1 Korintos 11 - Ereyga Illaahey Axdiga Cusub

¹ Tusaalahayga raaca sida aan aniguba u raaco kan Masiixa.

Wax ku saabsan cibaadada

² Waxaan idin ku ammaanayaa inaad mar walba i xasuusataan oo aadna adeecdaan waxa aan idin baray.

³ Haddaba waxaan doonayaa inaan idiin sheego inuu Masiixu yahay madaxa nimanka oo dhan, ninkuna uu yahay madaxa naagta. Madaxa Masiixana waa Illaahey.

⁴ Nin walboo duceysta ama wax sii sheega isaga oo madaxa wax u saaran yihiin madaxiisuu ceebeeyay.

⁵ Laakiin naag walboo duceysata ama wax sii sheegta iyadoon madaxeeda wax u saarneyn, waa sida iyadoo madaxa iska xiirtay.

⁶ Waayo haddii naagta eysan madaxeeda waxba saarin, waxaa u roon iyadoo timaheeda iska xiirta, laakiin haddii ey ceeb u tahay iney timaha iska jarto ama ey xiirto waa iney madaxa wax saarataa.

⁷ Ninku waa in uusan madaxiisa waxba saarin, waayo isagu waa muuqaalkii iyo ammaantii Illaah, laakiin naagtu waa ammaanta ninka.

⁸ Waayo ninku kama imaanin naagta, laakiin naagta ayaa ka timid ninka.

⁹ Maxaa yeeley ninka looma sameynin naagta, laakiin naagta waxaa loo sameeyay ninka.

¹⁰ Sababtan iyo malaa’igta dartood, naagtu waa iney madaxeeda daboolataa taas oo tuseysa iney amarka ninkeeda ku hoos jirto.

¹¹ Sikastaba ha ahaatee xagga Rabbiga naagtu waxba ma aha ninka la’aantiis, ninkuna waxba ma aha naagta la’aanteed.

¹² Waayo sida naagtu uga timaaday ninka ayuu ninkuna uga dhashay naag. Laakiin wax walba waxey ka yimaadaan Illaahey.

¹³ Bal idinku go’aamiya iney wanaagsan tahay in naagtu ey Illaahey baryi karto iyadoon madaxeeda daboolin?

¹⁴ Waayo waad ogtihiin hadduu ninku leeyahay timo dheer iney isaga ceeb u tahay.

¹⁵ Laakiin naagtu haddey timo dheer leedahay waxey u tahay qurux, waayo timaheeda dheer ayey madaxeeda ku dabooshaa.

¹⁶ Haddii qof uu doono inuu ka murmo arintan, ha ogaado anaga iyo kaniisadaha Illaaheyba in aanan waxbaritaan kale lahayn.

Xeerarka cashada Rabbiga

¹⁷ Ma idin ku faraxsani waayo cibaadadiina dhib ayey keentaa intey wanaag keeni lahayd.

¹⁸ Horta waxaan maqlay markaad kaniisad ahaan iskugu timaadaan, waxaa idin ku dhex jira kala qeybsanaan, taas oo aniga xitaa aan aaminsanahay.

¹⁹ Waa shaki la’aan in muran idin ku dhex jiro, si qofka saxan la idin kaga dhex arko.

²⁰ Markaad isu timaadaan runtii ma ku dabaaldegtaan cashada Rabbiga.

²¹ Waayo markaad dadka kale ka hor bilowdaan inaad wax cuntaan kulankii oo aan bilaabanin, qaarkiin gaaja ayey ku baxayaan kuwa kalana iyagoo sarqaansan ayey tagayaan.

²² Miyeydan lahayn guri aad wax ka cuntaan ama ka cabtaan? Ama miyaad yastaan kaniisadda Illaahey iyo kuwa aan waxba haysanin? Maxaan idin ku iraahdaa? Runtii waxyaalahan idin ku ammaani maayo!

²³ Waayo waxyaalahan idiin sheegayo waxaan ka helay Rabbiga. Sayid Ciise habeenkii la gacan gelinayay wuxuu qaaday kibis,

²⁴ markii uu mahadceliyeyna wuu kala gooyay isaga oo leh, “Kani waa jirkeyga, kaasoo aan idin siiyay, sidan sameeya si aad iigu xasuusataan.”

²⁵ Sidaas si la mid ah, cashada kadib wuxuu qaaday koobkii isaga oo leh, “Kani waa axdiga cusub ee dhiigeyga, sidan sameeya, si aad iigu xasuusataan.”

²⁶ Waayo haddaad kibistaas cuntaan oo aad koobkaasna ka cabtaan waxaad tuseysaan dhimashada Rabbiga illaa uu kasoo laabto.

²⁷ Sidaa darteed, qof walboo cuna kibista ama ka caba koobka Rabbiga si aan istaahilin, wuxuu dembi ka galay jirkiisa iyo dhiigiisa.

²⁸ Qof walba waa inuu is hubiyaa ka hor inta uusan cunin kibista ama uusan ka cabin koobka Rabbiga.

²⁹ Waayo haddaadan garaneyn macnaha jirka Rabbiga markaad cuneysid kibista oo aad ka cabeysid koobka, waxaad isu keentay xukun.

³⁰ Waxyaalahaas darteed ayaa qaar idin ka mid ah ey daciif u yihiin, oo kuwa kalana ey u xanuusan yihiin. Kuwa kale oo badanna ey u dhinteen.

³¹ Haddii aan marka hore garasho lahaan lahayn, ciqaabta Illaahey ma nagu dhici lahayn.

³² Laakiin hadduu Illaahey na xukumo oo na ciqaabo, wuu na edbinayaa si aan aduunka naloola xukumin.

³³ Sidaa darteed walaalayaalow, markaad iskugu timaadaan inaad wax cuntaan, waa inaad dhamaan isla cuntaan.

³⁴ Qof walboo gaajeysan waa inuu gurigiisa wax kasoo cunaa, si ciqaabta Illaahey eydan u hoos galin markaad isku timaadaan. Markaan imaadana waan idiin sheegi doonaa wax ku saabsan waxyaalaha kale.