1 Korintos 2 - Ereyga Illaahey Axdiga Cusub

¹ Walaalayaalow goortaan idiin imaaday oo aan idiin wacdiyay waxyaalaha qarsoon ee ku saabsan Illaahey taas oo ah runta, kuma imaanin xigmadda binu aadanka mana isticmaalin ereyo waaweyn.

² Waayo intaan idin la joogay waxaan go’aansaday inaan ka hadlo waxyaalo ku saabsan Ciise masiix oo kaliya, kaasoo lagu qodbay iskutallaabta.

³ Markii ugu horeysay daciifnimo ayaan dareemayay oo cabsi ayaan la gariirayay.

⁴ Fariinteyda iyo wacdigeyga ma ahayn mid xigmad iyo ereyo waaweyn leh, laakiin xoogga Ruuxa Quduuska ah ayaan isku haleeyay.

⁵ Waxaan sidaas u sameeyay si eydan iimaankiina u saaranin xigmadda binu aadan, laakiin aad iimaankiina u saarataan xoogga Illaahey.

Xigmadda Illaahey ee Ruuxa Quduuska ah lagu muujiyay

⁶ Waxaan isticmaalnaa xigmad markaan la hadleyno dadka iimaanka ku koray. Laakiin ma aha xigmadda aduunkan ama kuwa aduunka xukuma, taas oo dhaqso dhamaaneysa.

⁷ Waxaan ku hadalnaa xigmadda Illaahey, sirta la qariyay ee Illaahey noo qoray iney noqoto ammaanteena ka hor bilowga waqtiga.

⁸ Taliyayaasha dunidan ma garanayaan waxyaalaha ku saabsan xigmaddan, haddii ey garan lahaayeen ma qodbi lahayn Rabbiga ammaanta.

⁹ Haba ahaatee wey qoran tahay, “Indhuhu maysan arkin, dheguhu maysan maqlin, maskaxda binu aadankana kuma soo dhicin.” Waxyaalaha Illaahey u diyaariyay kuwa isaga jecel.

¹⁰ Waxyaalahan ayaa Illaahey Ruuxdiisa noogu muujiyay. Ruuxdu waxey doondoontaa wax walba, xitaa waxyaalaha qarsoon ee Illaah.

¹¹ Waayo yaa ogaan kara fikradaha qofka waxaan ka ahayn ruuxdooda? Sidoo kale qofna ma ogaan karo fikradaha Illaahey waxaan ka ahayn Ruuxiisa.

¹² Waxaan helnay ma aha ruuxda aduunka, laakiin Ruuxa Illaahey xaggiisa ka yimid, si aan u fahanno barakada Illaahey na siiyay.

¹³ Waxyaalahan aan ku hadalno waxaa na baray Ruuxa Illaahey, mana aha xigmadda binu aadanka. Isla Ruuxdaan ayaa naga caawisa inaan waxyaalaha ruuxiga ah barno kuwa ruuxda haysta.

¹⁴ Qofka aan Ruuxa lahayn ma aqbalo waxyaalaha ka yimaaday Ruuxa Illaahey waxey u qaataan doqonnimo, mana fahmaan waxyaalahan waayo waxa kaliya oo lagu garan karaa waa Ruuxa.

¹⁵ Dadka uu Ruuxu hogaamiyo wax walba wey xukumi karaan, laakiin dadka kale ma xukumi karaan iyaga.

¹⁶ Waayo, “Yaa ogaaday fikrada Rabbiga oo u sheegi kara wuxuu sameeyo?” Laakiin waan fahannaa waxyaalahaas waayo waxaan heysanaa fikradaha Masiixa.