Otum 28 - Ohwihwim Olehe

Obiŋ ba Amalata

¹ Omba bi e gbu akaŋ ba anwye-obiŋ lo, moa a lu a da gi ma moa a bzi lo Amalata.

² Moare ba obiŋ hi lo moa a wo odlodzi ma a gre eshri. Ogbu o zgi esi o ba-ba nga ogbga o bʼbu. Moare ba obiŋ hi lo moa a kpaŋ ovo okyku gi, nga moa a yga gi adzadzi.

³ Omba ba Oblus a shri okokõ a shri a ghwo ovo nga, emabi e zgi okyku embyliovo, nga alo e ta ŋa e kpmye obgo.

⁴ Moare ba obiŋ hi lo, moa a ka ba emabi e ta Oblus e kpmye obgo, nga moa a lu ta la emo a lu mi le, O dzu mbo alom he lo a wo are la a bga ebga angyiŋ. A kpo ekŋe a gro anyuŋ-ondzu, ambo Ahogbrẽ a sa a vu ŋa.

⁵ Oblus a khwa emabi lo a shri a ta ovo. Alo e kpo ŋa ekplokyeŋ mbo.

⁶ Moa a la a ka ma o dzu mbo ma Oblus á nyom onyom, o mbo le a tsi a gbu obiŋ nga á kpu. Ambla moa a tspi a ka ayi ma-me, moa a ka ekplokyeŋ e kpo ka la ŋa mbo. Okyku eka he moa a lu eso mo a lu mi le, Aŋa a wo ahogbrẽ-kyeŋ angyiŋ!

⁷ Agbi ba Opubliyu a wo osusku ta la okro lo. Aŋa a wo areŋ ba anwye-obiŋ lo. A yga gi adzadzi. Agi e dzu moa-zhẽ baŋ okyku elum etra.

⁸ Adaŋ Opubliyu a lom obiŋ. Ogbga ta la atini a vu ŋa. Oblus a gre aku lo eshyẽ nga a fa olu nga a shri abgo a shki ŋa eshri, nga a shaŋ ŋa.

⁹ Ambla ba ohi lo o kpo nga, moare la a no olo anwye-obiŋ lo mvye, moa a ba nga aŋa a shaŋ mo.

¹⁰ Moa a shri ototno nzenze a shri a da gi. Omba ba agi é yi nga, moa a shri akplo ba agi e klo a shri a ghwo amgblami.

O zgi Amalata o yi Oroma

¹¹ Ambla ba eha etra nga, agi e gre amgblami la a zgi Alaksandriya, moa a bzi lo ma Ahogbrẽ ba Ahli. Alo a tspi anwye-obiŋ lo omba ba ogbga o bʼbu.

¹² Agi e gbu osku ba Esiraku, nga agi e kpo elum etra ahe lo.

¹³ Agi e zgi ahe lo e gre osku ba Eregum. Onda oha nga, ogbga o zga esi o hlu o zgi ero o ba. Ambla ba elum eha nga, agi e gbu osku ba Obutoli.

¹⁴ Agi e hwiŋ moa la a bmi ba adlidzi ahe lo. Moa a klo bi e dzu pa la mo asati akyeŋ. Ambla he nga agi e ba Oroma.

¹⁵ Moanáŋ la a wo Oroma moa a gno oshpa bi, nga moa a ba osku ba moa a bzi lo ma Ekyku ba Abiyu, ta la Adne Atra okyku o tsa gi ozhẽ. Omba ba Oblus a ka mo nga, a vye Ahogbrẽ nga eso e gbu ŋa obiŋ.

Oroma

¹⁶ Omba ba agi e gbu Oroma, moa a bmi ba Oblus a dzu eŋa-ŋa. Anwyeakyuŋ a la a kʼpu ŋa.

¹⁷ Ambla ba elum etra nga, Oblus a bzi moaEyahuda moa la a wo moandakʼpo, a da mo a ba a shki. Ambla ba moa a ba a shki a khwo nga, a nyuŋ mo a lu mi le, Agimi anáŋ! Ame e kpo moarehwi bi akplokyeŋ mbo, nga ame e tla odzudzu bi e yga okro moadigi mbo, ambo moa a vu me Orushalima nga a shri me a da moaOroma.

