Efesos 2 - Ereyga Illaahey Axdiga Cusub

Masiixa oo nalala soo nooleysiiyay

¹ Waagii hore ruuxiyan waad u dhimateen caasinimadiina iyo dembiyadiina dartood.

² Waxaad ku noolaan jirteen dembi, sida dadka aduunka waxaadna adeecdeen ibliiska oo hogaamiyaa boqortooyada koonka ruuxdiisuna waxey u talisaa qof walboo Illaahey ku caasiya.

³ Anaga oo dhan sidaas ayaan soo wada ahayn, anaga oo raaceyna damaca jirkeena iyo fikradeena. Waxaan ka careysiinay Illaahey waxaanna sida dadka kale mudnayn ciqaab.

⁴ Laakiin jaceylka weyn ee uu inoo qabo dartiis Illaaheyga naxariista badan

⁵ ayaa Masiixa na la nooleeyay anaga oo dembiyadeena dartood u dhimanay. Illaahey nimcadiisa ayaad ku badbaadeen.

⁶ Illaahey ayaa Masiixa dhimashada nagula sarakiciyay nalana fariisiyay jannada dhexdeeda, Ciise Masiix oo aan la midownay darteed.

⁷ Wuxuu Illaahey sidaas u sameeyay si waqtiyada soo socdo uu noo tuso nimcadiisa nooguna naxariisto Ciise Masiix dartiis.

⁸ Waayo nimcada Illaahey ayaad ku badbaadeen, markaad Masiixa aaminteen. Awoodiinana kuma imaan ee waa hadiyad xagga Illaahey ka timid.

⁹ Mana aha wax aad camalladiina ku keensateen, sidaa darteed qofna kuma faani karo.

¹⁰ Waayo waxaan nahay abuurkii Illaahey, la midowgeena Ciise Masiix ayuuna abuur cusub nooga dhigay si aan u sameyno camallo wanaagsan taas oo uu horey noogu diyaariyay.

Yuhuudda iyo dadka aan Yuhuudda ahayn oo Ciise dartiis ku midoobay

¹¹ Sidaa darteed dadkiinan aan Yuhuudda ahaynow ha illoobina iney Yuhuuddu idin kugu yeeri jireen “kuwii aan gudneyn” iyaga oona iskugu yeera “kuwa gudan” inkastoo ey jirkooda oo kaliya ku sameeyaan.

¹² Xasuusta waqtigaas Masiixa gooni ayaad ka ahaydeen, waad ka baxsanaydeen reer binu Israa’iil waxna kuma eydan lahayn axdigii ballanqaadka, aduunkana rajo la’aan iyo Illaah la’aan ayaad ku joogteen.

¹³ Laakiin hadda Ciise Masiix dartiis kuwiinan markii hore fogaa waxaa hadda la idin ku soo dhaweeyay dhiigga Masiixa.

¹⁴ Waayo isaga ayaa nabadda noo keenay Yuhuudda iyo dadka aan Yuhuudda ahaynna mideeyay. Waayo jirkiisa ayuu ku burburiyay derbigii kala qeybinayay cadowgana ka dhigayay.

¹⁵ Wuxuu soo af jaray sharcigii Yuhuudda iyo amaradiisi, si uu labada qowmiyadood uga soo dhex saaro hal qowmiyad oo cusub isagana la mideysan, sidaas ayuuna nabad ku dhaliyay.

¹⁶ Oo hal jir inuu Illaah kula heshiiyo labaduba iskutallaabta, isagoo dilaya cadawnimadoodi.

¹⁷ Wuu yimid oo nabad idiinku wacdiyay kuwiinan Yuhuudda ahayn iyo nabad kuwa Yuhuudda ah.

¹⁸ Haddana anaga oo dhan Aabaha hal Ruux ayaan ugu wada tagi karnaa Ciise wixii uu noo sameeyay darteed.

¹⁹ Haddaba hadda ma tihiin shisheeye, laakiin waxaad dadka Illaahey la tihiin wadani waxaadna xubin ka tihiin reerka Illaahey.

²⁰ Waxaa tihiin sidi dhismo ey aasaas u yihiin rasuullo iyo nebiyo, Ciise Masiixna uu u yahay udub dhaxaad.

²¹ Isaga ayaa dhismaha isku haya, korna u kiciya si uu macbad quduus ah Rabbiga ugu noqdo.

²² Isaga ayaana idinka xitaa la idin ku dhisay si aad u noqotaan meel uu Illaahey Ruuxiisu ku noolaado.