Otum 25 - Ohwihwim Olehe

Oblus a shri ombgu baŋ a yi okro Ekeza

¹ Efestu nga a ba obiŋ ba oreŋ baŋ. Ambla ba elum etra nga, a zgi Esizariya a gre Orushalima.

² Orushalima nga, moandakʼpo olu ba Ahogbrẽ pa la moandakʼpo moaEyahuda, moa a shri odlo eshri Oblus a ba, nga moa a vẽ Efestu,

³ okyku o daŋ a kpo a ghwo a mo a da mo a shri Oblus a shri a ba Orushalima. MoaEyahuda a hwim ba moa á ba a bga ŋa ozhẽ.

⁴ Efestu a tno ma a lu mi le, Moa a klu Oblus a ta aku Esizariya, ame nga, é yi a mi loa mbla fi.

⁵ Agimi e da moandakʼpo bimi a yi Esizariya pa la me, nga a shri odlo alom he lo a shri a ba, o wo baŋ a kpo gimi ekplokyeŋ.

⁶ Efestu a sa a kpo elum efote o mbo le elum okʼpo pa la mo a khwo nga, ambla he nga a gre Esizariya. Onda oha nga, a gre a yi a dzu akuombgu, nga a da mo a shri Oblus a ba.

⁷ Omba ba Oblus a ba nga moaEyahuda la a zgi Orushalima a ba, a tspi a ta ŋa a kpaŋ, nga moa a zga esi a shri odlo andandandim a shri a ba eshri Oblus. Akplo moa a shri a ba a wo la a vu olo. MoaEyahuda a kpo a gbu moa a tsa ozhẽ ekplokyeŋ mbo.

⁸ Oblus a tspi okyku eshri baŋ a lu mi le, Ame e ta akpu okro odaŋ moaEyahuda mbo, ame e ta akpu Anyuŋ-akulu mbo, nga ame e ta akpu egi ayi anyuŋ-areŋ ba Oroma mbo.

⁹ Efestu a klo o raŋ moaEyahuda eso, okyku eka he a zhĩ Oblus a lu mi le, Aŋo o bmi nga a yi Orushalima okyku o da me e sõ ŋo ombgu a mi lo?

¹⁰ Oblus a tno ŋa ma a lu mi le, Ame e wo egi ayi ba akuombgu ba Ekeza, ibu la e raŋ e gre ba moa á ba a sõ me ombgu. Ame e kpo moaEyahuda ekplokyeŋ mbo, aŋo a mbo o sheŋ o yi lo.

¹¹ O wo ba ame e kpo ekplokyeŋ e la e tse ma moa a sõ me ombgu ba eku, ame é zhĩ okyku o da mo a kyu me abgo mbo. Ambo o wo ba adlidzi a wo odlo moa a shri a ba he mbo le, arekyeŋ a kpo a gbu baŋ a shri me a da mo mbo. Ame é shri ombgu me é yi okro Ekeza.

¹² Ambla ba Efestu a ka omiŋ pa la moa la a sõ ombgu ka la ŋa nga, a nyuŋ Oblus a lu mi le, Aŋo o shri ombgu boŋ ó yi okro Ekeza, okyku eka he aŋo ó yi okro Ekeza lo.

Oblus okro Agriba ta la Ebeniki

¹³ Ambla fi nga, anyuŋ-areŋ moa a bzi ŋa Agriba, ta la Ebeniki, moa a ba Esizariya okyku o da mo a shko Efestu, okyku baŋ a ba.

¹⁴ Ambla moa a kpo elum fi ahe lo nga, Efestu a nyum eka ba ombgu ba Oblus o wo, a da anyuŋ-areŋ a lu mi le, Alomakyeŋ a wo ahe, Efliki a dzu ŋa a zga aku.

