Falimaha 16 - Ereyga Illaahey Axdiga Cusub

Timoteyos oo ku soo biiray Bawlos iyo Silas

¹ Bawlos wuxuu u safray Derbe iyo Lustara, halkaasna waxaa joogay nin xer ah oo la yiraahdo Timoteyos. Hooyadiis waxey ahayd Yuhuudiyad masiixiyad ah laakiin aabihiis wuxuu ahaa Gariig.

² Walaalihii joogay Lustara iyo Ikoniyon ayaa hadalo fiican isaga ka sheegay.

³ Bawlos wuxuu doonayay inuu safarka usii kaxeysto, markaas ayuu waday oo guday, waayo Yuhuudda meelahaas joogtay oo dhan wey garanayeen Timoteyos aabihiis inuu yahay Gariig.

⁴ Bawlos iyo kuwa kale ayaa tagay magaalooyin, waxey kuwii walaalaha ahaa u sheegeen wixii rasuulladii iyo odayaashii joogay Yeruusaalem go’aansadeen iney raacaan.

⁵ Sidaa darteed kaniisadihii waxey ku koreen iimaanka oo maalin walba wey sii kordhayeen.

Riyadii Bawlos ee Taroo’as

⁶ Bawlos iyo saaxibbadiis waxey dhex mareen dhulka Farugiya iyo Galatiya, laakiin Ruuxa Quduuska ah ma u ogolaan iney Aasiya ka wacdiyaan.

⁷ Markey yimaadeen Musiya, waxey isku dayeen iney galaan Bituniya, laakiin Ruuxii Ciise ayaan u ogolaan.

⁸ Markaas ayaa waxey mareen Musiya illaa Taroo’as.

⁹ Habeenkii goortii la gaaray, Bawlos wuxuu riyo ahaan ku arkay nin reer Makedoniya ah oo baryaya isaga oo leh, “Kaalay Makedoniya oo na caawi.”

¹⁰ Bawlos goortuu riyadaan arkay kadib ayaan isku diyaarinay inaan tagno magaalada Makedoniya. Haddaba waan hubnaa in Illaahey halkaas noogu wacey inaan warka wanaagsan soo wacdino.

Ludiya oo Illaahey u soo laabatay

¹¹ Waxaan ka safarnay Taroo’as illaa Samotraki, maalintii ku xigtayna waxaan tagnay Ne’abolis.

¹² Halkaasna waan ka safarnay illaa Filiboy, taas oo ahayd magaalo madaxda reer Makedoniya, oo Rooma looga taliyo. Filiboy waxaan joognay dhowr maalmood.

¹³ Maalintii Sabtida ayaan waxaan tagnay meel magaalada ka baxsan oo webi ku yaalo, waxaan u maleynay inaan ka heli doono meel ey dadka ku duceystaan. Markaas ayaan fariisanay oo la hadalnay dumarkii meesha joogay.

¹⁴ Mid ka mid ah kuwa dhageysanayay waxey ahayd haweeney magaceedu yahay Ludiya, waxey ka timid magaalada Tu’ateyra, oo waxeyna iibin jirtay dhar qaali ah oo midab guduudan. Illaahey ayey caabudi jirtay, isla markiiba Illaahey qalbigeeda ayuu furay si ey u maqasho Bawlos fariintiisa.

¹⁵ Goortii iyada iyo reerkeeda la baabtiisay ayey gurigeeda nagu casuumtay. Waxey dhahday, “Haddaad tixgelineysid runtii inaan aaminsanahay Rabbiga, kaalaya oo gurigeyga jooga.” Waana ogolaanay casuumaadeeda.

Bawlos iyo Silas oo la xiray

¹⁶ Maalin anaga oo meesha lagu duceysto u socono ayaa waxaan la kulannay gabar adoon ah, waxey lahayd ruux siiya xoog ey waxa soo socda ku sheegto. Sidaa ayey lacag badan ku heli jireen dadkii iyada lahaa.

¹⁷ Gabadhii ayaa Bawlos iyo anaga na soo raacday iyadoo qaylinayso oo leh, “Nimankan waa adeegayaasha Illaaha Ugu Sareeyo, waxey idiin sheegayaan sidaad u badbaadi lahaydeen.”

¹⁸ Maalmo badan ayey waxyaalahaas ku hadleysay. Markaas ayaa Bawlos ku xanaaqay oo intuu u jeestay ayuu ruuxdii ku yiri, “Magaca Ciise Masiix ayaan kugu amray ee kasoo bax!” Isla markiiba ruuxdii ayaa ka baxday.

