1 Korintos 3 - Ereyga Illaahey Axdiga Cusub

Kaniisadda iyo hogaamiyayaasheeda

¹ Walaalayaalow, ma idiin la hadlayo sida dadka ruuxa raacsan, laakiin waxaan idiin hadlayaa sida dad weli aduunka ku jira, waxaad ku tihiin ilmo yaryar noloshiina masiixinimada.

² Sidaa darteed waa inaan idiin la dhaqmaa sida caruurta oo aan idin siiyaa caano, waayo weli diyaar uma tihiin cunto. Runtii weli diyaar uma tihiin.

³ Weli waxaad tihiin kuwa aduunka, waayo haddii uu weli maseyr iyo muran idin ku dhex jiro miyaadan ahayn kuwa aduunka?

⁴ Waayo hadduu midkiin yiraahdo, “Waxaan raacsanahay Bawlos,” oo mid kalana yiraahdo, “Waxaan raacsanahay Abolloos,” Miyeydan u dhaqmin sida dadka aduunka?

⁵ Haddaba muxuu yahay Abolloos? Bawlosna muxuu yahay? Waxa kaliya ey yihiin waa adeegayaasha idin ka caawiyay si aad u aamintaan. Waa Sayidka kan shaqadan u diray iney sameeyaan.

⁶ Anigu waxaan abuuray abuurka, Abolloosna biyo ayuu ku waraabiyay, laakiin Illaahey ayaa abuurkii koriyay.

⁷ Sidaa darteed kan wax abuuray iyo kan waraabiyay muhiim ma aha, laakiin waxaa muhiim ah Illaaha kaliya kaasoo waxyaalaha koriya.

⁸ Kan abuurka abuuray iyo kan biyaha ku waraabiyay ulajeedadoodu waa hal, shaqadoodana waa loogu abaalgudi doonaa.

⁹ Waayo anagu waxaan nahay adeegaha Illaahey ee isla shaqeeya, idinkuna waxaad tihiin beerta iyo dhismaha Illaahey.

¹⁰ Nimcada Illaahey i siiyay ayaan aasaaska ku sameeyay sidii dhise xigmad leh, qof kalana wuu ku dul dhisay. Laakiin mid kasta waa inuu si taxadar leh u dhisaa.

¹¹ Qofna aasaas kale ma dhigi karo waayo aasaaska horey ayaa loo dhigay, kaasoo ah Ciise Masiix.

¹² Laakiin qofku hadduu aasaaskaas ku dul dhiso dahab, ama qalin, ama dhagaxyo qaali ah, ama qoryo, ama caws iyo bal.

¹³ Laakiin maalin ayaa la arki doonaa qiimaha shaqadooda, waayo goortuu Ciise soo laabto wax walba wuu cadeyn doonaa. Maalintaasna qof walba shaqadiisa waxaa lagu tijaabin doonaa dab.

¹⁴ Haddii wixii la dhisay ey badbaadaan dhisaha waa la abaalmarin doonaa.

¹⁵ Laakiin haddii wixii la dhisay gubtaan dhisaha qasaaro ayuu galayaa, laakiin isaga waa la badbaadin doonaa. Wuxuuna ahaanayaa sida mid dab laga soo badbaadiyay.

¹⁶ Miyeydan garaneyn inaad tihiin macbadka Illaahey oo Ruuxa Illaaheyna idin ku dhex nool yahay?

¹⁷ Haddii uu qof dumiyo macbadka Illaahey, Illaaheyna wuu ciqaabi doonaa qofkaas. Waayo macbadka Illaahey waa quduus idinkuna waxaad tihiin macbadkaas quduuska ah.

¹⁸ Hana is khiyaanina. Waayo haddii uu qof idin ka mid ah isku maleeyo inuu xigmadda dunidan leeyahay waa inuu noqdaa doqon si uu xigmad u yeesho.

¹⁹ Waayo xigmadda dunidan waxey Illaahey hortiisa ka tahay doqonnimo. Qoraalku wuxuu leeyahay, “Kuwa xigmadda leh khiyaanadooda ayuu ku qabtaa.”

²⁰ Qoraalku wuxuu haddana leeyahay, “Rabbiga wuu og yahay in fikradaha kuwa xigmadda leh eysan waxba ahayn.”

²¹ Sidaa darteed waa in aadan ku faanin hogaamiyayaasha binu aadanka! Waayo waxyaalaha oo dhan idinka ayaa leh.

²² Abolloos, Bawlos iyo Keeyfas idinka ayaa na leh, aduunka oo dhan, nolol ama dhimasho waxa hadda dhacaya ama waxa waqti dambe dhici doona waxaas oo dhan idinka ayaa leh.

²³ Idinkana waxaad tihiin kuwii Masiixa, Masiixuna waa kan Illaah.