Otum 26 - Ohwihwim Olehe

Oblus a tspi okyku eshri baŋ egi ayi Agriba

¹ Agriba a nyuŋ Oblus a lu mi le, Ame e shri ekʼpo e doŋ okyku o doŋ o lu odlo okyku eshri boŋ. Oblus a ndba abgo baŋ nga a lu mi le,

² Agriba, aŋo anyuŋ-areŋ! Ame e ka eka ba ame e tsa adzi ba ame e hwiŋ ozhẽ okyku o tspi okyku eshri me egi ayi boŋ, eshri ekployaŋ a mbo ba moaEyahuda a shri a ba eshri me anye he.

³ Alo o wo adlidzi angyiŋ, okyku eshi aŋo o yi zhezheŋ eka odzudzu moaEyahuda ta la edgu odlo mo. Okyku eka he ame e vẽ, o wo boŋ o bmi le, aŋo o ngli atuŋ o gno odlo me la eso ble-ble.

⁴ MoaEyahuda a yi edgu odzudzu me ombamba ba ame e wo ola anwye. Moa a yi ba ame e la e dzu obiŋ bi ta la Orushalima angyiŋ.

⁵ Moa a sheŋ a yi, o wo moa a klo o lu adlidzi angyiŋ le, okyku eshi a zga esi me, ame e wo ba ozhẽ moaEfarisi angyiŋ. Ame e la e sõ ozhẽ he lo la osheshye.

⁶ Moa a sõ me ombgu ohuhuhi okyku ba ame e wo la okayio-zhẽ ohwihwim ba Ahogbrẽ a hwim pa la moadigi.

⁷ Egu bi otsko he lo, moa a la a hlu Ahogbrẽ eshko olulum ta la okyukyku, nga moa a la a ka ayi ozhẽ okyku ohwihwim he lo. Okyku okayiozhẽ he lo angyiŋ, aŋo anyuŋ-areŋ, moaEyahuda a la a klo odlo pa la me!

⁸ Okyku eshi agimi Eyahuda e bmi ba adlidzi ba Ahogbrẽ a la a kso moa la a sheŋ a kpu mbo?

⁹ Ame eshrishri eme a mbo e zga eso okyku o kpo ekployaŋ a mbo ba ame e kpo e gbu, okyku o bga eshko Eyesu ba Anazarata.

¹⁰ Ame e kpo eka he angyiŋ Orushalima. Ame e yga ekʼpo okro moandakʼpo olu ba Ahogbrẽ nga e vu moare la a lu Ahogbrẽ ma e ygi aku. Nga, omba moa a sõ mo ombgu ba eku, ame e la e bmi ta la alo.

¹¹ Engyi oshushku ame e la e kpo mo ewu anwyeakulu mo, nga ame e tspi gble okyku o da mo a tla obmi ba adlidzi mo. Ame e kpo efpu pa la mo, nga ame e klu mo e gre esku andandandim okyku o kpo mo ewu.

Oblus a lu odlo eshri ozhiozhiŋ baŋ

¹² Okyku eka he angyiŋ ame e gre Adamasku la ekʼpo ba moandakʼpo olu ba Ahogbrẽ.

¹³ Ozhẽ, o la olulum, aŋo anyuŋ-areŋ, omba ba ame e yi nga, ame e ka ayimom la a shka ayi a gre ayimom ba olum a zgi ongyeŋ a ba a tra egi ayi me pa la moare la a dzi pa la me.

¹⁴ Agi mvye nga e tsi e ygi obiŋ. Nga ame e gno enzi e lu la olom ba Eyahuda e lu mi le, Eshawlu, Eshawlu! Okyku eshi aŋo o la o kpo me ewu? Aŋo o la o ta eŋo etsa angyiŋ omba boŋ o la o hre adga boŋ o yi egi okũ, eka ba andu a la a hre adga a la a sheŋ opi are la a kpaŋ ŋa.

¹⁵ Ame e zhĩ e lu mi le, Aŋo ayi angyiŋ Adigi-odne? Adigi-odne a tno ma a lu mi le, Ame angyiŋ e wo Eyesu boŋ o la o kpo me ewu.

¹⁶ Aŋo o kso o tspi angyeŋ. Ame e shri eme e tsa okyku o da me e sla ŋo eka anwye-odne me. Ame e klo boŋ o lu o da moahwõ eka ekplo boŋ o ka lo anye he, ta la ekplo ba ame é ba e tsa ŋo omba la ó ba mi.

