Falimaha 10 - Ereyga Illaahey Axdiga Cusub

Korneeliyos oo u yeeray Butros

¹ Kaysariya waxaa joogay nin la oran jiray Korneeliyos, kaasoo boqol u taliye u ahaa koox loo yaqaanay askartii Talyaaniga.

² Isaga iyo qoyskiisaba waxey ahaayeen kuwo cibaado badan oo Illaahey ka cabsada. Wuxuu ahaa mid gacan furan oo wax siiya masaakiinta baahan Illaahey ayuuna baryi jiray mar walba.

³ Maalin maalmaha ka mid ah markey ahayd saddexdii galabnimo ayuu riyooday. Wuxuuna arkay malag Illaah, oo u yimid kuna yiri, “Korneeliyosow!”

⁴ Korneeliyos ayaa si cabsi ah u fiiriyay oo weydiiyay, “Waa maxay, Sayidow?” Malagii ayaa ku jawaabay, “Ducadaadi iyo sadaqadii aad masaakiinta siin jirtay ayaa xagga sare timid oo xasuus dhaxalgal ah ayey ka noqotay xagga Illaah.

⁵ Hadda niman u dir Yaafaa si ey u keenaan nin la dhaho Simoon Butros.

⁶ Wuxuu la joogaa Simoon magdeeyaha, gurigiisuna wuxuu ku yaalaa badda agteeda.”

⁷ Markii uu malagii la hadlayay tagay, Korneeliyos wuxuu u yeeray laba ka mid ah adeegayaashiisi iyo mid ka mid ah askartiisi ey Illaahey isla caabudi jireen.

⁸ Wuxuu u sheegay wax walboo dhacay wuxuuna u diray Yaafaa.

Riyadii Butros

⁹ Maalintii ku xigtay mar ey ahayd duhuradii iyagoo safarkii ku sii jira oo magaaladii ku sii socda, Butros ayaa fuulay saqafka kore ee guriga si uu ugu soo duceysto.

¹⁰ Wuu gaajooday wuxuuna rabay wax uu cuno, intii cuntada la diyaarinayay ayuu riyooday.

¹¹ Wuxuuna arkay samada oo furantay waxaana kasoo degay wax sida shiraac u weyn oo afartiisa geesood lagu soo dajiyay dhulka.

¹² Waxaana dul saarnaa dhamaan xayawaanada afarta lugood leh, xamaaratada iyo shimbirraha hawada.

¹³ Kadibna cod ayaa ku yiri, “Butrosow, kac! Dil oo cun.”

¹⁴ Butros ayaa ku jawaabay, “Maya, Sayidow! Weligay ma cunin wax xaaraan ah oo aan nadiif ahayn.”

¹⁵ Codkii ayaa mar kale la hadlay, “Ha dhihin waa xaaraan wax uu Illaahey nadiifiyay.”

¹⁶ Arintan waxey dhacday saddex jeer, isla markiina shiraacii samada ayaa dib loogu celiyay.

¹⁷ Butros oo la yaaban micnaha riyada, nimankii uu Korneeliyos soo diray ayaa yimid gurigii Simoon waxeyna soo istaageen albaabka.

¹⁸ Wey u yeereen, waxeyna weydiiyeen Simoon oo Butros loo yaqaano inuu meeshan daganyahay.

¹⁹ Butros oo riyadii weli ka fikiraya, ayaa Ruuxa Quduuska ah ku yiri. “Simoon, saddex nin ayaa ku raadinaya.

²⁰ Kac oo hoos aad. Ha ka shakinin inaad raacdid, aniga ayaa kuu soo diray.”

²¹ Butros ayaa hoos aaday wuxuuna ku yiri, “Waa aniga qofka aad raadineysaan. Maxaad u timaadeen?”

²² Nimankii ayaa ku yiri, “Waxaan ka soconaa Korneeliyos oo ah boqol u taliye. Waana nin xaq ah oo Illaahey ka cabsada, kaasoo ey dadka Yuhuudda oo dhan xushmeeyaan. Malag quduus ah ayaa ku yiri ku dheh gurigeyga imow si uu u dhagaysto waxaad sheegeysid.”

²³ Kadib Butros ayaa nimankii guriga ku casuumay si ey martidiisa u noqdaan. Maalintii ku xigtayna Butros wuu soo raacay, waxaa kale oo la socday qaar ka mid ah walaalihii Yaafaa daganaa.

Butros oo gurigii Korneeliyos jooga

²⁴ Maalin kadibna wuxuu soo gaaray Kaysariya. Korneeliyos ayaa sugayay iyaga wuxuuna iskugu yeeray qaraabadiisii iyo saaxiibadiisii.

²⁵ Butros markii uu guriga soo galay, Korneeliyos ayaa ka hor yimid oo cagahiisa ayuu ku dhacay isaga oo xushmeynaya.