¹⁵ Omba ba ame e gre Orushalima, moandakʼpo olu ba Ahogbrẽ pa la moandakʼpo ba Eyahuda, moa a shri odlo eshri Oblus a shri a ba, nga moa a klo ba ame e sõ ŋa ombgu ba eku.

¹⁶ Ambo ame e lu e da mo e lu mi le, MoaOroma a da mo a vu arekyeŋ ba ombgu o wo eshri baŋ mbo, o wo le moa a da moa la a wo ombgu ka la ŋa a ba nga moa a gno odlo mo ayga dne, are ba ombgu o wo eshri baŋ nga, a wo ozhẽ ma ba o tspi okyku eshri baŋ.

¹⁷ Omba ba moaEyahuda mvye a ba okyku omgbu lo, ame e tpi omba ayi mbo. Onda oha nga ame e gre akuombgu e khwo nga, ame e da mo a shri alom lo a shri a ba.

¹⁸ Moafpu ŋa lo a tspi angyeŋ. Ambo moa a lu edgu odlo ba ame e ka ma moa á lu eshri Oblus mbo.

¹⁹ Ambo ekplo moa a kpo, moa a kla odlo ka la ŋa eshri odlo odaŋ mo, ta la alomakyeŋ la a sheŋ a kpu bgu, moa a bzi ŋa ma Eyesu. Oblus a la a zga gble a la a lu mi le, ma alom he lo a wo ayi.

²⁰ Ombgu lo o lbi o gre eshri. Ame e yi eka ba ame é ba e hwiŋ egŋe eshri ombgu he lo mbo. Okyku eka he, ame e zhĩ Oblus e lu mi le, Aŋo o bmi okyku o da me e yi e sõ ŋo ombgu Orushalima?

²¹ Ambo Oblus a klo o shri ombgu baŋ a yi okro Ekeza. A vẽ me ma moa a shri ŋa a ghwo abgo moa la a kʼpu, nga ma moa a da Ekeza angyiŋ a sõ ŋa ombgu. Okyku eka he, ame e shri ŋa e ghwo abgo moa la a kʼpu o tsa onda ba ame é ba e daŋ a yi okro Ekeza.

²² Agriba a nyuŋ Efestu a lu mi le, Ame a mbo e klo e gno odlo alom he lo. Efestu a tno ma a lu mi le, Aŋo ó gno lo akyi.

²³ Onda oha nga, Agriba ta la Ebeniki, moa a ba la ekʼpo ta la anyuanyuŋ moa a wo alo ma, moa a gre aku moa a shki ma pa la moandakʼpo moanwyeakyuŋ, pa la moandakʼpo ba osku lo. Efestu a da mo a shri Oblus a ba.

²⁴ Efestu a lu mi le, Agriba, aŋo anyuŋ-areŋ, ta la areyaŋ a mbo la a wo ahe ka la gi, agimi e ka alom he. MoaEyahuda la a wo ahe pa la moa la a wo Orushalima, moa a shri odlo a ba eshri baŋ. Moa a la a ta enzi angyangyeŋ a la a lu mi ma moa a daŋ a dzu ma nga mbo.

²⁵ Ambo ame e hwiŋ ekplokyeŋ eshri baŋ e la e tse ma moa a bga ŋa mbo. Aŋa a mbo a sheŋ a shri ombgu baŋ a shri a gre okro ba Ekeza. Okyku eka he ame e zga eso ba o daŋ a yi.

²⁶ Ambo ame e yi ekplokyeŋ zhezheŋ ba o ta o kom Ekeza eshri odlo he lo mbo. Okyku eka he ame e shri ŋa e ba egi ayi boŋ, aŋo Agriba anyuŋ-areŋ, okyku o da me e hwiŋ ekplo ba o ta-ta ambla boŋ o mbli odlo lo o ka.

²⁷ Alo o wo otum ototno o wo ba ame e daŋ a gre eka he ototno, nga ba ame e ka e tsa e ka ekplo ba moa a sõ ŋa ombgu okyku lo mbo.