Cibraaniyada 3 - Ereyga Illaahey Axdiga Cusub

Ciise wuu ka weyn yahay Muuse

¹ Haddaba walaalaheyga quduuska ahaw, kuwiina wadaaga wacitaanka samada, fikradihiina saarta Ciise, kaasoo aan u aqoonsanahay inuu yahay rasuulkeena iyo wadaadkeena sare!

² Ciise daacad ayuu u ahaa Illaahey, kaasoo isaga doortay, sidii uu Muuse daacada ugu ahaa u shaqaynta dadka Illaahey oo dhan.

³ Laakiin Ciise wuxuu mudan yahay sharaf ka badan tan Muuse, sida kan guriga dhisaya uu uga sharaf badan yahay guriga.

⁴ Waayo guri walba qofbaa dhisay, laakiin Illaahey waa kan wax walba dhisa.

⁵ Muuse wuxuu ahaa adeege daacad ah wuxuuna dadka Illaahey u marqaatifuray waxa mustaqbalka la oran doono.

⁶ Laakiin Masiixu waa Wiilka xukuma dadka Illaahey oo dhan. Inaguna waxaan nahay dadkaas haddii aan sii adkeysano oo aanan rajo beelin.

Caasinimada oo laga digay

⁷ Waa sida Ruuxa Quduuska ah dhahayo, “Maanta haddii aad maqashaan codkiisa,

⁸ qalbiyadiina ha adkeynina, sidii aad u sameyseen waqtigii caasinimada, markii la joogay waqtigii la isku jarribay cidlada,

⁹ halkaasoo ey awoowayaashiin igu jarribeen iguna tijaabiyeen, inkastoo ey afartan sano arkeen wixii aan sameeyay.

¹⁰ Waana sababta aan ugu careysanaa jiilkaas, waxaanna iri, ‘Qalbiyadoodu mar walba wey leexanayaan, oo jidadkeyguna ma garanayaan.’

¹¹ Haddaba waxaan aniga oo careysan dhaar ku marayaa, ‘Weligood nasiinadeyda ma heli doonaan.’ ”

¹² Walaalayaalow, is ilaaliya! Midkiina yuu lahaanin qalbi shar leh oo aan aaminsaneyn ee idin leexiyo Illaaha nool.

¹³ Maalin walba waa inaad is dhiirigelisaan, intey “maalin” jirto, si eydan ugu khiyaanmin dembiga oo eydan Illaahey ugu madax adkaanin.

¹⁴ Waan iskugu nimid inaan wadaagno Masiixa. Haddaba aan runtii ku adkeysano kalsoonidii illaa dhamaadka.

¹⁵ Qorniinku wuxuu leeyahay, “Maanta haddii aad maqashaan codkiisa, qalbiyadiina ha adkeynina sidii aad u sameyseen waqtigii caasinimada.”

¹⁶ Yey ahaayeen kuwii maqlay oo caasiyay? Miyeysan ahayn kuwii uu Muuse kasoo saaray Masar?

¹⁷ Yuuse Illaahey u xanaaqsanaa afartan sano? Miyeysan ahayn kuwii dembaabay, kuwii jirkoodu cidlada ku baaba’ay?

¹⁸ Yuuse Illaahey ku dhaartay in eysan nasashadiisa geli doonin haddeysan ka ahayn kuwii caasiyay?

¹⁹ Haddaba waan aragnaa maysan awoodin iney galaan rumeysad la’aantooda darteed.