2 Timoteyos 4 - Ereyga Illaahey Axdiga Cusub

¹ Markii uu Ciise Masiix yimaado isaga oo boqor ah, wuxuu xukumi doonaa mid kasta, kuwa nool iyo kuwa dhintayba. Sidaa darteed waxaan ku amrayaa iyagoo Illaahey iyo Masiixuba markhaatiyaal yihiin.

² Ku wacdi ereyga, diyaar ahaw mar walba, dadka sax, canaano oo dhiirigeli adigoo adeegsanaya samir badan iyo waxbarid wanaagsan.

³ Waqti ayaa imaan doona eysan dadku dhegaysan doonin waxbaridda saxda ah. Waxeyna raadin doonaan macalimiin iyaga ka farxiya oo u sheega kaliya waxey dhegahoodu rabaan iney maqlaan.

⁴ Runta wey ka leexan doonaan, oo waxey dhegaysan doonaan sheekooyin aan micno lahayn.

⁵ Laakiin waa inaad is dejiso oo aad diyaar u tahay inaad dhibaatada u adkeysato. Waa inaad ku dadaashaa inaad warka wanaagsan sheegtid oo aad si wanaagsan u qabatid shaqadaada.

⁶ Waayo waxaan durbaba u daatay sida cabitaan allabari loo bixiyay, waqtigii tegitaankeyguna wuu soo dhowaatay.

⁷ Dagaal wanaagsan ayaan dagaalamay, tartanka waan ku guuleystay, iimaankana waan xajiyay.

⁸ Haddaba waxaa i sugaya abaalgudkii, kaasoo ah taajkii xaqnimada oo Rabbigu u xukumo si xaq ah uuna isiin doono maalinta uu soo noqon doono. Abaalmarintaanna aniga kaliya ma helayo ee waxaa helaya dhamaan kuwa aadka u jecel inuu soo muuqdo.

Ereyadii Bawlos ee ugu dambeeyay

⁹ Timoteyosow, fadlan ku dadaal inaad dhaqso iigu timaadid.

¹⁰ Waayo Deemaas aad ayuu u jeclaa waxyaalaha dunidan, sidaa darteed wuu iga tagay oo wuxuu aaday Tesaloniika. Kereeskeesna wuxuu aaday Galatiya, Tiitosna wuxuu aaday Dalmatiya.

¹¹ Luukos oo kaliya ayaa ila jooga. Markos aad ayuu ii caawin karaa, fadlan soo raadi oo soo kaxee.

¹² Tukhikos ayaan Efesos u diray.

¹³ Markaad imaaneyso, iisoo qaad jaakadii aan kaga soo tagay Karbos oo Taroo’as jooga. Sidoo kale iisoo qaad buugaagteyda, gaar ahaan warqadaha.

¹⁴ Aleksanderos kii bira sameeyaha ahaa aad ayuu ii dhibaateeyay, laakiin Rabbiga ayaa ku xukumi doona wixii uu igu sameeyay oo dhan.

¹⁵ Iska ilaali isaga, waayo wuxuu kasoo horjeedaa fariinteena.

¹⁶ Markii ugu horeysay ee aan tagay maxkamadda si aan isku difaaco, cid ii hiilisay ma jirto, waxaan Illaahey uga baryayaa inuu u dembi dhaafo intii iga tagtay.

¹⁷ Laakiin Rabbiga ayaa i garab istaagay, oo xoog i siiyay si aan injiilka u wacdiyo oo ey dadka aan Yuhuudda ahayn oo dhan u maqlaan. Waxaana la iga badbaadiyay afka libaax.

¹⁸ Rabbigu wuu iga badbaadin doonaa shar kasta, oo wuxuu ammaan igu dhex gelin doonaa boqortooyadiisa jannada ah. Isaga ammaan ha u ahaato weligeed iyo weligeedba. Aamiin.

Salaantii ugu dambeysay

¹⁹ Iigu salaan Bariskilla iyo Akula iyo kuwa guriga Oneesiforos la degan.

²⁰ Erastos wuxuu joogay Korintos, oo waxaan Torofimos uga soo tagay magaalada Mileetos isaga oo xaanunsan.

²¹ Ku dadaal inaad timaado waqtiga qabowga ka hor. Waxaa kusoo salaamaya Yubulos, Budees, Liinos, Kalawdiya, iyo dhamaan walaalaha.

²² Rabbigu ruuxaaga ha la jiro. Nimcadiisana ha idinla jirto dhamaantiin.