¹⁷ Ame é shla ŋo abgo moarehwi ba Esrayila, ta la abgo moa la a wo moaEyahuda mbo. Moahi lo, ame é hom ŋo otum okro mo.

¹⁸ Aŋo angyiŋ ó ba o hwile ayi mo, nga ó ba o se mo o sku evbu, nga ó ba o shri mo ó ba ayimom, nga aŋo ó zhiŋ mo ekʼpo ba Eshitaŋ ó ba ekʼpo ba Ahogbrẽ. Okyku o wo moa a bmi ba adlidzi pa la me le, moa á kyu mo abgo odlobi mo, nga moa á hwiŋ okro odzuma eshki moarehwi ba Ahogbrẽ a sla mo.

Oblus a lu odlo eshri otum baŋ

¹⁹ Okyku eka he Agriba, aŋo anyuŋ-areŋ, ame e kpo evom okoka la o zgi Ongyeŋ o ba mbo.

²⁰ Ame e zga esi otum lo Adamasku nga e sa e gbu Orushalima, nga ame e sa e gbu obiŋ ba Eyahuda, nga ame e sa e gbu pa la moa la a wo moaEyahuda mbo. Ame e la e nyum oshpa e lu mi ma moa a nyiŋ ozhẽ mo nga a zhiŋ a lu Ahogbrẽ ma. Nga a kpo ayakplo la á ba a tsa ba moa a zhiŋ adlidzi.

²¹ Okyku ohe lo sha angyiŋ moaEyahuda a vu me Anyuŋ-akulu nga a klo o bga me.

²² Ambo ma-me o bli olum anye he, Ahogbrẽ a la a kpo a ghwo la me. Okyku eka he, ame e tspi ahe okyku o zgi egŋe ba Ahogbrẽ egi ayi areyaŋ a mbo. Ekplo ba ame e lu hi, moarehwi ba Ahogbrẽ a hom otum ta la Omusa, moa a lu ma alo é kpo.

²³ Moa a lu mi ma Emisiya á kpo ewu, nga aŋa angyiŋ á ba a wo arehwĩ ba oriori la á ba a kso ongybi. Ana á nyum oshpa ba ayimom ba oshla a da moaEyahuda pa la moa la a wo moaEyahuda mbo.

²⁴ Omba ba Oblus a tspi okyku eshri baŋ eka he nga, Efestu a shrom ŋa a lu mi le, Oblus, aŋo o dro! Oyi-yi boŋ o la o wo ogyugyuŋ o doŋ o dro!

²⁵ Oblus a tno ma a lu mi le, Ame e dro angyiŋ mbo, aŋo Efestu ba anyuanyuŋ! Odlo ba ame e lu hi, o wo adlidzi nga o wo kye angyiŋ.

²⁶ Agriba, aŋo anyuŋ-areŋ, ame e kpo e gbu ba ame e lu odlo he lo osheshye ka la ŋo okyku eshi aŋo o yi lo mvye. Ame e bmi ba adlidzi boŋ o sheŋ o mbga ekployaŋ a mbo o sheŋ o ka bgu. Okyku eshi ekplo la e kpo he lo, e kpo emvygi angyiŋ mbo.

²⁷ Agriba, aŋo anyuŋ-areŋ, aŋo o bmi ba adlidzi pa la moarehwi ba Ahogbrẽ a hom otum ma? Ame e yi ba aŋo o bmi ba adlidzi.

²⁸ Agriba a zhĩ Oblus a lu mi le, Ekplu omba he, aŋo o tne aga ma aŋo o zhiŋ me o da me e dzu a ba Ekristi?

²⁹ Oblus a tno ma a lu mi le, O wo ba alo o wo ela omba sha a mbo, o mbo le o wo ba alo o wo omba nzenze a mbo, olu me okro Ahogbrẽ o wo okyku o da areyaŋ a mbo la a gno odlo me anye he, a zhiŋ a dzu eka ba ame e wo he. Ambo ekplo ekyekyeŋ, aslika la a wo abgo me he dne!

³⁰ Ambla he nga, anyuŋ-areŋ ta la ogomna, ta la Ebeniki pa la moahwõ mvye, moa a kso angyeŋ.

³¹ Omba ba moa a yi nga moa a lu mi le, Alom he a kpo ekplokyeŋ la e tse ma moa a bga ŋa, o mbo le moa a shri ŋa a ta aku mbo.

³² Agriba a nyuŋ Efestu a lu mi le, Moa a kpo a gbu moa a kyu alom he abgo, ambo aŋa a sheŋ a shri ombgu baŋ a gre okro Ekeza bgu.