¹⁹ Dadkii gabadha lahaa ayaa markey ogaadeen in rajadoodi lacag sameynta ey dhamaatay ayaa waxey qabteen Bawlos iyo Silas oo ku jiideen suuqa si ey madaxda u xukumaan.

²⁰ Waxey hor keeneen kuwii madaxda ahaa waxeyna ku yiraahdeen, “Nimankan Yuhuudda ah ayaa magaaladeena dhibay!

²¹ Waxeyna barayaan waxyaalo aan anaga reer Rooma ah na loo ogolayn inaan sameyno.”

²² Markaas ayaa dadkii badnaana waxey ku biireen kuwii kale ee dacweynayay Bawlos iyo Silas. Markaas ayaa kuwii madaxda ahaa amar ku bixiyeen in dharka laga siibo labadoodaba oo lagu garaaco ul.

²³ Goortii si xun loo garaacay kadib ayaa xabsiga lagu tuuray. Kii xabsiga waardiyeynayay ayaa amar lagu siiyay inuu si fiican u ilaaliyo iyaga.

²⁴ Markii amarka la siiyay ayuu iyagii xabsiga geeyay oo lugaha kaga xiray silsilad oo silsiladiina ku xiray geed weyn.

²⁵ Markii la gaaray habeen barkii Bawlos iyo Silas wey duceysanayeen waxeyna u heesayeen Illaah, maxbuusyadii kalana wey dhageysanayeen.

²⁶ Isla markii ayaa waxaa dhacey dhul gariir oo ruxay aasaaskii xabsiga. Hal mar ayaa albaabadii xabsiga oo dhan wada furmeen oo silsiladii qof walba ku xirneydna furantay.

²⁷ Kii xabsiga waardiyeynayay goortuu hurdada kasoo toosay wuxuu arkay albaabadii xabsiga oo dhan iney furanyihiin, wuxuu u maleeyay maxbuusyadii iney carareen. Markaas ayuu seeftiisi iska soo bixiyay wuxuuna rabay inuu is dilo.

²⁸ Laakiin Bawlos ayaa ku yiri, “Waxba ha isyeelin! Waayo anaga oo dhan halkan ayaan joognaa!”

²⁹ Markaas ayuu nimankii xabsiga waardiyeynayay weydiistay toosh oo isla markii galay xabsiga. Isaga oo wada gariirayo ayuu yimaaday oo jilbaha u dhigtay Bawlos iyo Silas.

³⁰ Banaanka ayuu u bixiyay oo weydiiyay, “Mudane maxaan sameeyaa si aan u badbaado?”

³¹ Markaas ayey ku jawaabeen, “Aamin Sayid Ciise, waana badbaadi doontaa adiga iyo reerkaaga oo dhan.”

³² Kadibna Bawlos iyo Silas waxey isaga iyo reerkiisa kala hadleen ereyga Rabbiga.

³³ Habeenkii markii la joogay ayaa ninkii iyaga waday oo nabaradoodi ka nadiifiyay. Kadibna isaga iyo qof walboo reerkiisa ka tirsan waa la wada baabtiisay.

³⁴ Aad ayey u farxeen markey Illaah rumeysteen, kadibna ninkii ayaa iyagii u kaxeeyay gurigiisi oo cunta u diyaariyay.

³⁵ Subaxdii xigtay ayaa saraakiishii magaalada u direen askari ninka xabsiga waardiyeeya si uu ugu yiraahdo, “Sii daa Bawlos iyo Silas.”

³⁶ Markaas ayaa ninkii ku yiri Bawlos, “Madaxdii amar ayey ii soo direen inaan idin sii daayo. Haddaba nabad ku taga.”

³⁷ Laakiin Bawlos wuxuu ninkii askariga ahaa ku yiri, “Waxaan nahay reer Rooma, madaxdii Roomana dadka hortooda ayey nagu garaaceen, waxey nagu tuureen xabsiga, haddana waxey doonayaan miyaa iney si qarsooni ah nagu soo daayaan? Maya, iyagu ha noo yimaadaan oo hana sagootiyaan.”

³⁸ Haddaba askartii ayaa u sheegeen madaxdii Bawlos iyo Silas iney yihiin reer Rooma, markey maqleen wey cabsadeen.

³⁹ Markaas ayey yimaadeen oo ey raali geliyeen. Waxey ka bixiyeen xabsiga oo waxey ka codsanayaan haddaba magaalada iney ka tagaan.

⁴⁰ Laakiin Bawlos iyo Silas markey xabsiga kasoo baxeen waxey toos u aadeen guriga Ludiya, halkaas ayey kula kulmeen walaalaha oo aaminsan oo wey dhiirigeliyeen, kadibna wey tageen.