Cibraaniyada 13 - Ereyga Illaahey Axdiga Cusub

Waxa Illaahey raaligeliya

¹ Walaalayaalow ku dadaala inaad is jeclaataan.

² Xasuusnaada inaad qariibka gurigiina kusoo dhaweysaan. Dadka qaar iyagoo sidaas sameynaya ayey malaa’ig guryahooda kusoo dhaweeyeen, iyagoo aan ka war qabin.

³ Xasuusta kuwa xabsiyada ku jira, kana soo qaada nafsadiina oo kale. Ha illoobina kuwa silcaya, laakiin kasoo qaada nafsadiina oo kale.

⁴ Guurka ixtiraama. Mar walba daacad u ahaw lamaanahaaga, waayo Illaahey wuu ciqaabayaa qof walboo sineysta ama aan daacad u ahayn guurkiisa.

⁵ Noloshiina ka ilaaliya lacag jaceylka waxaad heysataanna ku qanca, waayo Illaahey wuxuu yiri, “Weligey idin ma dayici doono, weligey idinkama tagi doono.”

⁶ Sidaa darteed waxaan si kalsooni ku jirto u leenahay, “Illaahey waa kan i caawiya, ma cabsan doono. Dad sideyda oo kale ah maxey igu sameyn karaan?”

⁷ Ha illoobina hogaamiyayaashiini ereyga Illaahey idin baray. Xasuusta noloshii ey ku noolaayeen iskuna daya inaad iimaankooda oo kale yeelataan.

⁸ Ciise Masiix weligiis isma beddelo! Waa isku mid shalay, maanta iyo weligiis.

⁹ Yaan la idin ku khiyaanin waxbarid nooc kale ah. Waxaa wanaagsan in qalbiyadeena lagu xoogeeyo nimcada Illaahey ee aanan mudneyn intaan isku haleyn lahayn cuntooyin xeerkood, kuwaasoo aan faa’iido u keenin kuwa sameeya.

¹⁰ Waxaan heysanaa meesha allabariga oo kuwa teendhada ka adeegaa eysan xaq u laheyn iney cuntadeeda cunaan.

¹¹ Kadib markii uu wadaadka sare keeno dhiigga meesha ugu quduusan sida qurbaanka dembiga, jirka xoolahaas waxaa lagu gubaa xerada banaankeeda.

¹² Sidaas oo kale ayuu Ciise ku silcay banaanka albaabka magaalada, sidaa darteed dhiigiisu waa inuu dadka quduus ka dhigaa.

¹³ Haddaba aan banaanka xerada u baxno oo aan isaga u tagno si aan ula wadaagno ceebta.

¹⁴ Dhulkan kuma lihin magaalo waarta laakiin waan sugeynaa magaalo sidaas ah.

¹⁵ Qurbaankeenu waa inaan Illaahey ku ammaannaa magaca Ciise.

¹⁶ Laakiin ha illoobina inaad kuwa kale caawisaan oo aad hantidiina la wadaagtaan. Labadan qodob waa sidii idinkoo bixinaya qurbaan Illaahey ka farxiya.

¹⁷ Hogaamiyayaashiina ku kalsoonaada waxey idin amraanna sameeya. Wey idin ilaaliyaan, Illaahey ayaana iyaga la xisaabtamaya. Haddaba haka careysiinina markey shaqadooda gudanayaan. Ka farxiya haddii kale idin ma caawin karayaan.

¹⁸ Noosoo duceeya. Damiirkeenu waa nadiif, mar walbana waxaan isku daynaa inaan si saxa u noolaanno.

¹⁹ Qaas ahaan aniga iisoo duceeya si aan dhaqso mar kale idiin soo booqdo.

Ducooyinkii iyo salaamihii ugu dambeeyay

²⁰ Haddaba Illaaha nabadda, kaasoo dhiigga axdiga weligiis ah dhimashada uga soo sarakiciyay Sayidkeena Ciise, Arijirka wanaagsan ee idaha,

²¹ ha idinku xoogeeyo wax walboo wanaagsan intaad sameyneysaan doonistiisa. Ciisana ha idinku caawiyo wax walboo Illaahey ka farxiya. Ciise Masiix weligiis ammaan ha u ahaato. Aamiin!

²² Walaalayaalow, waxaan soo qoray warqad gaaban oo kaliya oo aan idin ku dhiirigeliyo, waxaanna idinka baryayaa inaad si fiican u dhageysataan wixii aan idiin soo qoray.

²³ Waxaan rabaa inaad ogaataan in walaalkeen Timoteyos xabsigii laga soo daayay. Hadduu waqti fiican halkan soo gaaro waan soo kaxeynayaa markaan idin soo booqanayo.

²⁴ Fadlan iigu salaama hogaamiyayaashiina iyo dadka Illaahey oo dhan. Walaalaha Talyaaniga kasoo jeedana wey idin soo salaamayeen.

²⁵ Nimcada Illaahey kuligiin ha idinla jirto.