2 Tesaloniika 3 - Ereyga Illaahey Axdiga Cusub

Noosoo duceeya

¹ Walaalayaalow ugu dambeyntii, waxaan idin weydiisaneynaa inaad noo duceysaan. Soo duceeya si fariinta Rabbigu si degdeg ah u faafto, meel walboo ey gaartana laga sharfo, sidi markey idin soo gaartay oo kale.

² Duceeya si aan uga badbaadno dadka xun iyo kuwa sharta leh, waayo qof walba ma aha mid rumeysan.

³ Laakiin Rabbigu waa mid aamin ah, wuu idin xoogeyn doonaa oo sharta wuu idin ka ilaalin doonaa.

⁴ Waxaan ku kalsoonnahay Rabbiga inaad sameyneysaan oo weliba sii wadaan waxyaalihii aan idin ku amarnay.

⁵ Waxaan idiin baryeynaa inuu Rabbigu qalbiyadiina ku hogaamiyo jaceylka Illaahey iyo dulqaadashada Masiixa.

Waajibaadka shaqo

⁶ Walaalayaalow waxaan magaca Sayid Ciise Masiix idin ku amreynaa inaad ka fogaataan walaalaha aaminsan oo ku nool nolol caajisnimo. Kuwaas oo aan raacsaneyn waxaan idin barnay.

⁷ Waayo idinkuba waxaad waajib iska saarteen inaad raacdaan tusaalaheena. Anagu caajislowyaal ma ahayn markaan idin la joognay.

⁸ Weligeen qofna cunto kama qaadanin anaga oo aan lacag ku bixinin. Habeen iyo maalin ayaan shaqeyneynay si aanan culeys qofna u saarin.

⁹ Runtii waan lahayn xaq aan idin ku weydiisano caawimaad, laakiin waxaan rabnay inaan tusaale aad ku dayataan idiin noqono.

¹⁰ Xitaa markaan idin la joognay waxaan idin siinay amarkan, “Midkii aan rabin inuu shaqeeyo wuxuu cuno lama siinayo.”

¹¹ Waxaan maqalnaa in kuwa idin ka mid ah ey ku nool yihiin nolol caajisnimo ah, iyagoo diidaya iney shaqeeyaan oo shaqada kuwa kale soo fara geshanaya.

¹² Dadkaas oo kale waxaan magaca Sayid Ciise Masiix ku amarnaa oo aan dhiirigelinaa iney degaan oo ey shaqeystaan si ey u helaan wax ey ku noolaadaan.

¹³ Walaalayaalow idinkuna haka daalina inaad sameysaan waxa wanaagsan.

¹⁴ Si fiican u fiiriya mid walboo aan adeecin waxyaalaha aan warqaddan ku sheegnay. Ka fogaada si ey ceeb u dareemaan.

¹⁵ Hana u qaadanina sida cadowgiina, laakiin u canaanta sida aad walaalaha kale ku sameyn lahaydeen.

Macsalaameyn

¹⁶ Haddaba Rabbiga nabadda ah ha idin siiyo nabad waqti walba iyo markaad xaalad walba ku jirtaan. Sayidku dhamaantiin ha idin la jiro.

¹⁷ Aniga Bawlos ah ayaa salaantan gacanteyda kusoo qoray. Taas oo ah calaamada waqardaheyga oo dhan kala saareysa. Tani waa sida aan u qoro.

¹⁸ Haddaba nimcada Rabbigeena Ciise Masiix dhamaan ha idin la jirto.