¹⁸ Moa a zhĩ me ayakplo nga moa a klo o kyu me abgo okyku moa a yi zhezheŋ ba ame e kpo ekplokyeŋ la e tse ma ba ame e kpu mbo.

¹⁹ Omba moaEyahuda a tla odlo he lo, o dzu omgbybi ba ame e shri okũ e shri e yi okro Ekeza. Ambo ame e wo odlokyeŋ pa la moarehwi me mbo.

²⁰ Okyku eka he angyiŋ ame e da mo a bzi gimi okyku o da me e lu odlo ka la gimi. Moa a ta me aslika he okyku are ba moarehwi ba Esrayila a ka ayi ozhẽ okyku ŋa.

²¹ Moa a tno ŋa ma a lu mi le, Agi e hwiŋ akpakyeŋ obiŋ ba Eyahuda eshri boŋ mbo. Arekyeŋ a mbo eshki moanáŋ a shri oshpa eshri boŋ a shri a ba mbo. Moa a ka a lu ekplokyeŋ ebi eshri boŋ mbo.

²² Agi e klo e gno ekplo boŋ o ka, okyku eshi agi e yi zhezheŋ okroyaŋ a mbo moare a la a lu odlo ototno eshri ozhẽ he lo.

²³ Moa a sla onda ta la Oblus, nga moare nzenze a ba okro Oblus onda lo. A zga endigiŋ ma-me okyukyku Oblus a la a tsa mo, nga a nyum oshpa eshri Oreŋ ba Ahogbrẽ a da mo. A zga gble okyku o da mo a yga odlo Eyesu. A fa ayakplo ba odaŋ ba Omusa, ta la ayakplo ba akpekpa moarehwi ba Ahogbrẽ a hom mo otum.

²⁴ Moakyeŋ a bmi ba adlidzi ta la odlo baŋ lo, ambo moakyeŋ a bmi ba adlidzi mbo.

²⁵ Moa a zhiŋ ogbu nga, moa a la a kla odlo ta la emo ambla ba Oblus a lu mi le, Alo o wo eka he lo angyiŋ. Ogbgaodzi o tsa Eshaya arehwĩ ba Ahogbrẽ a hom otum o daŋ a lu pa la moadigi.

²⁶ A lu mi le, O yi o nyuŋ moarehwi he lo o lu mi le, Agimi e ngli é gno, e ngli é gno, ambo agimi é ka e bmye mbo, Agimi é ka, e bla é ka, ambo agimi é ka mbo.

²⁷ Okyku eshi eso mo e sheŋ e zhiŋ, Moa nga a som atuŋ mo, Nga moa a shki ayi mo. O wo eka he mbo e mbi, moa a kpo a gbu moa á ka la ayi mo, Nga moa a kpo a gbu moa á gno la atuŋ mo, Nga o dzu mbo moa á ka a bmye eso mo. Nga Ahogbrẽ a lu mi le, O dzu mbo moa á zhiŋ á ba okro me, Nga ame é shaŋ mo.

²⁸ Oblus a lu mi le, Agimi e gno oshpa ba Ahogbrẽ ba oshla moa á shri á kom moa la a wo moaEyahuda mbo. Moa á ngli atuŋ á gno! [

²⁹ Ambla ba Oblus a lu eka he nga, moaEyahuda a zhiŋ ogbu a yi nga, moa a kla odlo ta la emo nzenze.]

³⁰ Oblus a dzu odnekyeŋ eyi eha nga, a la a hre amgbaŋ odne lo ababgo baŋ. As yga areyaŋ a mbo la a ba okyku o ka ŋa.

³¹ A nyum oshpa ba Oreŋ Ahogbrẽ nga a nye moare eshri Adigi-odne Eyesu Ekristi. A lu odlo osheshye ta la esõ-egbubiŋ.