²⁶ Laakiin Butros ayaa kiciyay oo ku yiri, “Kor u kac, aniga xitaa qof ayaan ahay.”

²⁷ Intuu la hadlayay, Butros gudaha ayuu galay wuxuuna arkay dad badan.

²⁸ Wuxuuna ku yiri dadkii “Waad ogtihiin iney sharciga ka hor imaaneyso in Yuhuuddu dhex gasho ama booqato dadka aan Yuhuudda ahayn. Laakiin Illaahey wuxuu i tusay in aanan qofna ugu yeerin xaaraan ama wasakh.

²⁹ Oo markii nimanka la ii soo diray, waxaan imid aniga oo aan wax muran ah ka keenin. Ma ogaan karaa sababta aad iigu yeertay?”

³⁰ Korneeliyos ayaa ku yiri, “Saddex maalin ka hor xiligan oo kale aniga oo duceysanaya, mar ey ahayd saddexdii galabnimo ayaa nin dhar dhalaalaya xiran horteyda soo istaagay,

³¹ wuxuuna igu yiri, ‘Korneeliyosow Illaahey wuu maqlay ducadaadi wuuna xasuustay sadaqada aad masaakiinta siisid.

³² Dad u dir nin la dhaho Simoon Butros oo jooga Yaafaa. Wuxuu marti ku yahay guriga Simoonkii magdeeyaha, kaasoo badda agteeda dagan.’

³³ Oo isla markiiba dad ayaan kuu soo diray, waana wanaagsaneyd inaad timaaday. Hadda dhamaanteen meeshan ayaan joognaa Illaahey hortiisa si aan u dhagaysano wax walboo uu Sayidku ku amray inaad noo sheegto.”

³⁴ Kadib Butros ayaa bilaabay inuu hadlo, “Hadda ayaan ogaaday iney run tahay in uusan Illaahey eexasho sameynin,

³⁵ laakiin uu qowmiyad kasta ka aqbalo midka isaga ka cabsada oo waxa saxda ah sameeya.

³⁶ Ma ogtihiin fariinta uu Illaahey u soo diray dadka reer binu Israa’iil, isaga oo ku dhawaaqaya warka wanaagsan ee nabadda ah adeegsanayana Ciise Masiix, kaasoo ah Sayidka dadka oo dhan.

³⁷ Ma ogtihiin waxa ka dhacay gobolka Yahuudiya, laga bilaabo Galili kadib baabtiiskii uu Yooxanaa wacdiyay.

³⁸ Sida uu Illaah ugu subkay Ciisihii reer Naasared Ruuxa Quduuska ah iyo awood, iyo sida uu meel walba u maray isaga oo wax wanaagsan sameynaya oo bogsiinaya kuwa ku hoos jira awoodda ibliiska, sababtoo ah Illaahey ayaa la jiray.

³⁹ “Marqaati ayaan ka ahayn wax walboo uu ka dhex sameeyay waddanka Yuhuudda iyo Yeruusaalem. Wey dileen oo iskutallaabta ayey ku qodbeen,

⁴⁰ laakiin Illaahey ayaa maalintii saddexaad dhimashada ka sarakiciyay oo sababay iney dadku arkaan.

⁴¹ Dadka oo dhan ma eysan arkin, laakiin waxaa arkay marqaatiyaal uu Illaahey mar hore doortay. Anaga ayaa wax la cunay oo wax la cabnay kadib markii uu dhimashada ka sarakacay.

⁴² Wuxuu na amray inaan dadka u wacdino oo aan u marqaatifurno inuu isagu yahay midka uu Illaahey u doortay inuu xukumo kuwa nool iyo kuwa dhintayba.

⁴³ Nebiyadii oo dhan wey ka marqaatifureen isaga iyo in qof walboo aamina uu dembidhaaf ku helayo magaciisa.”

⁴⁴ Butros oo weli hadlaya ayaa Ruuxa Quduuska ah ku soo degay dhamaan intii maqashay fariintan.

⁴⁵ Rumeystayaashii la guday ee Butros la yimid ayaa la yaabay sida Ruuxa Quduuska ah loogu shubay xitaa dadka aan Yuhuudda ahayn.

⁴⁶ Waayo waxey maqleen iyagoo ku hadlaya afka ruuxa oo Illaaheyna ammaanaya. Kadib Butros ayaa yiri,

⁴⁷ “Xaqiiqdii qofna lagama hor istaagi karo in la baabtiiso. Oo waxey u heleen Ruuxa Quduuska ah sida aan anagu u helnay.”

⁴⁸ Markaas ayuu amray in lagu baabtiiso magaca Ciise Masiix, kadibna waxey Butros ka codsadeen inuu maalmo yar lasii joogo.