1 Timoteyos 4 - Ereyga Illaahey Axdiga Cusub

¹ Ruuxu si cad ayuu u sheegay in ayaamaha aduunka ugu dambeeya ey dad badan iimaanka ka bixi doonaan eyna raaci doonaan ruux khiyaaneysa iyo waxyaalo uu ibliisku baray.

² Dadkan waa labawejiilayaal beenaalayaal ah, damiirkooduna wuu dhintay.

³ Waxey dadka u diidi doonaan iney guursadaan iyo iney cuntooyinka qaar cunaan. Laakiin Illaahey ayaa cuntooyinkaas abuuray si dadkiisa runta garanaya u cunaan iyagoo mahadcelinaya.

⁴ Waayo wax walboo uu Illaahey abuuray wey wanaagsan yihiin. Wax walbana wey banaan yihiin haddii mahadcelin lagu cuno.

⁵ Wuxuuna nadiif ku noqonayaa ereyga Illaahey iyo duco.

⁶ Haddii aad waxyaalahan walaalaha barto waxaad Ciise Masiix u noqon doontaa adeege wanaagsan. Waxey tusin doontaa inaad ku xoogeysatay barida waxa ku saabsan iimaanka iyo amaradii wanaagsanaa ee aad adeecday.

⁷ Waxba haku darsan qisooyinka quraafaadka ah iyo sheekooyinka islaamaha waayeelka ah. Dadaal si aad u noqoto nin Illaahey adeeca.

⁸ Tababarka jirku wuu wanaagsan yahay, laakiin tababarka ruuxiga ah ayaa dhinac walba qiimo u leh, waayo wuu ballanqaadaa inuu ku siin doono nolol hadda ah iyo mid mustaqbalka ah.

⁹ Tani waa oraah xaqiiq ah oo in la aamino mudan.

¹⁰ Waana sababta aan aad ugu dadaalno una dhibaatoono waayo waxaan rajadeena saaranay Illaaha nool kaasoo ah badbaadiyaha dadka oo dhan, gaar ahaan kuwa iimaanka leh.

¹¹ Waxyaalahan dadka bar una sheeg iney sameeyaan wax walboo aad ku dhahdo.

¹² Ha u ogolaan inuu qof ku yaso da’daada oo yar darteed. Masiixiyiinta oo dhan tusaale ha u noqdo hadalkaaga, ficilkaaga, jaceylkaaga, iimaankaaga iyo daahirnimadaada.

¹³ Ilaa inta aan ka imaanayo ku dadaal inaad sii wado ereyga Illaahey oo aad dadka u akhriso, inaad wacdiso iyo inaad wax barto.

¹⁴ Ha dayicin hadiyadaadi aad ku heshay wax sii sheega, markey odayaashu gacanta ku saareen oo ey kuu duceeyeen.

¹⁵ Waxyaalahan xasuuso kana fikir, si qof walba uu u arko guushaada.

¹⁶ Ka taxadar sida aad u nooshahay iyo sida aad wax u barto. Haddii aad sidan ku sii socotid waxaad badbaadin doontaa naftaada iyo nafta kuwa ku dhageysta.