1 Timoteyos 2 - Ereyga Illaahey Axdiga Cusub

Sida Illaahey loo caabudo

¹ Ugu horeyn waxaan kugula dardaarmayaa in ducadaada, iyo tukashadaada, iyo mahadcelintaaduba ey ku saabsanaadaan dadka oo dhan wanaagooda.

² U ducee boqorrada iyo kuwa xukunka haya si aan nolol dagan oo nabad ah ugu noolaanno anaga oo Illaahey sharfeyno oo caabudeyna.

³ Ducadan oo kale wey wanaagsan tahay weyna ka farxisaa Illaaha badbaadiyaheena ah,

⁴ kaasoo raba iney dadka oo dhan badbaadaan oo eyna ogaadaan runta.

⁵ Waayo waxaa jira hal Illaah iyo hal dhaxdhaxaadiye kaasoo u dhaxeeya Illaahey iyo dadka, waana ninka la yiraahdo Ciise Masiix.

⁶ Wuxuu bixiyay naftiisa si uu xornimadiisa qof walba u siiyo. Tan hadda waa laga marqaatifuray waqtiga ku haboon.

⁷ Sababtan darteed ayuuna Illaahey iigu doortay inaan noqdo mid wacdiya rasuulna ah si aan dadka aan Yuhuudda ahayn fariinta iimaanka ku saabsan u baro. Ka badbadisna ma aha ee run ayaan sheegayaa.

⁸ Sidaa darteed waxaan rabaa nimanka meel walboo ey joogaan iney gacmahooda quduuska ah kor u qaadaan oo duceeyaan, iyagoon xanaaqsaneyn islana murmeynin.

⁹ Sidoo kale waxaan rabaa iney haweenku si xushmad leh oo ku haboon u labistaan. Waa in eysan timaha tidcan, kuulo dahab ah iyo dhar qaali ahna eysan xiran.

¹⁰ Laakiin haweenka sheegta iney Illaahey jecelyihiin waa iney wax wanaagsan u sameeyaan kuwa kale.

¹¹ Waa iney wax ku bartaan aamusnaan iyo adeecid.

¹² Ma fasaxayo iney haweenku wax baraan ama nimankooda ey ka xukun sareeyaan, waana iney aamusnaadaan.

¹³ Waayo ugu horeyntii waxaa la abuuray Aadan kadibna Xaawo.

¹⁴ Aadanna ma ahayn kan la khiyaanay, waxey ahayd Xaawo tan la khiyaanay oo dembiilaha noqotay.

¹⁵ Laakiin Illaahey wuxuu haweenka ku badbaadin doonaa caruurta ey dhalayaan dartood, haddey sii xajiyaan rumeysadkoodi, jaceylkooda, quduusnimadooda iyo xushmadooda.