,

² “Boqor Agribbow, waxaan isku arkaa qof nasiib leh maanta inaan hortaada istaago oo aan iskaga difaaco waxyaalihii ey Yuhuudda igu soo dacweeyeen oo dhan.

³ Adigoo weliba wax badan ka garanaya waxyaalaha ku saabsan dhaqanka Yuhuudda iyo kala duwanaanshadooda. Sidaa darteed waxaan kaa baryayaa inaad ii dulqaadatid oo aad i maqashid.

⁴ “Dadka Yuhuudda oo dhan wey ogyihiin sidaan u noolaa illaa yaraanteydi, wey garanayaan noloshii aan ku noolaa waddankeyga iyo xitaa Yeruusaalem.

⁵ Muddo dheer ayey i yaqaanaan weyna ka marqaatifuri karaan, haddii ey doonayaan, inaan ka mid ahaa dariiqada ugu adag ee diinteena, oo aan u noolaa sida Farrisi.

⁶ Haddaba waxaa la igu xukumayaa rajada aan ka qabo Illaahey ballantiisa oo uu ka ballan qaaday awoowayaasheen taas oo maanta la igu haysto.

⁷ Ballantan waa ballantii ey laba iyo tobankii qabiil rajeynayeen in la oofiyo iyagoo Illaahey u adeegaya habeen iyo maalin. Boqor Agribbow, rajadan darteed ayey Yuhuuddu igu dacweyneysaa.

⁸ Muxuu midkiina isu leeyahay ineysan suurtagal ahayn inuu Illaahey sarakiciyo meydka?

⁹ “Aniga xitaa waxyaala badan ayaan sameeyay si aan uga hor imaado magaca Ciisihii reer Naasared.

¹⁰ Saas ayaan ku sameeyay Yeruusaalem. Aniga oo amar ka qaatay gudoomiyayaashii wadaaddada waxaanna dadka Illaahey gelin jiray xabsi, oo xitaa waan ku raacsanaa in la dilo.

¹¹ Marar badan ayaan intaan sunagogyada ku wareegsado ayaan ciqaabi jiray, oo waxaan ku qasbi jiray iney Ciise wax xun ka sheegaan. Aad ayaan ugu xanaaqi jiray iyaga, oo illaa magaalooyin kale intaan u raaco ayaan silcin jiray.

¹² “Maalin aniga oo Dimishaq u socda oo wata amarkii iyo dardaarankii gudoomiyayaashii wadaaddada.

¹³ Boqor Agribbow duhuradii markii la joogay, waxaan arkay iftiin ka yimid samada, qoraxda wuu ka iftiin badnaa, wuuna nagu ifay aniga iyo kuwii ila socdayba.

¹⁴ Markaas ayaan dhulka ku wada dhacnay, oo waxaan maqlay cod af cibraaniga igu dhahayo, ‘Sawlosow, Sawlosow, maxaad ii silcineysaa? Waxaad la dagaaleysaa Illaahey laakiin adiga ayaa is dhibaateynaya.’

¹⁵ “Kadib ayaan weydiiyay, ‘Yaa tahay, Sayidow?’ “Rabbigu wuxuu ku jawaabay, ‘Waxaan ahay Ciise kan aad silcineysid.

¹⁶ Haddaba kac, waxaan kuugu muuqday waa inaad noqotid adeegaheyga oo aad iigu marqaatifurto waxaad aragtay iyo waxaan ku tusi doono taas oo aan kuu doortay.

¹⁷ Dadkaaga ayaan kaa badbaadin doona iyo dadka aan Yuhuudda ahaynba iyaga ayaan kuu dirayaa

¹⁸ si aad indhaha ugu furto oo ey uga jeestaan mugdiga oo ey u jeestaan iftiinka, iyo iney kasoo jeestaan xoogga Shaydaanka oo ey Illaahey ugu jeestaan, si ey u helaan cafiska dembiga oo markey i rumeysataan waxey ka mid ahaan doonaan kuwa xaqa ah.’

¹⁹ “Sidaa darteed Boqor Agribbow, waan raacay riyadaan ka timid samada.

²⁰ Marka hore waxaan u wacdiyay kuwa jooga Dimishaq, kadibna kuwa jooga Yeruusaalem iyo Yahuudiya oo dhan, iyo dadka aan Yuhuudda ahayn, iney toobadkeenaan oo Illaahey u noqdaan iyo in waxyaalaha ey sameeyaan laga garto iney toobadkeeneen.

²¹ Sababtaas ayaa Yuhuudda qaar macbadka iigu qabteen oo ey isku dayeen iney i dilaan.

²² Laakiin aniga oo caawimaad Illaahey ka helay ayaa illaa maantadan taagan inaan u marqaatifuro kuwa taajirka ah iyo masaakiintaba. Waxa kaliya ee aan u sheegay waa waxyaalihii ey nebiyada iyo sharcigii Muuse sheegeen oo dhici doona.

²³ Masiixa wuu silci doonaa oo wuxuu noqon doonaa kii ugu horeeyay ee dhimashada kasoo sarakacay, si uu dadkiisa iyo dadka aan Yuhuudda ahayn iftiin ugu keeno.”

²⁴ Bawlos inta uusan hadalkii dhameysanin ayaa Feestos kasoo dhex galay oo ku yiri, “Waad waalantahay Bawlos, aqoonta badan ayaa ku waalaysaa.”

²⁵ Markaas ayaa Bawlos uga jawaabay, “Ma waalni, Mudane Feestos, waxaan sheegayo waa run waana caqli gal.

²⁶ Boqorku wuu garanayaa waxyaalahan oo cabsi la’aan ayaan isaga ula hadlayaa. Waan ku qanacsanahay in waxyaalahan oo dhan si qarsoon uma dhicin.

²⁷ Boqor Agribbow, miyaad aaminsantahay nebiyada? Waan ogahay inaad aaminsantahay.”

²⁸ Markaas ayaa Agribba Bawlos ku yiri, “Ma waxaad u maleynaysaa inaad waqtigan yar gudihiisa iigu qancin kartid inaan noqdo masiixi?”

²⁹ Bawlos ayaa u jawaabay oo ku yiri, “Waqti gaaban ama waqti dheer hanoqotee, waxaan maanta Illaahey ka baryayaa in qof walboo i dhageysanayo noqdo waxaan ahay, waxaan silsiladaan ka ahayn.”

³⁰ Markaas ayaa boqorkii, Taliye Feestos, Bernikee iyo qof walboo la jiray wada kaceen.

³¹ Laakiin inteysan tagin ka hor ayey waxey isdhaheen, “Ninkan ma sameynin qalad ah oo lagu dilo ama wax xabsi lagu geliyo.”

³² Agribbana wuxuu Feestos ku yiri, “Ninkan mar hore ayaa la soo dayn lahaa haddii uusan dhihi lahayn Kaysar ayaan u dacwoonayaa.”